ސްކޫލްތަކުން ހިމާޔަތް ހޯދައިގެންތިބި ފަލަޞްޠީނުގެ އާންމުންގެ 33 މީހަކު ޝަހީދުކޮށްލައިފި, 24 ގަޑިއިރުތެރޭ 112 މަރު
ވިއްސިވިހާލިވެފައިވާ ފަލަޞްޠީނުގެ ރައްޔިތުންތަކެއް ހިމާޔަތް ހޯދައިގެންތިބި ޣައްޒާގެ ސްކޫލްތަކަށް އިޒްރާއިލްއިން ދިން ހަމަލާތަކުގައި 33 މީހަކު ޝަހީދުވެއްޖެއެވެ. އޭގެ ތެރޭގައި މަދުވެގެން 18 ކުޑަކުއްޖަކުވެސް ހިމެނޭކަމަށް ރިޕޯޓްތައް ބުނެއެވެ. އިޒްރާއިލްއިން ފާއިތުވި 24 ގަޑިއިރު ވަނީ 112 މީހުން ޣައްޒާއިން ޝަހީދުކޮށްލާފައެވެ. އޭގެ ތެރެއިން 71 މީހުން ޝަހީދުކޮށްލާފައިވަނީ އުތުރު ޣައްޒާއިންނެވެ.
އެތައްބަޔަކު ހިމާޔަތް ހޯދައިގެން ތިބި ސްކޫލްތަކަށް އިޒްރާއިލްއިން އިން ދިން ހަމަލާތަކުގައި 100 އަށްވުރެ ގިނަ މީހުން ވަނީ ޒަޙަމްވެސް ވެފައެވެ. މިއީ ޣައްޒާ ސިޓީގެ ތުފަޙް ނެއިބަރހުޑް ސަރަހައްދުގައި ހުންނަ ދެ ސްކޫލަކަށް އަމާޒުކޮށް އިޒްރާއިލްއިން ދިން ހަމަލާތަކެއް ކަމަށް ޣައްޒާގެ ސަރުކާރުގެ މީޑިއާ އާ ހަވާލާދީ އަލްޖަޒީރާގައި ބުނެފައި ވެއެވެ.
ޣައްޒާ ހަނގުރާމަ ފެށުންފަހުން އާންމުންގެ ގިނަ ބައެއްގެ ގެދޮރުގެއްލި ވިއްސިވިހާލިވެފައިވާ ގިނަ ރައްޔިތުންތަކެއް ބޯހިޔާވަހިކަން ހޯދައިގެން އުޅެނީ ހަލާކުވެފައިވާ ސްކޫލް އިމާރާތްތަކުގައެވެ.
ޣައްޒާގެ މަދަނީ ދިފާއުގެ ތަރުޖަމާނު ވިދާޅުވީ އެސަރަޙައްދުގައި ހުންނަ ދާރް އަލް-އަރްގަމް ސްކޫލަށް މަދުވެގެން ހަތަރު މިސައިލް ހަމަލާއެއް އެރިކަމަށެވެ. މީގެ އިތުރުންވެސް ޣައްޒާ ސިޓީގައި ހުންނަ ފަޙްދް ސްކޫލަށް އިޒްރާއިލްގެ ހަމަލާތައް އަރާފައިވާކަމަށް މަސްދަރުތަކާ ހަވާލާދީ އަލްޖަޒީރާއިން ރިޕޯޓްކޮށްފައި ވެއެވެ.
ހަމަލާއަށްފަހު އިޒްރާއިލްއިން ވަނީ ޣައްޒާ ސިޓީގައި ހަމާސް އިން އެމީހުންގެ ހަމަލާތައް އިޒްރާއިލްގެ އަސްކަރިއްޔާ އަދި އިޒްރާއިލްގެ އާންމުންނާ ދެކޮޅަށް ދިނުމަށް ބޭނުންކުރަމުންއައި ކޮމާންޑް ސެންޓަރަކަށް ހަމަލާދިންކަމަށް ބުނެފައެވެ. ނަމަވެސް އެއީ ސްކޫލަށް ދިން ހަމަލާކަމެއް ސާފެއްނޫނެވެ.
އިޒްރާއިލްއިން އާންމުކަމެއްހެން އަންނަނީ ޣައްޒާގެ ސުކޫލްތަކަށާއި, ވިއްސި ވިހާލިވެފައިވާ މީހުން ދިރިއުޅޭ ގެތަކަށް އަދި ހޮސްޕިޓަލްތަކަށްވެސް އަމާޒުކޮށް ހަމަލާދެމުންނެވެ. ދާނެ އިތުރު ތަނެއްނެތި, ރައްކާތެރިވާނެ އެއްވެސް ގޮތެއްނެތި ހުއްޓުމެއްނެތި އޮހެމުންދާ ބޮންތަކުގެ ތެރޭގައި މަޑުމަޑުން ފަލަޞްޠީނުގެ ނަޞްލު ނެތިގެން ދަނީއެވެ.
ރިއެކްޝަންސް
