ދިވެހިރާއްޖޭގެ ރައީސް އާ އެންފީލްޑުން ބައްދަލުވުމަކީ ވަރަށް ބޮޑު އުފަލެއް: އީން ރަޝް
ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއާ ލިވަޕޫލްގެ ސްޓޭޑިއަމް އެންފީލްޑުން އިއްޔެ ބައްދަލުވުމަކީ ލިބުނު ވަރަށްބޮޑު އުފަލެއްކަމަށް އީން ރަޝް ވިދާޅުވެއްޖެއެވެ. ލިވަޕޫލްގެ ތާރިޚްގައި އެންމެ ގިނަ ގޯލްޖެހި ކުޅުންތެރިޔާ ރަޝް މިހެން ވިދާޅުވީ މީސްމީޑިއާ މަންސަ, އިންސްޓަގްރާމްގައި ދެބޭފުން އެކީ, އަދި ދިވެހިރާއްޖޭގެ ވަފުދުގެ ބޭފުޅުންނާއެކު ނަންގަވާފައިވާ ފޮޓޯތައް ހިއްސާކުރައްވަމުންނެވެ.
ރަޝް ވިދާޅުވީ ލިވަޕޫލް އެފްސީއިން ވިޒިޓް މޯލްޑިވްސް އާއެކު މި ފެށި ޕާޓްނަރޝިޕްއަކީ ހަމައެކަނި ޓުއަރިޒަމް ޕްރޮމޯޓް ކުރުމުގެ މަސައްކަތެއް ނޫންކަމަށެވެ. އަދި މިއީ ދެފަރާތް ޤަބޫލުކުރާ ވެލިއުތަކާއެކު ދެމެހެއްޓެނިވި ގޮތެއްގައި ދުނިޔޭގެ ވެށި ރައްކާތެރި ކުރުމަށް އެޅޭ ފިޔަވަޅެއްކަން ވެސް ރަޝް ފާހަގަކުރެއްވިއެވެ.
"ވިޒިޓް މޯލްޑިވްސް އަކީ ރާއްޖޭގެ އާދަޔާޚިލާފް ވެށި, ކަނޑުގެ ދިރުންތަކާއެކު ދެމެހެއްޓެނިވި ފަތުރުވެރިކަމެއް ކުރުމަށް ވަރަށް ބޮޑަށް ބާރުއަޅާ އެގޮތަށް މަސައްކަތްކުރާ ބައެއް. ތިރި ޖަޒީރާ ޤައުމުގެ ނާޒުކު މައްސަލަތަކާއި, މޫސުމަށް އަންނަ ބަދަލުތަކާއި, ކަނޑުގެ ލޮނުގަނޑު އުފުލުމުގެ ސަބަބުން ދިމާވާ ކަންކަމަށް އެހެން މީހުންގެ ހޭލުންތެރިކަން އިތުރުކުރަން މަސައްކަތްކުރޭ" ވިޒިޓް މޯލްޑިވްސް އާ ބެހޭގޮތުން ރަޝް ލިއުއްވާފައިވެއެވެ.
އެހެން ކަމުން ލިވަޕޫލްގެ 200 މިލިއަން ފޮލޯވަރސް އާއެކު އަދި ފާއިތުވި ސީޒަންގެ 12 ބިލިއަން ވިއުސް އާ އެކު މި އެއްބަސްވުމުގެ ދަށުން ދެފަރާތުން ހާސިލްކުރަން ބޭނުންވާ ކަންތައް ދުނިޔޭގެ އެކި ކަންކޮޅުތަކުގައި ތިބި ލިވަޕޫލްގެ ފޭނުންނާ ގުޅުވާދެވޭނެ ކަމަށް ރަޝް ބުނެފައި ވެއެވެ. ވިޒިޓް މޯލްޑިވްސްގެ އިނީޓިއޭޓިވްތަކަށް އަދި ކްލަބްގެ އެވޯޑް ހޯދުމުގެ ދެމެހެއްޓެނިވި ޕްރޮގްރާމަށް 'ދި ރެޑް ވޭ ޓު ރެއިސް އެވެއަރނަސް އެންޑް ޑްރައިވް ޕޮސިޓިވް ޗޭންޖް" އަކީ ވަރަށް ރަނގަޅު ނިންމުމެއްކަމަށްވެސް އޭނާ ފާހަގަ ކުރެއްވިއެވެ.
ރިއެކްޝަންސް
