ގިނަ މީހުން ބުރަވަނީ 2000 ވަނަ އަހަރުގެ ފަހުން އުފަންވީ މީހުންނަށް ދުންފަތް މަނާކުރަން
50% މީހުން އެގޮތަށް ވޯޓް ދިން
ދުންފަތް މަނާކުރާނެ އުމުރު ކަނޑައެޅުމާ މެދު ރައްޔިތުންނަށް ފެންނަ ގޮތެއްގެ ހިޔާލު ހޯއްދެވުމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ހުޅުވާލެއްވި ޕޯލްގައި 2000 ވަނަ އަހަރުގެ ފަހުން އުފަންވީ ފަރާތްތަކަށް މަނާކުރަން ގިނަ ބަޔަކު ވޯޓް ދީފިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުއިއްޒު އެމަނިކުފާނުގެ އެކްސް އެކައުންޓްގައި ޢާއްމުންގެ ހިޔާލަށް ހުޅުވާލެއްވީ ދުންފަތް މަނާކުރާނެ އުމުރު ކަނޑައެޅުމާ މެދުގައެވެ. އެގޮތުން އެމަނިކުފާނު ތިން ހިޔާލެއް ހުށަހެޅުއްވިއެވެ. އެއީ 2000 ވަނަ އަހަރުގެ ޖެނުއަރީ ފުރަތަމަ ދުވަހުގެ ފަހުން އުފަންވި ފަރާތްތަކާއި, 2004 ވަނަ އަހަރުގެ ޖެނުއަރީ ފުރަތަމަ ދުވަހުގެ ފަހުން އުފަންވި ފަރާތްތަކާއި, 2007 ވަނަ އަހަރުގެ ޖެނުއަރީ ފުރަތަމަ ދުވަހުގެ ފަހުން އުފަންވި ފަރާތްތަކެވެ.
ފުރަތަމަ ވޯޓް ދެއްވި 2800 މީހުންގެ ތެރެއިން %50.8 މީހުން ވޯޓްދީފައި ވަނީ 2000 ވަނަ އަހަރުގެ ޖެނުއަރީ މަހުގެ އެއްވަނަ ދުވަހުގެ ފަހުން އުފަންވި ފަރާތްތަކަށް ދުންފަތް މަނާކުރުމަށެވެ. %41.2 މީހުން ވޯޓް ދީފައިވަނީ 2007 ވަނަ އަހަރުގެ ފަހުން އުފަންވި ފަރާތްތަކަށް ދުންފަތް މަނާކުރުމަށެވެ. 2004 ވަނަ އަހަރުގެ ފަހުން އުފަންވި ފަރާތްތަކަށް ދުންފަތް މަނާކުރަން ވޯޓް ދިނީ %8 މީހުންނެވެ.
ރައީސުލްޖުމްހޫރިއްޔާ ވިދާޅުވީ ބަލިވުމުގެ ކުރިން ބަލިން ރައްކާތެރިވުމަށް ފިޔަވަޅުތަކެއް އަޅުއްވަން ޖެހޭ ކަމަށެވެ. ދުންފަތް ކޮންޓްރޯލް ކުރުމަކީ އޭގެތެރެއިން ފިޔަވަޅެކެވެ. ނަމަވެސް އެފިޔަވަޅު ތަންފީޒުކުރުމާ މެދު އެމަނިކުފާނު އަދި ގޮތެއް ނުނިންމަވައެވެ. ނަމަވެސް އެވާހަކަތައް ދައްކަވާ ހިޔާލު ހޯއްދެވުމުގެ މަސައްކަތް ވަނީ ފައްޓަވާފައެވެ. އެމަނިކުފާނު ތިން އުމުރުފުރައެއްގެ ހިޔާލާއެކު ޢާއްމުންނަށް ދޫކޮށްލެއްވި ޕޯލްގައި ބައިވެރިވި ވޯޓް ލުމުގެ ފުރުޞަތު ދެއްވީ ހަތަރު ދުވަހަށެވެ.
ރިއެކްޝަންސް
