
މާދަމާ އެއަރޕޯޓު ބާރުވެދާނެކަމަށް ބަލާ، ދުރާލާ އެއާޕޯޓަށް ދިއުމަށް އިލްތިމާސްކޮށްފި
މާދަމާ މެންދުރުފަހު ވެލާނާ އެއަރޕޯޓު ބާރުބޮޑުވާނެ ކަމަށް ލަފާކޮށް، ފުރަންދާ ފަރާތްތަކުން ދުރާލާ އެއަރޕޯޓަށް ދިއުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ.
އެމްއޭސީއެލްއިން ވިދާޅުވީ މާދަމާ މެންދުރު އާންމު އޮޕަރޭޝަންތަކާއެކު އުމްރާއިން މީހުން އެނބުރި އަންނާނެ ކަމަށެވެ. އެހެންކަމުން އޮޕަރޭޝަންތައް ފަސޭހަކަމާއެކު ކުރިއަށް ގެންދިއުމަށް އެއަރޕޯޓަށްދާ ފަރާތްތަކުން ވީހާވެސް އަވަހަށް ޗެކިން އަދި ސެކިއުރިޓީ ކްލިއަރެންސް ހެދުން ވަރަށް މުހިއްމުކަމަށް އެކުންފުނިން ވިދާޅުވިއެވެ.
އުމްރާއިން މީހުން އަންނަ ފްލައިޓުތައް މެންދުރުފަހު 2:00 އާއި ހަވީރު 4:00 ގައި އަންނާނެ ކަމަށް އެމްއޭސީއެލްއިން ވިދާޅުވިއެވެ. އެހެންކަމުން އެ ގަޑިތަކުގައި އެއަރޕޯޓުގެ ޓްރެފިކް ތޮއްޖެހުން ކުޑަކުރުމަށް ދަތުރުފަތުރުގެ ޚިދުމަތްދޭ ފަރާތްތަކާއި ޓެކްސީތަކުން އެއްބާރުލުން ދިނުން އެދޭކަމަށް އެކުންފުނިން ވިދާޅުވިއެވެ.
ކުރީ އަހަރުތަކެކޭވެސް އެއްފަދައިން މިއަހަރުވެސް އުމްރާގެ އަޅުކަން އަދާކުރުމަށްޓަކައި، ރާއްޖެއިން ވަނި ގިނައަދެއްގެބަޔަކު މައްކާގެ މާތްބިމަށް ގޮއްސައެވެ. މީގެ ތެރޭގައި ޙައްޖު ކޯޕަރޭޝަންގެ ހަވާލުގައި ދިޔަ މީހުންގެ އިތުރުން އަމިއްލަ ގްރޫޕްތަކުގެ ހަވާލުގައި ދިޔަ މީހުންވެސް ހިމެނެއެވެ.
ރިއެކްޝަންސް






