ގދ. ގައްދޫގައި 30 އެނދުގެ ޒަމާނީ ހޮސްޕިޓަލް އެޅުމުގެ އަމަލީ މަސައްކަތް އެމްޓީސީސީން ފަށައިފި
ގދ. ގައްދޫގައި ސަރުކާރުން ތަރައްޤީކުރުމަށް ހަމަޖެހިފައިވާ 30 އެނދުގެ ޒަމާނީ އައު ހޮސްޕިޓަލް އިމާރާތުގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ރަސްމީކޮށް ފަށައިފިއެވެ.
މި މަޝްރޫޢުގެ ދަށުން ގައްދޫގައި ހަތަރު ފަންގިފިލާގެ ޖާގައިގެ މައި ހޮސްޕިޓަލް އިމާރާތެއް ބިނާކުރުމަށް ވަނީ ހަމަޖެހިފައެވެ. މި އިމާރާތް ފަރުމާކުރެވިފައިވަނީ 30 އެނދުގެ ޖާގައާއެކު، ޒަމާނީ ވަސީލަތްތަކާއެކު ސިއްޙީ ޚިދުމަތް ދެވޭނެ ގޮތަށެވެ.
މައި ހޮސްޕިޓަލް އިމާރާތުގެ އިތުރުން، 2,563 އަކަފޫޓުގެ ސަރަޙައްދެއްގައި އެއް ފަންގިފިލާގެ ސާވިސް ބްލޮކެއް އެޅުމަށް ވަނީ ހަމަޖެހިފައެވެ. އަދި ހޮސްޕިޓަލުގައި މަސައްކަތްކުރާ މުވައްޒަފުންނަށް ޚާއްޞަކޮށްގެން 3,573 އަކަފޫޓުގެ ސަރަޙައްދެއްގައި ދެ ފަންގިފިލާގެ އެކޮމަޑޭޝަން ބްލޮކެއް އިމާރާތް ކުރުންވެސް މި މަޝްރޫޢުގެ ތެރޭގައި ހިމެނެއެވެ.
ޖުމްލަ 11.7 މިލިއަން ރުފިޔާގެ ބަޖެޓަކުން ކުރިއަށްގެންދާ މި މަޝްރޫޢަކީ 600 ދުވަހުގެ ތެރޭގައި ނިންމުމަށް އެމްޓީސީސީއާ ހަވާލުކޮށްފައިވާ މަޝްރޫޢެކެވެ.
މި މަޝްރޫޢުގެ މަސައްކަތް ނިމި، ހޮސްޕިޓަލުން ޚިދުމަތް ދޭން ފެށުމުން ގައްދޫގެ އިތުރުން އެ ސަރަޙައްދުގެ ރަށްތަކުގެ ރައްޔިތުންނަށް ލިބެމުންދާ ސިއްޙީ ޚިދުމަތުގެ ފެންވަރު އިތުރަށް ރަނގަޅުވެ، ފަރުވާއަށް އެހެން ރަށްރަށަށް ދަތުރުކުރުމުގައި ދިމާވާ ދަތިތަކަށް ބޮޑު ލުއިފަސޭހައެއް ލިބިގެންދާނެއެވެ.
ރިއެކްޝަންސް
