ބ. ދަރަވަންދޫ ބަނދަރު ތަރައްޤީކުރުމުގެ މަޝްރޫޢުގެ 68 އިންސައްތަ މަސައްކަތް ނިމިއްޖެ

ބ. ދަރަވަންދޫ ބަނދަރު ތަރައްޤީކުރުމުގެ މަޝްރޫޢުގެ 68 އިންސައްތަ މަސައްކަތް މިހާރު ނިމިފައިވާ ކަމަށް އިމާރާތްކުރުމާއި ބިނާރާ ބެހޭ ވުޒާރާއިން ހާމަކުރައްވައިފިއެވެ.

އެ ވުޒާރާއިން މީސްމީޑިއާގައި ހިއްސާކުރި މަޢުލޫމާތުގައި ވިދާޅުވީ، މި މަޝްރޫޢުގެ ދަށުން މިހާރު ކުރިއަށްދަނީ ބޭރުތޮށި ލުމުގެ މަސައްކަތާއި، އެއްގަމުތޮށީގެ އެލް-ބްލޮކް ޖެހުމުގެ އިތުރުން ކެޕިން ބީމް އެޅުމުގެ މަސައްކަތްތައް ކަމަށެވެ.

ސަރުކާރުގެ ބަޖެޓުން 55.48 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މަޝްރޫޢެކެވެ.

މި މަޝްރޫޢުގެ ދަށުން ފުޅާ ދާއިރާއެއްގައި ބަނދަރު ފުންކުރުމާއި ތަރައްޤީކުރުމުގެ މަސައްކަތްތައް ދަނީ ހިނގަމުންނެވެ. އެގޮތުން 30،504 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުމާއި، ކުރިން ފުންކޮށްފައިވާ ފަޅުން 1,843 ކިއުބިކް މީޓަރުގެ ސަރަޙައްދެއް އަލުން ފުންކުރުން ހިމެނެއެވެ. މީގެ އިތުރުން 4,126 ކިއުބިކް މީޓަރުގެ ރޭމްޕް ސަރަޙައްދަކާއި، 2,301 ކިއުބިކް މީޓަރުގެ ނެރު ފުންކުރުމުގެ މަސައްކަތްވެސް ހިމެނެއެވެ.

ބަނދަރު ހިމާޔަތްކުރުމާއި ވަސީލަތްތައް ޤާއިމުކުރުމުގެ ގޮތުން 352 މީޓަރުގެ ބޭރުތޮށިލުމާއި، 83 މީޓަރުގެ ރިވެޓްމެންޓް ޖެހުމާއި، 248 މީޓަރުގެ އެއްގަމުތޮށި ލުމުގެ އިތުރުން 24 މީޓަރުގެ ގްރޮއިން ޖެހުން ހިމެނެއެވެ. އަދި 10 މީޓަރު ދިގު 9 މީޓަރު ފުޅާ ރޭމްޕަކާއި، 140 މީޓަރު ދިގު ދެ މީޓަރު ފުޅާ ކޮންކްރީޓް ޖެޓީއެއް ހެދުމަށް ވަނީ ހަމަޖެހިފައެވެ.

މީގެ އިތުރުން، 2,104 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި، ބަނދަރު ބައްތި އަދި ނެރު ބައްތި ހަރުކުރުމުގެ މަސައްކަތްވެސް މި މަޝްރޫޢުގެ ދަށުން އެމްޓީސީސީން ކުރިއަށް ގެންދާނެއެވެ.