ދުންފަތާ ދުރުކުރަން ދުންފަތުގެ އަގުބޮޑުކުރި ކުރުން ނިމުމަކަށް ގެންނާނެ ކަމަށް އެމްޑީޕީން ބުނެފި
ދުންފަތާ ދުރުކުރަން ދުންފަތުގެ އަގުބޮޑުކުރި ކުރުން ނިމުމަކަށް ގެންނާނެ ކަމަށް އެމްޑީޕީން ބުނެފިއެވެ. އެމްޑީޕީން ރޭ ބޭއްވި ސައްލާގައި ޗެއަރޕަސަން ފައްޔާޒު އިސްމާއީލް ވިދާޅުވީ މިސަރުކާރުން ރައީސް ޑރ.މުޙައްމަދު މުއިއްޒު ދުންފަތުގެ އަގު އެތައް ގުނަޔަކުން ބޮޑުކުރެއްވީ ދިވެހިން ދުންފަތާ ދުރުކުރަން ނޫން ކަމަށެވެ. އެއީ ދިވެހިންގެ ސިއްހަތާ މެދުގައި ރައީސް ޑރ.މުއިއްޒު ކަންބޮޑުވެވަޑައިގަންނަވާތީ ނިންމެވި ނިންމެވުމެއް ނޫންކަމަށް ފައްޔާޒު ވިދާޅުވިއެވެ.
އޭނާ ވިދާޅުވީ ދުންފަތާ ދުރުކުރަން އެހެން ގައުމުތަކުގައި އެކަން ކޮށްފަ އޮތީ އެތައް ޒަމާނެއް ވަންދެން ރައްޔިތުންނަށް ބުނެދީގެން އަމިއްލައަށް ރައްޔިތުން އެކަންކަމާ ދުރުހެލިކޮށްގެން ކަމަށެވެ. ސިގިރޭޓް ބޯމީހުންނަކީ އަގުބޮޑުކުރިޔަސް އެކަމާ ދުރުވާނެ ބައެއް ނޫންކަން ސަރުކާރަށް އިނގޭތީ, އަގުބޮޑުކުރީ ދައުލަތުގެ ބަޖެޓަށް ފައިސާ ހޯދަންކަމަށް ދޭހަވާ ގޮތަށް ފައްޔާޒު ވާހަކަ ކުރިއަށް ގެންދަވަމުން ވިދާޅުވީ ވެރިކަން ލިބިއްޖެ ނަމަ އެކަން ބަދަލުކުރައްވާނެ ކަމަށެވެ.
" އަޅުގަނޑުމެންގެ ވެރިކަމެއްގައި އެފަދަ ގޮތަކަށް އެކަހަލަ އަމަލެއް ނުކުރާނަން. އަދި އެގޮތަށް ހުރި ކަންކަން ބަދަލުކުރާނެކަން." ފައްޔާޒު ވިދާޅުވިއެވެ.
އެހެންނަމަވެސް މިސަރުކާރުން ދުންފަތުގެ އަގުބޮޑުކުރުމުގެ އިތުރުން އެކަމުން ދުރުވާން ބޭނުންވާ ފަރާތްތަކަށް އެހީތެރިވުމުގެ މަސައްކަތްވެސް ވަނީ ފައްޓަވާފައެވެ. އެގޮތުން ދުންފަތުން ދުރުވުމަށް ބޭނުންވާ ފަރުވާ އާސަންދަ ނިޒާމްގެ ތެރެއިން ކުރެވޭނެ ގޮތް ވަނީ ހަމަޖައްސަވާފައެވެ. އަދި ދުންފަތާ ދުރުހެލިކުރަން މަސައްކަތް ކުރާ ކައުންސިލްތަކަށް ހިތްވަރާއި, އެހީތެރިކަން ދިނުމާއި, އެކަމުގައި އެންމެ ރަނގަޅަށް މަސައްކަތްކުރާ ކައުންސިލްތަކާއި, ރަށްތައް ފާހަގަކުރަންވެސް ވަނި ނިންމާފައެވެ. އަދި ދުރު ރާސްތާ ޕްލޭނެއް އެކުލަވާލުމުގެ މަސައްކަތްވެސް ވަނީ ފަށާފައެވެ. ހެލްތް މިނިސްޓަރ އަބްދުالله ނާޒިމް އިބްރާހީމް ވިދާޅުވީ ދުންފަތާ ދުރުކުރުމުގެ މަސައްކަތަށް ބޭނުންވާ މީހުން ބިނާކުރުމުގެ މަސައްކަތްވެސް ފައްޓަވާފައިވާ ކަމަށެވެ.
ސަރުކާރުން ދުންފަތުގެ އަގުބޮޑުކޮށް, އީސިގިރޭޓާއި, އޭގެ ބައިތައް އެތެރެކުރުން މަނާކުރީ ބެލެނިވެރިންނާއި, ކުޅިވަރު އެސޯސިއޭޝަންތަކާއި, ސިއްހީ ދާއިރާގެ ބޭފުޅުންވެސް ވޭޕް ހުއްޓުވުމަސް ގޮވާލުމުންނެވެ.
މިމަހުގެ 15 ން ފެށިގެން ރާއްޖޭގައި ވޭޕް ބޭނުން ކުރުންވެސް މަނާވާނެއެވެ. ދުންފަތް އަގުބޮޑުކޮށް, ވޭޕް ބޭނުންކުރުން މަނާކުރުމަކީ އެކަމުން ދިވެހި ރައްޔިތުން ދުރުކުރުމަށް އެޅުއްވި ފިޔަވަޅެއް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ތަކުރާރުކޮށް ވިދާޅުވެފައެވެ.
ރިއެކްޝަންސް
