ރާއްޖެ އެތެރެކުރަން އުޅުނު 11 ކިލޯއަށް ވުރެ ގިނަ މަސްތުވާތަކެތި އަތުލައިގެންފި
ކޫރިއަރ މެދުވެރިކޮށް ރާއްޖެއަށް އެތެރެކުރަން އުޅުނު 11 ކިލޯއަށް ވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
ކަސްޓަމްސްއިން ހާމަކުރި ގޮތުގައި މި އޮޕަރޭޝަނުގައި އަތުލައިގެންފައިވަނީ ޖުމްލަ 11.75 ކިލޯގެ ކެނަބިސް (ހަޝީޝް އޮއިލް/މެރިޖުއާނާ) އެވެ. މި ތަކެތި އަތުލައިގަނެފައިވަނީ ކޫރިއަރ ސަރވިސް މެދުވެރިކޮށް ރާއްޖެ ގެނެސްފައިވާ ދެ ޕެކޭޖެއް ޗެކްކުރުމުގެ ތެރޭގައެވެ.
އެ އިދާރާއިން ވިދާޅުވީ، މި ޕެކޭޖުތައް ބަލާފާސްކުރަމުންދިޔަ ވަގުތު އޭގެ ތެރޭގައި މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން، އިތުރަށް ތަހުލީލުކޮށް ބެލިއިރު މަސްތުވާތަކެއްޗަށް ޕޮޒިޓިވް ވެފައިވާ ކަމަށެވެ. އަދި ބަލައި ފާސްކުރި ދެ ޕެކޭޖުގެ ތެރެއިން ވެސް ގިނަ އަދަދެއްގެ މަސްތުވާތަކެތި ފެނިފައިވާ ކަމަށް ކަސްޓަމްސްއިން މައުލޫމާތު ދެއެވެ.
މި މައްސަލައާ ގުޅިގެން އަތުލައިގަނެވުނު މަސްތުވާތަކެތި މިހާރު ވަނީ އިތުރު ތަހުގީގަށް ދިވެހި ފުލުހުންގެ ޚިދުމަތާ ހަވާލުކޮށްފައެވެ. ރާއްޖެއަށް މަސްތުވާތަކެތި އެތެރެވުން ހުއްޓުވުމަށްޓަކައި ވައިގެ މަގުންނާއި ކަނޑުމަގުން އަދި ޕޯސްޓާއި ކޫރިއަރ މެދުވެރިކޮށް ގެންނަ ތަކެތި ފާސްކުރުމުގެ މަސައްކަތް ކަސްޓަމްސްއިން ދަނީ ވަރަށް ހާއްސަ ސަމާލުކަމެއް ދީގެން ކުރަމުންނެވެ.
ރިއެކްޝަންސް
