ރަސްމާލޭ މަޝްރޫޢުގައި ޤާނޫނާ ޚިލާފު އެއްވެސް ކަމެއް ނުކުރާނެ: ބަންޑާރަނައިބު

ރަސްމާލޭގައި އަބޫދާބީގެ އީގަލް ހިލްސް ކުންފުނިން ކުރިއަށްގެންދާ ބިޔަ މަޝްރޫޢުގައި ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ނުކުރާނެ ކަމުގެ ފުރިހަމަ ޔަޤީންކަން ބަންޑާރަނައިބު އަލްއުސްތާޛް އަޙްމަދު އުޝާމް ދެއްވައިފިއެވެ.

ބަންޑާރަނައިބު މިހެން ވިދާޅުވީ، ރަސްމާލެއިން ބައެއް ބޭރުގެ ފަރާތަކަށް ވިއްކާލީ ކަމަށް ތުހުމަތުކޮށް އިދިކޮޅު ފަރާތްތަކުންނާއި ސޯޝަލް މީޑިއާގައި ދައްކަމުންދާ ވާހަކަތަކަށް ރައްދުދެއްވައި ހިއްސާކުރެއްވި މެސެޖެއްގައެވެ.

ރަސްމާލޭގައި 20 ބިލިޔަން ޑޮލަރުގެ އަގުހުރި ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" އާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކުރީ މި ހިނގާ މަހުގެ 21 ވަނަ ދުވަހުއެވެ. މި އެއްބަސްވުމުގެ ދަށުން ރަސްމާލެއިން 500 ހެކްޓަރުގެ ބިން 99 އަހަރަށް އެ ކުންފުންޏަށް ކުއްޔަށް ދިނުމަށް ނިންމާފައިވާއިރު، އިދިކޮޅު ފަރާތްތަކުން ދަނީ އެއީ ޤާނޫނާ ޚިލާފަށް ބިން ވިއްކާލުން ކަމަށް ބުނެ ސަރުކާރަށް ފާޑުކިޔަމުންނެވެ.

މި ތުހުމަތުތަކާ ގުޅިގެން ބަންޑާރަނައިބު އުޝާމް ވިދާޅުވީ، ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނު 1999 ވަނަ އަހަރު ރިސޯޓުތައް ކުއްޔަށް ދެމުން އައީ ގިނަވެގެން 25 އަހަރަށް ކަމަށެވެ. ނަމަވެސް ޤާނޫނަށް ގެނެވުނު އިސްލާހުތަކާއެކު 2010 ވަނަ އަހަރު އެ މުއްދަތު 50 އަހަރަށް، އަދި 2015 ވަނަ އަހަރު 99 އަހަރަށް އިތުރުކޮށްފައިވާކަން އެމަނިކުފާނު ފާހަގަކުރެއްވިއެވެ. މީގެ އިތުރުން، ޓޫރިޒަމާބެހޭ ޤާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓް ރިސޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓުގެ އަގުން ބާކީވާ މިންވަރު ބެލުމަށްފަހު ޖެހޭ އަގު އިންވެސްޓަރަށް ސަރުކާރުން ދައްކަންޖެހޭ ކަމަށްވެސް ވިދާޅުވިއެވެ.

ރަސްމާލެ މަޝްރޫޢުގެ ތަފްސީލު ހާމަކުރައްވަމުން ބަންޑާރަނައިބު ވިދާޅުވީ، މި މަޝްރޫޢު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. އަދި މި މަޝްރޫޢާ ގުޅިގެން މިހާތަނަށް ސޮއިކޮށްފައިވަނީ ހަމައެކަނި ލެޓަރ އޮފް އިންޓެންޓް (އެލްއޯއައި) ނުވަތަ ކޮމާޝަލް ޓާރމްސް އެގްރީމެންޓެއްގައި ކަމަށާއި، ޢަމަލީ މަސައްކަތް ފެށުމުގެ ކުރިން އެ އެއްބަސްވުމުގައިވާ ކަންކަމުގެ މައްޗަށް ބިނާކޮށް އިތުރަށް މަޝްވަރާކޮށްގެން ފުރިހަމަ އެއްބަސްވުމެއް އެކުލަވާލެވޭނެ ކަމަށް ވިދާޅުވިއެވެ.

އަދި ހަމައެއާއެކު، މި މަޝްރޫޢާ ގުޅުންހުރި މުހިންމު ޤާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށާއި، މި ހުރިހާ މަރުޙަލާއެއްވެސް ކުރިއަށްދާނީ ޤާނޫނުގެ އިމުގެ ތެރެއިން ކަމަށް ބަންޑާރަނައިބު ވިދާޅުވިއެވެ. އުޝާމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ނުކުރައްވާނެ ކަމުގެ ފުރިހަމަ ޔަޤީންކަން ރައްޔިތުންނަށް ދެއްވާފައެވެ.