ތެލެސީމިއާ ކޮންޓްރޯލް ކުރުމުގެ ބިލް ތަސްދީޤު ނުކުރައްވާ އަނބުރާ ފޮނުވާލައްވައިފި
ފޮނުވާލެއްވީ އަލުން އިސްލާހުކުރުމަށް
ތެލެސީމިއާ ކޮންޓްރޯލް ކުރުމުގެ ބިލް ތަސްދީޤު ނުކުރައްވާ, ރައްޔިތުންގެ މަޖިލީހުން އަލުން ވިސްނާވަޑައިގަތުމަށް އެދިވަޑައިގެން އަނބުރާ ފޮނުވާލައްވައިފި އެވެ.
ރައީސުލްޖުމްހޫރިއްޔާ މި ބިލު އަނބުރާ މަޖިލީހަށް ފޮނުއްވަން ނިންމެވީ، ބިލަށް އިތުރު އިޞްލާޙުތަކެއް ގެނައުމަށް މޯލްޑިވިއަން ބްލަޑް ސަރވިސަސް އާއި ތެލަސީމިއާ ބަލި ތަހައްމަލު ކުރަމުންދާ ފަރާތްތަކާއި އެ ފަރާތްތަކުގެ ޢާއިލާތަކުން ބައެއް ހުށަހެޅުންތައް ލިބިވަޑައިގެންފައިވާތީ ކަމަށް ރައީސް އޮފީހުން ވިދާޅުވިއެވެ.
ބިލް އަނބުރާ ފޮނުވާލެއްވީ ތެލަސީމިއާ ބަލި ތަހައްމަލު ކުރަމުންދާ ފަރާތްތަކަށް ފޯރުކޮށްދޭ ޚިދުމަތްތަކަކީ ވަށާޖެހިފައިވާ ޤައުމީ ނިޒާމެއްގެ ތެރެއިން ފޯރުކޮށްދެވޭ ޚިދުމަތަކަށް ހެދުމަށްޓަކައި ޤާނޫނުގައި ބަޔާންކުރާ މަގުސަދުތައް ވީހާވެސް ފުރިހަމަކަމާއެކީ ހާސިލުކުރެވޭނެ ގޮތަށް އެ ބިލު މުރާޖާކުރައްވައި ބިލަށް އިޞްލާޙު ގެންނަވަން ފެނިވަޑައިގަންނަވާތީ ކަމަށް ރައީސް އޮފީހުން ވިދާޅުވިއެވެ.
ތެލަސީމިއާ ކޮންޓްރޯލްކުރުމުގެ ޤާނޫނު އަށް އިސްލާހު ގެނައުމުގެ ބިލަކީ، މިމަހުގެ ހަވަނަ ދުވަހު އޮތް، ރައްޔިތުންގެ މަޖިލީހުގެ ޖަލްސާއިން ފާސްކުރައްވައި، ތަޞްދީޤުކުރެއްވުމަށް ރައީސުލްޖުމްހޫރިއްޔާއަށް ފޮނުއްވާފައިވާ ބިލެކެވެ.
ރިއެކްޝަންސް
