މެލޭޝިއާގެ ކުރީގެ ބޮޑުވަޒީރުގެ އަނބިކަނބަލުން އަވަހާރަވުމާ ގުޅިގެން، ރައީސް ތަޢުޒިޔާ ފޮނުއްވައިފި

މެލޭޝިއާގެ ކުރީގެ ބޮޑުވަޒީރު އޮނަރަބަލް ޑޮކްޓަރ މަހާތީރު މުޙައްމަދުގެ އަނބިކަނބަލުން، ޑޮކްޓަރ ސިޓި ޙަސްމާ މުޙަައްމަދު ޢަލީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، އެކަމަނާއަކީ މެލޭޝިއާގައި އުފެދުނު އެންމެ ފުރަތަމަ އަންހެން ޑޮކްޓަރުންގެ ތެރޭގައި ހިމެނިވަޑައިގަންނަވާ ބޭފުޅެއް ކަމަށާ، މައިންގެ ޞިއްޙަތާއި، ރަށްފުށު ހިސާބުގައި ދިރިއުޅޭ އަންހެނުންގެ ތަރައްޤީއަށް މަސައްކަތްކުރެއްވި ބޭފުޅެއްކަމުގައި ވިދާޅުވެފައިވެއެވެ. އަދި އޭގެ ސަބަބުން މި ހިތާމަވެރި ދަނޑިވަޅުގައި، އެކަމަނާ ޒިކުރާކުރެވިގެންދާނީ ޝުކުރުވެެރިކަމާއި ޤަދަރުވެރިކަމާއެކު ކަމަށްވެސް އެމަނިކުފާނު ވިދާޅުވިއެވެ. މީގެ އިތުރުން، މިންތީގެ ހަމަހަމަކަން ޤާއިމްކުރުމާައި، އާއިލާތަކުގެ ފުދުންތެރިކަން އިތުރުކުރުމަށް އެކަމަނާގެ އިސްނެންގެވުމާއެކު ހިންގުނު ކާމިޔާބު މަޝްރޫޢުތަކަށްވެސް ރައީސުލްޖުމްހޫރިއްޔާގެ މެސެޖުގައި އަލިއަޅުއްވާލައްވާފައިވެއެވެ. އެފަދަ މަޝްރޫޢުތަކުން، އެކަމަނާ މުޖުތަމަޢަށް ކޮށްދެއްވާފައިވާ ޚިދުމަތްތަކާއި އަންނަން އޮތް ޖީލުތައް ބާރުވެރިކުރުމުގައި އަދާކުރައްވާފައިވާ ދައުރު ފެނިގެންދާ ކަމަށްވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، މެލޭޝިއާގެ ކުރީގެ ބޮޑުވަޒީރަށާއި އެމަނިކުފާނުގެ ޢާއިލާއަށް އިޚްލާޞްތެރި ތަޢުޒިޔާ އަރިސްކުރައްވާފައިވެއެވެ. އަދި، ޚިދުމަތްތަކުގެ ހަނދާންތަކުން މަރުޙޫމްގެ ޢާއިލާއަށް ހިތްވަރާއި ތަސައްލީ ލިބި، މި ހިތާމައިގައި ބައިވެރިވާ އެންމެހާ ފަރާތްތަކަށް، ކެތްތެރިކަން ދެއްވުމަށް އުންމީދުކުރައްވާ ކަމުގައިވެސް ރައީސުލްޖުމްހޫރިއްޔާ ވިދާޅުވެފައި ވެއެވެ.

އެމަނިކުފާނުގެ މެސެޖުގައި، މަރުޙޫމްގެ ހަޔާތާއި، ޚިދުމަތާއި، އުޞޫލުތަކުގެ ޒިކުރާއިން ހިތްވަރާއި ތަސައްލީ ލިބި، މި ހިތާމައިގައި ބައިވެރިވާ މެލޭޝިއާގެ އެންމެހާ ރައްޔިތުންނަށް، ކެތްތެރިކަން ލިބުމަށް އުންމީދުކުރައްވާ ކަމަށްވެސް ވިދާޅުވިއެވެ. ރައީސުލްޖުމްހޫރިއްޔާގެ މެސެޖު ނިންމަވާލައްވަމުން، ކުރީގެ ބޮޑުވަޒީރު އޮނަރަބަލް ޑޮކްޓަރ މަހާތީރު މުޙައްމަދުގެ އަނބިކަނބަލުން، ޑޮކްޓަރ ސިޓި ޙަސްމާ މުޙަައްމަދުގެ ފުރާނަފުޅަށް، ރަޙްމަތްލައްވައި، ސުވަރުގޭގެ އެންމެ މަތީ ދަރަޖަ ދެއްވުމަށް އެދިވަޑައިގެން މާތް ﷲގެ ޙަޟްރަތުގައި ދުޢާ ދަންނަވާފައި ވެއެވެ.