ރަސްމާލެ މަޝްރޫއުގައި ދިވެހިންގެ ފުރިހަމަ އިތުބާރު އީގަލް ހިލްސްއަށް އެބައޮތް: މުހައްމަދު އަލްއައްބާރު

ދިވެހިރާއްޖޭގެ ތާރީޚުގައި ހިންގާ އެންމެ ބޮޑު އިންވެސްޓްމަންޓް މަޝްރޫއު ކުރިއަށް ގެންދިއުމުގައި ދިވެހި ރައްޔިތުންގެ ފުރިހަމަ އިތުބާރު އެ ކުންފުންޏަށް އެބައޮތް ކަމަށް ޔުނައިޓެޑް އަރަބް އެމިރޭޓްސް (ޔޫއޭއީ) ގެ މަޝްހޫރު އީގަލް ހިލްސް ކުންފުނީގެ ޗެއާމަން މުހައްމަދު އަލްއައްބާރު ވިދާޅުވެއްޖެ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރަސްމާލޭގައި "މޯލްޑިވްސް ވޯޓާފްރަންޓް އެންޑް މެރީނާ" ގެ ނަމުގައި ބޮޑު މަޝްރޫއެއް ހިންގުމަށްޓަކައި އީގަލް ހިލްސް ކުންފުންޏާއެކު ކޮމާޝަލް ޓާމްސް އެގްރީމަންޓެއްގައި ސޮއިކުރީ މިދިޔަ ހަފްތާގަ އެވެ. މި މަޝްރޫއުގެ ދަށުން ރަސްމާލެއިން 500 ހެކްޓަރުގެ ބިން އެ ކުންފުންޏަށް ދިނުމަށް ވަނީ ނިންމާފަ އެވެ. ނަމަވެސް، މި އެއްބަސްވުމާ ގުޅިގެން ރާއްޖޭގެ ބައެއް ސިޔާސީ ލީޑަރުން ވަނީ ކަންބޮޑުވުން ފާޅުކުރައްވާފަ އެވެ.

މަޝްރޫއު ނިމުމުން އެ ސަރަހައްދު ފެންނާނެ ގޮތް ދައްކުވައިދޭ އޭއައި ވީޑިއޯއަކާއެކު އިންސްޓަގްރާމްގައި ހިއްސާކުރެއްވި މެސެޖެއްގައި އަލްއައްބާރު ވިދާޅުވީ، ރާއްޖެއަކީ ދުނިޔޭގެ އެންމެ ރީތި ޗުއްޓީ މަންޒިލް ކަމަށާއި، މިތަނަކީ ދިރިއުޅެން ވެސް އެންމެ ހިތްގައިމު ތަނަކަށް ނުވާންވީ އެއްވެސް ސަބަބެއް ނެތް ކަމަށެވެ. އަދި މި މަޝްރޫއަކީ ހިތްގައިމު ގޮނޑުދޮށްތަކާއި، ރެސްޓޯރެންޓްތަކާއި، ހޮޓާތަކުގެ އިތުރުން ކުޅިވަރާއި ކުޑަކުދިންނަށް ޚާއްސަ ވަސީލަތްތައް ހިމެނޭހެން ފުރިހަމަ ދިރިއުޅުމެއް އާރާސްތުކުރެވޭނެ ގޮތަށް ފަރުމާކުރެވޭ ތަނެއްކަން އޭނާ ފާހަގަކުރެއްވި އެވެ.

އަލްއައްބާރު އިތުރަށް ވިދާޅުވި ގޮތުގައި މި ރިއަލް އެސްޓޭޓް މަޝްރޫއުން ލިބޭނެ އާމްދަނީ އާއި މަންފާ ވެގެންދާނީ ދުނިޔޭގެ ނިސްބަތުން ވެސް އެންމެ ފައިދާބޮޑު އެއް އިންވެސްޓްމަންޓަށެވެ.

ސަރުކާރުން އަންދާޒާކުރާ ގޮތުގައި މި މަޝްރޫޢުގެ ފުރަތަމަ އަހަރު 12 ބިލިއަން ޑޮލަރު، އަދި އޭގެ ފަހުން އަހަރަކު 2 ބިލިއަން ޑޮލަރުގެ އިންވެސްޓްމަންޓް ރާއްޖެއަށް ވަންނާނެ އެވެ. މީގެއިތުރުން، ދަޢުލަތަށް ސީދާ އާމްދަނީގެ ގޮތުގައި 11 ބިލިއަނަށްވުރެ ގިނަ ޑޮލަރު ލިބި، 54،000 އަށްވުރެ ގިނަ ވަޒީފާ އުފެދިގެންދާނެ ކަމަށް ވެސް ސަރުކާރުން ލަފާކުރެ އެވެ. މި މަޝްރޫޢު އެއްކޮށް ނިމުމުން، އަހަރަކު އެއް މިލިއަން ފަތުރުވެރިން އެ ސަރަޙައްދަށް ޒިޔާރަތްކުރާނެ ކަމަށް ބެލެވެ އެވެ.