ރާއްޖޭގައި މަސްތުވާތަކެތީގެ ވިޔަފާރިކުރާ 24 ނެޓްވޯކެއްގެ މައްސަލަ ބަލަނީ: މިނިސްޓަރ އިޙުސާން

ރާއްޖޭގައި މަސްތުވާތަކެތީގެ ވިޔަފާރިކުރަމުންދާ 24 ޑްރަގް ނެޓްވޯކެއްގެ މައްސަލަ ފުލުހުން ބަލަމުންދާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ސަރުކާރުން ބޭއްވި "އަހާ" ފޯރަމްގައި ވާހަކަދައްކަވަމުން ވަޒީރު ވިދާޅުވީ، ސަރުކާރުގެ މައިގަނޑު އަމާޒަކީ މަސްތުވާތަކެތި ބޭނުންކުރާ ފަރާތްތަކަށް ފަރުވާ ދިނުމާއެކު، ރާއްޖެއަށް އެތެރެކުރާ މަސްތުވާތަކެތީގެ ސަޕްލައި އެއްކޮށް ހުއްޓުވުން ކަމަށެވެ. އެގޮތުން، ވޭތުވެދިޔަ ދެ އަހަރާއި ބައިގެ ތެރޭގައި 1.3 ޓަނުގެ މަސްތުވާތަކެތި އަތުލައިގަނެވިފައިވާ ކަމަށާއި، އޭގެ މަގުމަތީ އަގު 1.5 ބިލިއަން ދިވެހި ރުފިޔާއަށް އަރާ ކަމަށް ވަޒީރު ވިދާޅުވިއެވެ. މިއީ ކުރީ ސަރުކާރުތަކުގެ ފުރަތަމަ ތިން އަހަރާ އަޅާބަލާއިރު ރެކޯޑު އަދަދެކެވެ.

"ޑްރަގް ވިއްކައިގެން ރައްޔިތުން ހާލުގައި ޖައްސާފައި ކުރާނެ ވިޔަފާރިއެއް ދެން ރާއްޖެއަކު ނޯންނާނެ. ޑްރަގްގެ ވިޔަފާރިކުރާ މައްސަލަތަކާ ގުޅިގެން 3.6 މިލިއަން ދިވެހި ރުފިޔާ އާއި 48،000 ޑޮލަރު ކޭޝްގެ ގޮތުގައި ވަނީ ނެގިފައި. އަދި އެތައް ހާސް ޑޮލަރަކާއި ރުފިޔާއެއްގެ މުދާ ވެސް ވަނީ ދައުލަތުގެ ބެލުމުގެ ދަށަށް ގެނެވިފައި،" ވަޒީރު ވިދާޅުވިއެވެ.

މީގެއިތުރުން، ޑްރަގް ކެފޭތައް ހިންގުމަކީ ބޮޑު ގޮންޖެހުމެއްކަން ފާހަގަކުރައްވަމުން ވަޒީރު ވިދާޅުވީ، ބައެއް ތަންތަން ބަންދުކުރުމުން ޖެހިގެން އަންނަ ދުވަހު އަލުން ހުޅުވައިގެން ވިޔަފާރިކުރާތީ އެއް ތަނަކަށް 150 ފަހަރު ވެސް ރެއިޑްކޮށްފައިވާ ކަމަށެވެ. އެހެންކަމުން، މިކަން ހައްލުކުރުމަށް ޤާނޫނަށް އިސްލާޙު ގެނެސްގެން އެފަދަ ތަންތަން ދާއިމީކޮށް ބަންދުކުރުމުގެ މަސައްކަތް ކުރަމުންދާ ކަމަށް ވިދާޅުވިއެވެ.

ފާއިތުވި ތިން-ހަތަރު މަސްދުވަހުގެ ތެރޭގައި ޑްރަގް ކެފޭގެ ގޮތުގައި ބޭނުންކުރަމުންދިޔަ 17 ތަނެއް ވަނީ ބަންދުކޮށްފައެވެ. އޭގެ ތެރޭގައި މާލޭގެ 12 ތަނަކާއި، އައްޑޫ ސިޓީގެ 4 ތަނެއްގެ އިތުރުން ފުވައްމުލަކު ސިޓީގެ ތަނެއް ހިމެނެއެވެ. ސަރުކާރުގެ އަމާޒަކީ މިއަހަރުގެ ނޮވެމްބަރު މަހާ ހަމައަށް މާލޭގައި ހިންގާ ހުރިހާ ޑްރަގް ކެފޭތައް އެއްކޮށް ބަންދުކޮށް ނިންމުމެވެ.

ގޭންގް ކުށްތަކާއި އެހެނިހެން ކުށްތައް ހުއްޓުވުމަށް އެޅި ފިޔަވަޅުތަކަށް އަލިއަޅުއްވާލައްވަމުން ވަޒީރު ވިދާޅުވީ، ގޭންގުތަކަށް އަމާޒުކޮށްގެން ހިންގި 52 އޮޕަރޭޝަނެއްގައި 10،450 މީހުން ޗެކްކޮށް، 517 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި އެ މީހުންނާ ގުޅުންހުރި 770 ސައިކަލު ވެސް ވަނީ ފުލުހުންގެ ބެލުމުގެ ދަށަށް ގެނެސްފައެވެ. މީގެއިތުރުން، ކުށްކުރާ ސަރަޙައްދުތަކުގައި ފުލުހުން ހަރަކާތްތެރިވާ މިންވަރު އިތުރުކޮށް، އެފަދަ ފަރާތްތައް އަނބުރާ މުޖުތަމަޢަށް ގެނައުމަށް ވެސް ޚާއްޞަ މަސައްކަތްތަކެއް ކުރަމުންދާ ކަމަށް ވަޒީރު ފާހަގަކުރެއްވިއެވެ.