އިޒްރާއިލްއިން ޣައްޒާގައި އެއްގަމުމަގުން ހަމަލާތައް ވަރުގަދަކޮށްފި, ބިމުގެ ބޮޑުބައެއް ހިފާނެ ކަމަށްވެސް އިއުލާންކޮށްފި
އިޒްރާއިލްއިން ޣައްޒާގައި އެއްގަމު މަގުންދޭ އަސްކަރީ ހަމަލާތައް ވަރުގަދަކޮށް, 'ބިމުގެ ބޮޑު ބައެއް ހިފާނެ ކަމަށް' އިޒްރާއިލްގެ ދިފާއީ ވަޒީރު, އިޒްރާއިލް ކަޓްޒް ބުނެފިއެވެ. އޭނާ ބުނީ ހިފާ ބިންތައް އިތުރުވެގެންދާނީ ބަފަރ ޒޯންގެ ބައެއްގެ ގޮތުގައި ކަމަށެވެ.
އިޒްރާއިލްއިން ހުއްޓުމެއްނެތި ޣައްޒާއަށް ދެމުންގެންދާ ވައިގެ ހަމަލާތަކުގައި ހެނދުނުން ފެށިގެން މިއަދުގެ މިހާތަނަށް 17 މީހަކު ވަނީ ޝަހީދުކޮށްލާފައެވެ. ޣައްޒާއަށް ކާބޯތަކެތީގެ އެއްވެސް މިންވަރެއް ވަނުން މާޗު މަހުން ފެށިގެން ހުއްޓުވާފައިވާއިރު އދ ގެ ވޯލްޑް ފުޑް ޕްރޮގްރާމްއިން ހިންގާ 25 ބޭކަރީއެއްވެސް މިހާރު ވަނީ ސަޕްލައި ނުލިބި ބަންދުކޮށްފައެވެ. އިންސާނީ އެހީ ނުލިބި 31 ދުވަސް ވެފައި ވާއިރު މިއީ ޤައުލްއާންމު ފެށިފަހުން އެއްވެސް މިންވަރަކަށް އެހީގެ ތަކެތި ނުވަދެ މިހާބޮޑަށް ދިގުލައިގެންދިޔަ ފުރަތަމަ ފަހަރެވެ.
އިޒްރާއިލްއިން ވަނީ މުޅި ޣައްޒާ ދޫކޮށްދިއުމުގެ އަމުރުތަކެއް ފުލުފުލުގައި ނެރެފައެވެ. މިއާއެކު ހަޔާތެއް އެއްތަނުން އަނެއްތަނަށް ބަދަލުވުމުގައި ތިބި ފަލަޞްޠީނުގެ ރައްޔިތުން ތިބީ ވަރުބަލިވެ އުއްމިދު ގެއްލިފައެވެ. އަމުރުތައް އައުމާއެކު ގެންގުޅޭ މަދު ސާމާނުކޮޅެއް ޕެކް ކޮށްލައިގެން އަނެއްކާވެސް ބޯހިޔާވަހިކަމެއް ލިބޭތޯ އެމީހުން ދަތުރުފަށައެވެ. ބައެއް މީހުންނަށް މިހާރު އެއްތަނުން އަނެއްތަނަށް ދިއުމަކީވެސް ބޮޑު ވޭނެކެވެ.
އުތުރު ޣައްޒާގެ ޖަބާލިއާއިން ނިކުތުމަށް އެންގުމާއެކު ސުލައިމާން އާއި އޭނާގެ އާއިލާ ނިކުތީ މަދު ކާނާ ކޮޅަކާއި ދެތިން ރަޖައެއް ހިފައިގެން މާޗު 19 ވަނަ ދުވަހުއެވެ. މިއީ އެމީހުން ފާއިތުވި 18 މަސްދުވަހުގެ ތެރޭގައި އެއްތަނުން އަނެއްތަނަނަށް ބަދަލުވާ 8 ވަނަ ފަހަރެވެ.
"މިތާގައި މިހާރު ދިރިއުޅުމުގެ ރަހައެއް ނެތް. ދިރިހުރުމާއި މަރަކީ މިތާގައި މިހާރު ހަމަ އެކައްޗެއް" ކުރީގެ ޔުނިވަރސިޓީ ޕްރޮފެސަރެއް ކަމަށްވާ ސުލައިމާން އަލްޖަޒީރާއަށް ބުންޏެވެ.
ސުލައިމާން އަކީ ހަމަލާތައް ހުއްޓާލުމުގެ އެއްބަސްވުމާއެކު ވަގުތީ ހިޔާތަކުން އުތުރު ޣައްޒާއަށް ބަދަލުވި އެތައްހާސް ބައެއްގެ ތެރެއިން އެކަކެވެ. ވަރުބަލިކަމާއި ދާނެ ވަކިތަކެއް ނެތުމާއި އެކު ގިނަ ރައްޔިތުން މިހާރު އިޒްރާއިލްގެ އަމުރުތަކަށް އަޅައެއް ނުލައެވެ. އެއީ އެމީހުންގެ ދިރުއުޅުން ހިރާހަކަށް ވައްޓާލަންޖެހުނަސް އެނޫން ގޮތެއްވެސް ނެތީމައެވެ.
ޣައްޒާއަށް އިންސާނީ އެހީ ވަނުން ހުއްޓުވާފައިވާއިރު ޓެންޓާއި އެހެނިހެން ވަގުތީ ބޯހިޔާވަހިކަން ހޯދޭނެ ހަމައެއްވެސް ގޮތެއް ޣައްޒާގައި މިހާރު ނެތެވެ. ގިނަ ބަޔަކު އެއްތަނުން އަނެއްތަނަށް ދަނީވެސް ގާތްގަނޑަކަށް ހުސްއަތާއެވެ.
"އަހަރެމެން ދާނީ ކޮންތާކަށް!އަހަރެމެން ބޭނުމީ ދިރިހުންނަށް. އެކަމަކު އަހަރެމެން ވަރުބަލިވެއްޖެ. ކާއެއްޗެސް ލިބޭތޯވެސް ހާދަ ބޮޑެތި ކިއޫ ތަކެކޭ" ރަފަޙްއިން މެދުތެރެއަށް ހިނގަމުން އަންނަ ހަނާދި ދަދޯދް ބުންޏެވެ.
ރިއެކްޝަންސް
