ސަކާގެ އެނބުރިއައުން ރީތި ގޯލަކާއެކު އާސެނަލްއަށް މޮޅެއް, ކްލަބަށް އަނެއްކާވެސް އަނިޔާގެ ހިޔަނި!
ގިނަ ދުވަސްތަކެއްވަންދެން އަނިޔާގައި ހުރި ބުކާޔޯ ސަކާ އެނބުރި އައިސް ކުޅުނު ފުރަތަމަ މެޗުގައި ކާމިޔާބުކޮށްދިން ހިތްގައިމު ގޯލުން އާސެނަލް އާއި ފުލަމް ބައްދަކު މެޗުން އާސެނަލް މޮޅުވެއްޖެއެވެ. ނަމަވެސް ކްލަބަށް އަނެއްކާވެސް ވަނީ އަނިޔާގެ ހިޔަނި އެޅިފައެވެ. ޕްރިމިއަރ ލީގުގައި އާސެނަލް އިން ފުލަމްގެ މައްޗަށް ކުރިހޯދީ 2-1 ންނެވެ.
ރޭގެ މެޗުގައި އާސެނަލްގެ ސެންޓަރ ބެކް ގެބްރިއެލް މަގަޅީސްގެ ފައިގެ ފަލަމަސްގަނޑަށް ލިބުނު އަނިޔާއާ ގުޅިގެން 16 ވަނަ މިނިޓްގައި އޭނާ ވަނީ ބަދަލުކޮށްފައެވެ. ޗެޕްމިއަންސް ލީގުގެ ކުއާޓަރ ފައިނަލްގައި އާސެނަލް އަންނަ ހަފުތާގައި ރެއާލް މެޑްރިޑް އާ ވާދަކުރަން ހަމަޖެހިފައިވާއިރު ގެބްރިއެލްއަށް ދިމާވި ހާލަތާއެކު ކޯޗު މިކޭލް އާޓެޓާ ވަނީ ނުތަނަވަސްވެފައެވެ. އާސެނަލްގެ ފޯވާޑް ކައި ހަވާޓްޒްއަށްވެސް އަނިޔާވެ އޭނާއަށް ސީޒަން ވަނީ ނިމިފައެވެ. ސަކާ އެނބުރި ކުޅުމުގެ ތެރެއަށް އައިސްފައިވަނީ 101 ދުވަހު ކުޅުމާ ދުރުގައި ހުރުމަށްފަހުއެވެ.
ރޭގެ މެޗުގައި ކަކުލަށް ލިބުނު އަނިޔާއަކާ ގުޅިގެން އާސެނަލްގެ ޑފެންޑަރު ހުރެއިން ޓިމްބަރ ވެސް ވަނީ ބަދަލުކޮށްފައެވެ. ބެން ވައިޓް އަދި ރިކާޑޯ ކަލަފިއޯރީ ވެސް މިވަގުތު ތިބީ އަނިޔާގައެވެ.
ރޭގެ މެޗުގައި އާސެނަލް އަށް 37 ވަނަ މިނިޓްގައި ލީޑް ނަގައިދިނީ މިކޭލް މެރީނޯއެވެ. އެއީ އީތަން ވަނޭރީ ތަނަވަސްކޮށްދިން ފުރުޞަތުގައެވެ. މެޗުގައި އާސެނަލްގެ ދެވަނަ ގޯލް 73 ވަނަ މިނިޓްގައި ސަކާ ކާމިޔާބުކޮށްދިނީ ހުރެއިން ޓިމްބަރ ތަނަވަސްކޮށްދިން ފުރުޞަތުގައެވެ.
މެޗުގެ ފުރިހަމަ ވަގުތު ނިމި އިތުރު ވަގުތުގެ ހަތަރު ވަނަ މިނިޓްގައި ފުލަމްއިންވަނީ ގޯލެއްޖަހާ ނަތީޖާގެ ފަރަގު ކުޑަކޮށްފައެވެ. ފުލަމްގެ ގޯލް ކާމިޔާބުކޮށްދިނީ ރޮޑްރީގޯ މުނިޒްއެވެ.
ލީގުގައި ރޭ ކުޅުނު އިތުރު މެޗުތަކަށް ބަލާއިރު ނޮޓިންގްހަމް ފޮރެސްޓުން މެންޗެސްޓަރ ޔުނައިޓަޑްގެ މައްޗަށް ކުރިހޯދީ 1-0 ންނެވެ. ވުލްވްސްއިން ވެސްޓްހެމް ބަލިކުރީވެސް ހަމަ އެނަތީޖާއިންނެވެ.
ފޮރެސްޓްގެ މި ކާމިޔާބީއާއެކު އެ ކްލަބުންވަނީ ފަސްވަނަ ފަހަރަށް ޗެމްޕިއަންސް ލީގަށް ކޮލިފައިވުމުގެ އުއްމީދު އާކޮށްފައެވެ. ތާވަލްގެ ތިންވަނައިގައި 57 ޕޮއިންޓާއެކު ފޮރެސްޓް އޮތްއިރު ހަތަރު ވަނައިގައި މިވަގުތު ޗެލްސީ އޮތީ 49 ޕޮއިންޓާއެކުއެވެ.
ރިއެކްޝަންސް
