ފަހު ވަގުތު ރުޑީގާގެ މޮޅު ހެޑަރ އާއެކު ރެއާލް މެޑްރިޑް ކޮޕާ ޑެލް ރޭގެ ފައިނަލަށް
މެޗުގައި ރެއާލް މޮޅުކޮށްދިން ގޯލްޖެހި ރުޑީގާ އަދި އެހީތެރިވި އަރްދާ ގުލާ. ފޮޓޯ: ރެއާލް މެޑްރިޑް

ފަހު ވަގުތު ރުޑީގާގެ މޮޅު ހެޑަރ އާއެކު ރެއާލް މެޑްރިޑް ކޮޕާ ޑެލް ރޭގެ ފައިނަލަށް

1 day ago - 08:37
Apr 2, 2025 - 08:52

ކޮޕާ ޑެލް ރޭގެ ސެމީ ފައިނަލްގެ ދެވަނަ ލެގުގައި ރޭ ރެއާލް މެޑްރިޑް އާއި ރެއާލް ސޮސޮއެޑާޑްގެ ގެ ގަދަހިފުން ފަހު ވަގުތު ޑިފެންޑަރު އެންޓޯނިއޯ ރުޑީގާ ކާމިޔާބުކުރި ގޯލާއެކު ރެއާލުން ކާމިޔާބުކޮށް ފައިނަލަށް ދަތުރުކޮށްފިއެވެ.

މެޗުގެ ފުރިހަމަ ވަގުތު ހަމަވިފަހުން 91 ވަނަ މިނިޓްގައި ބަދަލުކުޅުންތެރިއްގެ ގޮތުގައި ނިކުއިން ރުޑީގާގެ މޮޅު ހެޑަރ ފެނިގެންދިޔައީ މެޗުގެ 115 ވަނަ މިނިޓްގައެވެ. އަރްދާ ގުލާ ނަގައިދިން ކޯނަރު ބޮލުންޖައްސާލުމަށް ރުޑީގާ ފުއްމައިގެން އަރާ ގޯލްގެ ތެރެއަށް ފޮނުވާލި ބޯޅަ ކީޕަރު އެލެކް ރެމީރޯގެ ބޯމަތިން ގޮސް ގޯލްގެ ދާގަނޑަށް މެހުމާއެކު ރެއާލްގެ ސަޕޯޓަރުން ކެކި އުތުރި އަރައިގަތެވެ.

ވާދަވެރި ދެވަނަ ހާފެއް ފެނިގެންދިޔަ މެޗުގެ ފުރަތަމަ ހާފު ނިމުންއިރު ނަތީޖާއަކީ 1-1 ކެވެ. މެޗުގެ 16 ވަނަ މިނިޓްގައި ރެއާލް ސޮސިއެޑާޑުން ލީޑު ނަގާފައިވަނިކޮށް ރެއާލަށް ނަތީޖާ އެއްވަރުކޮށްދިނީ ވިނީޝިއުސްގެ އެހީތެރިކަމާއެކު ޒުވާން ކުޅުންތެރިޔާ އެންޑްރިކް އެވެ.

ދެވަނަ ހާފުގެ 21 މިނިޓްތެރޭގައި ފަސް ގޯލް ފެނިގެންދިޔަ މެޗުގައި ނޭވާ ހިފައްޓާލަންޖެހުނު އެތައް ވަގުތުކޮޅެއް ފެނިގެން ދިޔައެވެ. ސޮސިއެޑާޑް ދެވަނަ ފަހަރަށް ލީޑު ލިބުނީ ރެއާލްގެ ޑޭވިޑް އަލަބާ އަތުން ބައިކޮޅަށް ވައިން ގޯލާއެކުއެވެ. އޭގެ އަށް މިނިޓްފަހުން މިކޭލް އޮޔަތަބެލް ވަނީ ގޯލެއް ޖަހާ ސޮސިއެޑާޑްގެ ލީޑު ފުޅާކޮށްފައެވެ.

Advertisement
Advertisement

އޭގެ ދެ މިނިޓްފަހުން ރެއާލަށް 82 ވަނަ މިނިޓްގައި ނަތީޖާ އުއްމީދު އާކޮށްދިނީ މެދުތެރެއަށްކުޅޭ ޖޫޑް ބެލިންގްހަމްއެވެ.  މިފަހަރުވެސް ފުރުޞަތު ތަނަވަސްކޮށްދިނީ ވިނީޝިއުސް އެވެ. ރޮޑްރީގޯ ތަނަވަސްކޮށްދިން ފުރުޞަތުގައި 86 ވަނަ މިނިޓްގައި ރެއާލަށް އަލުން ނަތީޖާ އެއްވަރުކޮށްދިނީ އައުރެލިން ޗުއަމެނީ އެވެ.

އެހިސާބުން ރެއާލްއަށް އެމީހުން ކޮޅަށް މެޗު ނިންމާލެވުނީ ކަމަށް ހީކުރި ނަމަވެސް ސޮސޮއެޑާޑްގެ ކެޕްޓަން އޮޔަތަބެލް މެޗުގެ އިތުރުވަގުތުގެ ތިންވަނަ މިނިޓްގައި ގޯލެއް ޖަހާ ނަތީޖާ އެއްވަރުކުރިއެވެ. އޭނާގެ ބޮލުން ފޮނުވާލި ބާރު ބޯޅަ ގޯލްގެ ތެރެއަށް ވަނުމާއިއެކު އެގްރެގޭޓުންވެސް ނަތީޖާ އެއްވަރުވެ ދެޓީމަށްވެސް އިތުރު ވަގުތު ނަތީޖާ ނެރުމަށް މަސައްކަތް ކުރަން ޖެހުނެވެ.

މެޗުގެ އިތުރު ވަގުތުގެ 115 ވަނަ މިނިޓްގައި ސޮސިއޭޑާޑްގެ ހިތް ހަލާކު ކޮށްލީ މެޗުގެ މޮޅު ކުޅުންތެރިޔާގެ މަޤާމްވެސް ހޯދި އެންޓޯނިއޯ ރުޑީގާގެ ބޮލުން ފޮނުވާލި ބާރު ބޯޅަ ގޯލަށް އަމާޒުވުމާއެކުއެވެ. 

ފައިނަލަށް ދަތުރުކުރުމާއި އެކު މިސީޒަނުގައި ރެއާލުން ތިން ތަށި ޙާސިލްކުރުމުގެ އުއްމީދު ވަނީ އާވެފައެވެ. ލަލީގާގެ ތާވަލްގެ ދެވަނަގައި ރެއާލް މެޑްރިޑް އޮތީ ބާސެލޯނާއަށް ވުރެ ތިން ޕޮއިންޓް މަދުން ހޯދައިގެންނެވެ. ޗެމްޕިއަންސް ލީގުގެ ކުއާޓަރ ފައިނަލްގައި އާސެނަލް އާ ވާދަކުރަން ހަމަޖެހިފައިވާއިރު މިފަހަރު ކޮޕާ ޑެލް ރޭ ކާމިޔާބު ކުރެވިއްޖެ ނަމަ އެއީ ރެއާލްގެ 21 ވަނަ ކޮޕާ ޑޭލް ރޭ ތައްޓެވެ.  

ކޮޕާ ޑެލް ރޭގެ ފައިނަލްގައި ރެއާލް އާ ވާދަކުރާނެ ޓީމެއް ކަނޑައެޅުމަށް ބުދަ ދުވަހު ބާސެލޯނާ އެތްލެޓިކޯ މެޑްރިޑާ ވާދަކުރާނެއެވެ.

ރިއެކްޝަންސް

like

dislike

love

funny

angry

sad

wow