މެންޗެސްޓަރ ސިޓީ މޮޅުވި މެޗުގައި ގްރީލިޝްގެ ގޯލް ހާއްސަކުރީ މީގެ 25 އަހަރު ކުރިން ނިޔާވި ކޮއްކޮއަށް
އިނގިރޭސި ޕްރިމިއަރ ލީގުގައި ރޭ މެންޗެސްޓަރ ސިޓީ އާއި ލެސްޓަރ ސިޓީ ވާދަކުރި މެޗު 2-0 ން ސިޓީ ކާމިޔާބުކުރިއިރު ޖެކް ގްރީލިޝްގެ ގޯލް މީގެ 25 އަހަރުކުރިން ނިޔާވި އޭނާގެ ކޮއްކޮއަށް ޙާއްސަކޮށްފިއެވެ. 16 މަސްދުވަހުގެ ތެރޭގައި ލީގުގައި ގްރީލިޝް ކާމިޔާބުކުރި ހަމައެކަނި ގޯލް އޭނާގެ ކުޑަ ކޮއްކޮ ކީލަން އަށް ޙާއްސަކޮށް ދިން ޓްރިބިއުޓްގައި މެޗަށްފަހު އިންސްޓަރާމްގައި ގްރީލިޝް ބުނީ "ދިސް ވަން އިޒް ފޮރ ޔޫ" މިހެންނެވެ.
ޑިސެމްބަރު މަހުން ފެށިގެން ސިޓީގެ ފުރަތަމަ އެގާރައިގައި ގްރީލިޝް ފުރަތަމަ ފަހަރަށް ހިމެނުނު މެޗުގެ އެންމެ ދެވަނަ މިނިޓްގައި ސިޓީއަށް ލީޑު ނަގައިދިނީވެސް އޭނާއެވެ. ނަމަވެސް އޭނާގެ ގޯލް ޙާއްސަކުރީ ކޮންކަމަކާ ގުޅިގެން ކާކަށްކަން އޭނާ ހާމަކުރީ މެޗަށްފަހުއެވެ.
މީގެ 25 އަހަރުކުރިން ގްރީލިޝްގެ ކޮއްކޮ ކީލަން ނިޔާވިއިރު ގްރީލިޝްގެ އުމުރުން އެންމެ ހަތަރު އަހަރެވެ. އެޕްރީލް 2000 ގައި ކީލަން ނިޔާވީ އެންމެ ނުވަ މަހުގައި 'ސަޑަން އިންފެންޓް ޑެތް ސިންޑްރޯމް' ގައެވެ. މެޗަށްފަހު ގްރީލިޝް ވަނީ އާއިލާއަށް 25 އަހަރުކުރިން ދިމާވި ހިތްދަތިކަމުގެ ވާހަކަ މީޑިއާ އާ ފުރަތަމަ ފަހަރަށް ޙިއްސާކޮށްފައެވެ.
"މިއީ ވަރަށް އުނދަގޫ ދުވަހެއް މުޅި އާއިލާއަށްވެސް. އެކަމަކު އަހަރެންގެ މަންމައާ ބައްޕަ މިއަދު މި ގޯލް ޖެހިތަން އަދި މޮޅުވިތަން ބަލަން ތިބުމުން ވަރަށް އުފާވި" ގްރީލިޝް ބުންޏެވެ. ގްރީލިޝްގެ ދެން ހުންނަނީ 21 އަހަރުގެ އަންހެން ކޮއްކޮއެކެވެ.
ސިޓީގެ ކޯޗު ޕެޕް ގާޑިއޯލާ ބުނީ އޭނާއަށްވެސް މިއީ ގްރީލިޝްގެ ކޮއްކޮ މަރުވިތާ 25 އަހަރުފުރުން ދުވަސްކަން ނޭނގޭ ކަމަށާއި ޖެކް އަކީ ވަރަށް ހިތްހެޔޮ އެހެން މީހުންނަށް އޯގާތެރި ހިތެއްގެ ވެރިއެއް ކަމުގައެވެ.
"އަހަންނަކަށް ނޭނގެ އެކަމެއް. އަހަންނަށް ހިޔާލަށްވެސް ނުގެނެވޭ އޭނާގެ މަންމަ އާއި ބައްޕަ އަދި އަންހެން ކޮއްކޮގެ މި ހިތްދަތިކަން. މިއަދު ކީލަންގެ ހަނދާން އާކުރުމަކީ ވަރަށް ރަނގަޅު ކަމެއް. އަހަންނަށް ޔަޤީން އެމީހުން ކޮންމެ ދުވަހަކުވެސް އޭނާގެ ހަނދާންކުރާނެކަން. ގްރީލިޝްގެ ގޯލަކީ ވަރަށް ރަނގަޅު ކަމެއް" ގާޑިއޯލާ ބުންޏެވެ.
އިއްތިހާދު ސްޓޭޑިއަމްގައި ކުޅުނު މި މެޗުގައި ސިޓީގެ ދެވަނަ ގޯލް ކާމިޔާބުކުރީ ސިޓީއާ ގުޅުނުފަހުން މޮޅުކުޅުމެއް ދައްކާ ގިނަ ގޯލްތަކެއް ކާމިޔާބުކުރަމުން އަންނަ އޮމްރް މަރްމޯޝްއެވެ.
މި ނަތީޖާއާ އެކު ސިޓީ މިވަގުތު އޮތީ 51 ޕޮއިންޓާއެކު ތާވަލްގެ ހަތަރުވަނައިގައެވެ. އެއީ 50 ޕޮއިންޓާއެކު ފަސްވަނައިގައި އޮތް ނިއުކާސަލް ޔުނައިޓަޑް އާއި 49 ޕޮއިންޓާއެކު ހަވަނައިގައި އޮތް ޗެލްސީއަށްވުރެ އެއްމެޗު ގިނައިން ކުޅެގެންނެވެ.
ރިއެކްޝަންސް
