ކްލެސިކޯ ފައިނަލްގެ ޖާގަ ހޯދުމަށްފަހު ބާސެލޯނާ ތިންތަށީގެ ހުވަފެނުގައި
ކޮޕާ ޑެލް ރޭ ގެ ސެމީ ފައިނަލްގައި ރޭ 1-0 ން އެތްލެޓިކޯ މެޑްރިޑް ބަލިކުރުމަށްފަހު ރެއާލް މެޑްރިޑް އާއެކު ކްލެސިކޯ ފައިނަލްގެ ޖާގަ ބާސެލޯނާއިން ބުކްކޮށްފިއެވެ. މިއާއެކު ކޯޗު ހެންސީ ފްލިކް ވަނީ މިސީޒަނުގައި ބާސެލޯނާއިން ތިންތަށި ހޯދުމަކީ އެޓީމުގެ ހުވަފެނެއްކަމުގައި ބުނެފައެވެ.
ފުރަތަމަ ލެގުން 4-4 ން އެއްވަރުވެ ދެވަނަ ލެގަށް ނިކުއިން ބާސެލޯނާގެ ހަމައެކަމި ގޯލް ކާމިޔާބުކުރީ ފެރަން ޓޮރޭސްއެވެ. 27 ވަނަ މިނިޓްގައި މި ގޯލް ކާމިޔާބުކުރުމުގައި އެހީތެރިވީ ލަމީން ޔަމާލްއެވެ. މި ގޯލާއެކު މެޓްރޯޕޮލިޓަން ސްޓޭޑިއަމްގައި ކުޅުނު މެޗު ނިމި 4-5 ގެ އެގްރެގޭޓުން މޮޅުވުމާއެކު މިސީޒަންގެ ހުރިހާ މުބާރާތްތަކުގައި ކުރިއަށް ދިއުމުގެ ރޫޙު ޓީމުތެރޭގައި ވަރަށް ބޮޑުވެފައިވާކަށް މެޗަށްފަހު ފްލިކް ބުނެފައި ވެއެވެ.
މީގެ ކުރިން ބާސެލޯނާ އަށް އެއް ސީޒަނެގައި ތިންތަށި ހާސިލް ކުރެވުނީ 2009 އަދި 2015 ގައެވެ. މިސިޒަންގައި ލަލީގާގެ ބާކީ 9 މެޗު އޮތްއިރު ތާވަލްގެ ކުރީގައި ބާސެލޯނާ މިވަގުތު އޮތީ ތިން ޕޮއިންޓްގެ ލީޑެއްގައެވެ. ޗެމްޕިއަންސް ލީގުގެ ކުއާޓަރ ފައިނަލްގައި ބާސެލޯނާ ވާދަކުރާނީ ޖަރުމަނުގެ ބޮރޫޝިއާ ޑޯޓްމަންޑާ ދެކޮޅަށެވެ. މިއަހަރު ބާސެލޯނާ ވަނީ ސްޕެނިޝް ސުޕަރކަޕް ވެސް ކާމިޔާބުކޮށްފައެވެ.
"އެއީ ވަރަށް ރަނގަޅު މެޗެއް. އެކަމަކު އަހަރެންގެ ތަޖުރިބާގެ އަލީގައި އަހަންނަށް އެނގޭ ކިހާ އަވަހަށް ކަންކަން ބަދަލުވެގެންދާކަން. ތަށި ހާސިލްކުރުމަކީ އަހަރެމެންގެ ވަރަށްބޮޑު ހުވަފެނެއް. ސުޕަ ކޮޕާ މިއހާރުވެސް އެބައިން. އެކަމު އަހަރެމެންގެ ތަށި ހަރުގަނޑުގަ އަދިވެސް ޖާގަ އެބަހުރި" މެޗަށްފަހު ބޭއްވި ނޫސްކޮންފަރެންސްގައި ފްލިކް ބުންޏެވެ.
ސްޕެއިންގެ ގަދަ ދެބާރު ކަމަށްވާ ރެއާލް މެޑްރިޑާއި ބާސެލޯނާ ކޮޕާ ޑެލް ރޭގެ ފައިނަލްގައި އެންމެފަހުން ވާދަކުރީ 2014 ގައެވެ. މިއަހަރުގެ ކުރިމަތިލުން އޮންނާނީ ސެވިއްޔާގެ އެސްޓޭޑިއޯ ލަ ކާޓޫޖާގައި އެޕްރީލް 26 ވަނަ ދުވަހުއެވެ.
ރިއެކްޝަންސް
