ރޮނާލްޑޯގެ ގޯލާއެކު އަލް-ނަޞްރުން ލީގު ތާވަލްގައި ފަރަގު ކުޑަކޮށްފި
ސައުދީ ޕްރޯ ލީގުގައި ރޭ އަލް-ނަޞްރުން އަލް-ރާއިދް ގެ މައްޗަށް ކުރިހޯދާ ލީގު ތާވަލްގެ ފަރަގު ކުޑަކޮށްފިއެވެ. ކިންގް އަބްދުالله ސްޕޯޓް ސިޓީ ސްޓޭޑިއަމްގައި ކުޅުނު މެޗު އަލް-ނަޞްރު 2-1 ން ކާމިޔާބުކުރިއިރު, ކެޕްޓަން ކްރިސްޓިއާނޯ ރޮނާލްޑޯ ވަނީ ގޯލެއް ޖަހާ, އިތުރުގޯލެއް ކާމިޔާބުކުރުމަށް އެހީތެރިވެފައެވެ.
ރޭގެ މޮޅާއެކު އަލް-ނަޞްރު ތާވަލްގެ ތިންވަނައިގައި އޮތީ ދެވަނަގައި އޮތް އަލް-އިއްތިހާދު އަދި އެއްވަނައިގައި އޮތްއަލް-ޙިލާލްއަށް ވުރެ 5 ޕޮއިންޓް މަދުކޮށެވެ. އަލް-ނަޞްރަށް 18 މެޗުން 38 ޕޮއިންޓް ލިބޭއިރު, ކުރީގައި އޮތް ދެ ޓީމު 17 މެޗުން 43 ޕޮއިންޓް ވަނީ ހޯދާފައެވެ.
މެޗުގައި އަލް-ނަޞްރަށް 35 ވަނަ މިނިޓްގައި ރޮނާލްޑޯ ލީޑު ނަގައިދިނީ މާސެލޯ ބްރޮންޒްވިޗް ތަނަވަސްކޮށްދިން ފުރުޞަތެއްގައެވެ. އަދި މެޗުން މޮޅުވި ގޯލް ކާމިޔާބުކޮށްދިނުމުގައިވެސް އެހީތެރިވީ ރޮނާލްޑޯއެވެ. މިއީ މިސީޒަނުގައި ރޮނާލްޑޯގެ 15 ވަނަ ލީގު ގޯލެވެ.
އަލް- ނަޞްރުގެ ދެވަނަ ގޯލް 47 ވަނަ މިނިޓްގައި ކާމިޔާބުކޮށްދިނީ ޑިފެންޑަރު ނަވާފް އަލް-ބޮޝައިލް އެވެ.
ނަމަވެސް މެޗުގެ 76 ވަނަ މިނިޓްގައި އަލް-ރާއިދްގެ ކެޕްޓަން އާމިރް ސަޔޫދް ކާމިޔާބުކުރި ގޯލާއެކު ވަނީ ނަތީޖާގެ ފަރަގުކުޑަކޮށްފައެވެ. ނަތީޖާ އާއެކު އަލް ރާއިދް ތާވަލްގެ 15 ވަނައިގައި އޮތީ 14 ޕޮއިންޓާއެކުއެވެ.
ރިއެކްޝަންސް
