އިޒްރާއިލްއިން ވޭން އަކަށް އަމާޒުކޮށް ދިން ހަމަލާއެއްގައި ފަސް ނޫސްވެރިއަކު މަރާލައިފި
މެދުތެރޭ ޣައްޒާގެ އަލް އަވްދާ ހޮސްޕިޓަލް ކައިރިން ނޫސްވެރިން ތިބި ވޭން އަކަށް އިޒްރާއިލްއިންއިން ހަމަލާދީ ފަސް ނޫސްވެރިއަކު މަރާލައިފިއެވެ. ފަލަޞްޠީނިއަން އޮތޯރިޓީގެ މީޑިއާ ރިޕޯޓްތައް ބުނާގޮތުން މަރާލާފައިވަނީ ނުސީރަތު ރެފިއުޖީ ކޭމްޕް ކައިރީގައި ހުންނަ އަލް އަވްދާ ހޮސްޕިޓަލް ކައިރިން އިވެންޓެއް ކަވަރ ކުރަމުން ދިޔަ އަލް-ގުދްސް ޓްޑޭގެ ނޫސްވެރިންނެވެ.
އެ ސަރަޙައްދުން އަލް ޖަޒީރާގެ ނޫސްވެރިޔާ އަނަސް އަލް-ޝާރިފް ބުރާސްފަތި ދުވަހު ހެނދުނު ރިޕޯޓްކޮށްފައިވާ ގޮތުގައި މަރާލާފައިވާ ނޫސްވެރިންގެ ތެރޭގައި ހިމެނޭ އަޔިމަން އަލް-ޖާދި އެވަގުތު ހުރީ ހޮސްޕިޓަލް އާ ދާދި ކައިރީގައެވެ. އޭނާގެ އަނބިމީހާ އެވަގުތުވީ ހޮސްޕިޓަލްގައި އެދެމަފިރިންގެ އަލަތު ދަރިފުޅު ވިހެއުމަށްޓަކައި އެނދުމަތިކޮށްފައެވެ.
އިޒްރާއިލްގެ ހަމަލާގައި މަރާލި އިތުރު ނޫސްވެރިންނަކީ ފާދީ ހަސޯނާ, އިބްރާހިމް އަލް-ޝެއިޚް ޢަލީ, މުޙައްމަދު އަލް- ލަދާހް އަދި ފައިސަލް އަބޫ އަލް-ޤުސްމާން އެވެ.
އެކްސްގައި އަނަސް ޕޯސްޓްކޮށްފައިވާ ވީޑިއޯއިން ފެންނަ ގޮތުގައި ހަމަލާއާއެކު މުޅި ވޭންގައި ވަގުތުން ހުޅުހިފިއެވެ. އަދި އަލިފާންގަނޑު ވަރަށް ބޮޑަށް މުޅި ވޭންގައި ރޯވިއެވެ. ވީޑިއޯއިން ނަގާފައިވާ ސްކްރީން ޝޮޓްތަކުން ފެންނަ ގޮތުގައި ހުދު ކުލައިގެ ވޭންގައި ރަތް ކުލައިގެ ބޮޑެތި އަކުރުން "ޕްރެސް" މިހެން ލިޔެފައިވެއެވެ.
ނަމަވެސް އިޒްރާއިލްއިން ބުނެފައިވަނީ އެމީހުން އަމާޒުކޮށް ހަމަލާދީފައިވަނީ އިސްލާމިކް ޖިހާދުގެ މެމްބަރުން އުފުލާ އުޅަނދަކަށް ކަމަށާއި ކުރިއަށް އޮތް ތަނުގައިވެސް ޓެރަރިސްޓް ޖަމާއަތްތަކާ ދެކޮޅަށް އަމާޒުކޮށްގެ އެފަދަ ހަމަލާތައް ދޭނެކަމުގައެވެ.
7 އޮކްޓޯބަރު 20233 ން ފެށިގެން މިހާތަނަށް އިޒްރާއިލްއިން 141 ނޫސްވެރިއަކު ވަނީ ޣައްޒާގައި މަރާލާފައެވެ. ނޫސްވެރިންގެ ހިމާޔަތުގައި މަސައްކަތްކުރާ ކޮމިޓީ (ސީޕީޖޭ) އިން މި މަހުގެ ކުރީކޮޅުވެސް ވަނީ އިޒްރާއިލްއިން ފަލަޞްޠީނުގެ ހަތަރު ނޫސްވެރިއަކު މަރާލި މައްސަލައާ ގުޅިގެން ނޫސްވެރިންނަށް އަމާޒުކޮށްދޭ ހަމަލާތަކާ ގުޅިގެން އިޒްރާއިލް ޒިންމާދާރުކުރުމަށް ބައިނަލްއަޤުވާމީ މުޖުތަމައުއަށް ގޮވާލާފައެވެ.
ރިއެކްޝަންސް
