ފުލެޓް ލިސްޓަށް ޝަކުވާ ހުށަހެޅުމުގައި ސިޓީ ކައުންސިލުން އެހީތެރިވަނީ
ފުލެޓް ލިސްޓަށް ޝަކުވާ ހުށަހެޅުމުގައި އާންމުންނަށް އެހީތެރިކަން ފޯރުކޮށްދިނުމަށް މާލޭ ސިޓީ ކައުންސިލުން ނިންމަވައިފިއެވެ.
މާލެ ސިޓީ ކައުންސިލުން ކުރި އިއުލާނެއްގައި ވިދާޅުވީ މިއަދުން ފެށިގެން މިފެށޭ މަހުގެ 15 ވަނަ ދުވަހުގެ ނިޔަލަށް ޝަކުވާ ހުށަހެޅުމުގައި ކައުންސިލުން އެހީތެރިކަން ފޯރުކޮށް ދެއްވާނެކަމަށެވެ.
ސިޓީ ކައުންސިލުން ވިދާޅުވީ ލިސްޓަށް ޝަކުވާ ހުށަހެޅުމުގައި އެހީވުމުގެ ގޮތުން، އާންމު ހިދުމަތްތަކާ ބެހޭ ބައި މިއަދުން ފެށިގެން އޭޕްރީލް 5 އާ ހަމައަށް ހުޅުވާނެ ކަމަށާއި، އަދި ހެނދުނު 10:00 އިން މެންދުރު 2:30 އަށް އަދި ރޭގަނޑު 9:30 އިން 11:00 ހިދުމަތް ދޭނެކަމަށެވެ.
ރޯދަމަހުގެ ބަންދު ނިމުމަށް ފަހު އަންނަ މަހުގެ 6 އިން ފެށިގެން 15 ވަނަ ދުވަހާ ހަމައަށް އެ ހިދުމަތްދޭނީ ހެނދުނު 9:00 އިން ހަވީރު 4:00 އަށް ކަމަށާއި، އަދި އެ މުއްދަތުގައި ރޭގަނޑު ހިދުމަތް ދޭނީ 9:00 އިން 11:00 އަށް ކަމަށްވެސް ކައުންސިލުން ވިދާޅުވިއެވެ.
މިނިސްޓްރީން އާއްމުކުރި ލިސްޓުގައި ފްލެޓް ލިބޭ ކަމަށް ކަނޑައަޅާފައިވަނީ 1،820 މީހުންނަށެވެ. މި ލިސްޓާއި މެދު އާއްމުންގެ ފަރާތުން ގެންދަނީ ވަރަށް ބޮޑު ކަންބޮޑުވުންތަކެއް ފާޅުކުރަމުންނެވެ. މިހާތަނަށް ފްލެޓް ލިސްޓަށް 2،843 ޝަކުވާ ހުށަހަޅާފައިވާކަމަށް ގެދޮރުވެރިކަމާއި ބެހޭ މިނިސްޓްރީން ވިދާޅުވިއެވެ.
ރިއެކްޝަންސް
