ގޮވާމުން ފިޠުރު ޒަކާތް ބަލައިގަތުން އިސްކަންދަރު ސްކޫލަށް ބަދަލުކޮށްފި

މާލޭ ސަރަހައްދުގައި ގޮވާމުން ފިޠުރު ޒަކާތް ބަލައިގަތުމަށް ކުރިން ހަމަޖެއްސި މަޖީދިއްޔާ ސްކޫލުގެ ބަދަލުގައި، އިސްކަންދަރު ސްކޫލުގައި ބަލައިގަންނަގޮތަށް ހަމަޖައްސާ ދިވެހިރާއްޖޭގެ ޒަކާތު ހައުސްއިން އެކަން އިޢުލާންކޮށްފިއެވެ.

ގޮވާމުން ފިޠުރު ޒަކާތް ދެއްކުމުގެ ފުރުޞަތު މި މަހުގެ 22 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށް ހުޅުވާލާފައިވާކަމަށާއި، ޒަކާތް ބަލައިގަންނާނީ ކޮންމެ ދުވަހެއްގެ މެންދުރު 13:00 އިން ހަވީރު 16:00 އަށް ކަމަށް ޒަކާތު ހައުސްއިން ބުންޏެވެ.

ފިޠުރު ޒަކާތުގެ ގޮތުގައި ބަލައިގަންނާނެ ބާވަތްތަކުގެ ތެރޭގައި އާދައިގެ ހަނޑޫ، ތައިލެންޑް ހަނޑޫ، ބާސްމަތީ ހަނޑޫ، ރަތް ހަނޑޫ، ގޮދަން ފުށް އަދި އާޓާ ފުށް ހިމެނޭކަމަށާއި، އަދި ޒަކާތުގެ މިންވަރަކީ ބޮލަކަށް 2.4 ކިލޯ ކަމަށްވެސް ޒަކާތު ހައުސްއިން ބުންޏެވެ.

ޒަކާތު ހައުސްއިން އތުރަށް ބުނީ މަޖީދިއްޔާ ސްކޫލުގެ ބަދަލުގައި އިސްކަންދަރު ސްކޫލު ހަމަޖެއްސީ މާލޭ ސަރަހައްދުގެ ރައްޔިތުންނަށް ފިޠުރު ޒަކާތް ދެއްކުމަށް އިތުރު ލުއި ފަސޭހަތަކެއް ހޯދައި ދިނުމުގެ ގޮތުން ކަމަށެވެ.