ދައުލަތުގެ ޚަރަދުގައި ޙައްޖަށް ފޮނުވާ 50 ފަގީރުން ހޮވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާއި އެއްގޮތަށް، މިއަހަރު ދައުލަތުގެ ޚަރަދުގައި ޙައްޖަށް ފޮނުވާނެ 50 ފަގީރުން ހޮވައިފިއެވެ.
ކުރީ އަހަރެކޭވެސް އެއްފަދައިން މިއަހަރުވެސް އެފުރުޞަތު ލިބޭ މީހުން ހޮވާފައިވަނީ ގުރުއަތުންނެވެ. މި ގުރުއަތުލުން ބާއްވާފައި ވަނީ އިސްލާމީ މަރުކަޒުގައެވެ.
ރިޔާސީ ދައުރުގެ ތެރޭގައި ޖުމްލަ 1000 ފަގީރުން ޙައްޖަށް ފޮނުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއަޒުގެ ރިޔާސީ ވަޢުދެކެވެ. އެ ވަޢުދުގެ ދަށުން އެންމެ ފުރަތަމަ ފަގީރުން ހައްޖަށް ފޮނުވަން ފެށީ މިދިޔަ އަހަރުއެވެ.
ފަގީރުންގެ ގޮތުގައި ހައްޖަށް ފޮނުވުމަށް ހަމަޖެހިފައި ވަނީ ޒަކާތު ހައުސްގެ ފަގީރުންގެ ދަފްތަރުގައި ހިމެނޭ، ޝަރުތު ހަމަވާ ފަރާތްތައް އެކަނިކަމަށް އިސްލާމިކް މިނިސްޓްރީން ވިދާޅުވިއެވެ.
މިފަހަކަށް އައިސް އުސޫލެއްގެ ގޮތުން ކޮންމެ އަހަރަކުވެސް ރާއްޖެއަށް ހައްޖަށް މީހުންގެންދިއުމަށް ލިބެނީ 1000 ހައްޖު ކޯޓައެވެ. މިދިޔަ އަހަރުން ފެށިގެން މި ކޯޓާތަކަށް މީހުން ހައްޖަށް ގެންދަނީ ހަމައެކަނި ހައްޖު ކޯޕަރޭޝަނުންނެވެ.
މިއަހަރުގެ ބަރަކާތްތެރި ޙައްޖު ދުވަސް މީލާދީގޮތުން ދިމާވަނީ ޖޫން މަހުގެ 5ވަނަ ދުވަހާއެވެ.
ރިއެކްޝަންސް
