ޑޮކްޓަރުންނަށްދޭ ވަގުތީ ލައިސަންސްގެ މުއްދަތު އެއްއަހަރުން ހަމަސްދުވަހަށް ކުރުކޮށްފި
މޯލްޑިވްސް މެޑިކަލް އެންޑް ޑެންޓަލް ކައުންސިލްގެ މެޑިކަލް ލައިސެންސިން އިމްތިހާނު ފުރިހަމަކުރަން ޖެހޭ ޑޮކްޓަރުންނަށް ދޭ ވަގުތީ ލައިސަންސްގެ މުއްދަތު އެއް އަހަރުން ހަ މަސް ދުވަހަށް ކުރުކޮށްފިއެވެ.
މިކަން ހާމަކޮށްފައިވަނީ ހެލްތު މިނިސްޓްރީން ގެޒެޓްކުރި އިއުލާނެއްގައެވެ.
އެ މިނިސްޓްރީގެ އިއުލާނުގައި ބުނެފައި ވަނީ މެޑިކަލް ކައުންސިލްގެ އިމްތިހާނުގެ ކުރިން ދޫކުރާ ވަގުތީ ލައިސަންސްގެ މުއްދަތު ކުރުކުރުމަށް ނިންމާފައި ވަނީ، އެއް އަހަރުގެ މުއްދަތު ދިގުކަމަށް އެ މިނިސްޓްރީއަށް ފާހަގަކުރެވުމުން ކަމަށެވެ.
މި ބަދަލާ އެކު މިދިޔަ ހޮނިހިރު ދުވަހުން ފެށިގެން ލައިސަންސް ދޫކުރަމުން ގެންދާނީ ހަމަސް ދުވަހުގެ މުއްދަތަށް ކަމަށާއި ނަމަވެސް، މިދިޔަ ސެޕްޓެމްބަރު 1 އިން ފެށިގެން މިދިޔަ ހޮނިހިރު ދުވަހާއި ހަމައަށް ދޫކޮށްފައިވާ ލައިސަންސްތަކުގެ މުއްދަތު އިތުރު ހަ މަސް ދުވަހަށް އިތުރުކުރުމަށް ނިންމާފައިވާކަމަށްވެސް މިނިސްޓްރީގެ އިއުލާނުގައި ބުނެފައި ވެއެވެ.
މެޑިކަލް ކައުންސިލްގެ އިމްތިހާނުން ފާސްވުމުން ފަސް އަހަރުގެ ލައިސަންސެއް ލިބޭނެއެވެ.
ރިއެކްޝަންސް
