ފުވައްމުލަކު ހޮސްޕިޓަލުގައި ސީޓީ ސްކޭން ޚިދުމަތް ފެށުމަށް ވާންޖެހޭ އެންމެފަހުގެ ތައްޔާރާތައް ފަށައިފި
ފުވައްމުލަކު ހޮސްޕިޓަލުގައި ސީޓީ ސްކޭން ޚިދުމަތް ފެށުމަށް ވާންޖެހޭ އެންމެފަހުގެ ތައްޔާރީތައް މިހާރު ނިމެމުން އަންނަކަމަށް އެ ހޮސްޕިޓަލުން ބުނެފިއެވެ.
އެގޮތުން ސިއްހީ ވުޒާރާގެ ޓެކްނިކަލް ޓީމެއް ފުވައްމުލަކު ހޮސްޕިޓަލަށް ޒިޔާރަތްކޮށް ސީޓީ ސްކޭން ކޮޓަރީގެ އެންމެ ފަހުގެ އިންސްޕެކްޝަން ހަދާ، އެކޮޓަރީގައި ސީޓީ ސްކޭން މެޝިން ބެހެއްޓުމަށް އެތަން ތައްޔާރުވެފައިވާ މިންވަރު ކަށަވަރުކޮށްފައިވާ ކަމަށް އެ ހޮސްޕިޓަލުން ބުންޏެވެ.
މި އިންސްޕެކްޝަނަކީ ސިޓީ ސްކޭން ފެށުމުގެ ކުރިން ހަދާނެ އެންމެފަހުގެ އިންސްޕެކްޝަނެވެ. މި އާއިއެކު ހޮސްޕިޓަލުގެ ޓީމުން މިހާރު ދަނީ މި މުހިންމު ޚިދުމަތް ވީހާވެސް އަވަހަކަށް ފުވައްމުލަކުގެ ރައްޔިތުންނަށް ފޯރުކޮށްދިނުމަށް ކުރަންޖެހޭ މަސައްކަތްތައް ކުރަމުންނެވެ.
މިއީ ފުވައްމުލަކުގެ ޞިއްޙީ ޚިދުމަތްތައް ފުޅާކޮށް، ޒަމާނީ ވަސީލަތްތައް ތަޢާރަފުކުރުމަށް އެޅޭ މުހިންމު ފިޔަވަޅެކެވެ. މި ޚިދުމަތް ފެށުމުން، ފުވައްމުލަކުގެ ރައްޔިތުންނަށް ފަސޭހަކަމާއެކު ސީޓީ ސްކޭން ހެދުމުގެ ފުރުޞަތު އަމިއްލަ ފަސްގަނޑުގައި ތިބެ ލިބިގެންދާނެއެވެ.
ރިއެކްޝަންސް
