ކްރިސްޓިއާނޯ ރޮނާލްޑޯ އަލް-ނަޞްރަށް 100 ގޯލް
ސައުދީ ޕްރޯ ލީގުގައި އަންގާރަ ދުވަހު އަލް-ހަލީޖް ކޮޅަށް ކާމިޔާބުކޮށްދިން ދެ ގޯލާއެކު އަލް-ނަޞްރަށް ރޮނާލްޑޯ އޭނާގެ 100ވަނަ ގޯލް ކާމިޔާބުކޮށްދީފިއެވެ. މިއާއެކު ރޮނާލްޑޯގެ ކެރިއަރުގައި ޖެހި ގޯލްގެ އަދަދު ވަނީ 919 އަށް އަރާފައެވެ.
ރޭގެ މެޗުގައި ކާމިޔާބުކުރީ ދެ ގޯލާއެކު ރޮނާލްޑޯ ވަނީ 13 ގޯލާއެކު މިސީޒަންގެ ރަންބޫޓަށް ވާދަކުރާ އަލް-ހިލާލްގެ އަލެކްސަންޑަރ މިޓްރޮވިޗް ފަހަތަށް ޖައްސާލަފާއެވެ.
3-1 ން އަލް ނަޞްރު މޮޅުކޮށްދީ މުހިންމު ތިން ޕޮއިންޓް އެޓީމަށް ހޯދައިދިން މެޗުގައި އޭނާ ވަނީ ހިތްގައިމު ގޯލެއް ކާމިޔާބު ކޮށްފައެވެ. ރޮނާލްޑޯގެ 100 ވަނަ ގޯލަކީ މެޗުގެ 65 ވަނަ މިނިޓްގައި އަލް-ނަޞްރަށް ލީޑު ނަގައިދިން ގޯލެވެ. އޭނާ ވަނީ އަލް-ންޞްރަށް 101 ވަނަ ގޯލް މެޗުގެ ފުރިހަމަ ވަގުތު ހަމަވެ, އިތުރު ވަގުތުގެ އަށްވަނަ މިނިޓްގައި ކާމިޔާބުކޮށްދީފައެވެ.
2022 ވަނަ އަހަރުގެ ޑިސެމްބަރު މަހު އަލް-ނަޞްރާ ގުޅުނު ރޮނާލްޑޯއާއެކު އެ ކްލަބަށް މިހާތަށްނަށް ކާމިޔާބު ކުރެވިފައިވަނީ އެންމެ ތައްޓެކެވެ. ސައުދީ ޕްރޯ ލީގު ތާވަލްގައި އަލް-ނަޞްރު މިވަގުތު އޮތީ ތިންވަނައިގައެވެ. ލީގުގެ އެންމެ ކުރީގައި 43 ޕޮއިންޓާއެކު އޮތް އަލް-ހިލާލް އާ 11 ޕޮއިންޓްގެ ފަރަޤެއް އެބައޮތެވެ. ދެވަނައިގައި 40 ޕޮއިންޓާއެކު އޮތީ އަލް-އިއްތިހާދެވެ.
ރޮނާލްޑޯ އަލް-ނަޞްރާއެކު ހަދާފައިވާ އެއްބަސްވުން ނިމޭއިރު އެ ކްލަބާއެކު ހަދާފައިވާ ކޮންޓްރެކްޓް އާކުރާނެކަމަށް ކްލަބުން އުއްމީދު ކުރެއެވެ. އެ ކޮންޓްރެކްޓާއެކު 2034 ގައި ސައުދީގައި ބޭއްވުމަށ ހަމަޖެހިފައިވާ ފީފާ ވަރލްޑް ކަޕްގެ އެމްބަސެޑަރަކަށް ވާނީވެސް ރޮނާލްޑޯއެވެ.
ރިއެކްޝަންސް
