ދުންފަތް މަނާ ނުކުރީ ރައްޔިތުން ވަރަށްބޮޑަށް އާދަވެފައި ތިބުމުން- ރައީސް މުއިއްޒު
ދުންފަތް މަނާނުކުރީ ބަޔަކަށް ފައިދާއެއް ހޯދައިދޭކަށް ނޫން ކަމަށް ވިދާޅުވި
ވޭޕާއެކު ދުންފަތް މަނާ ނުކުރީ ބަޔަކަށް ފައިދާއެއް ހޯދައިދޭން ނޫން ކަމަށާއި, ރައްޔިތުން ވަރަށް ބޮޑަށް ދުންފަތަށް އާދަވެފައި ތިބުމުން ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ. ވޭޕް މަނާކޮށް ދުންފަތް މަނާ ނުކުރީ ހެޔޮ ނިޔަތެއް ނެތުމުން ކަމަށާއި, ވަކި ބަޔަކަށް ފައިދާއެއް ހޯދައިދޭން ކަމަށް ބުނެ އަމާޒުކުރަމުންދާ ފާދުކިއުންތަކަށް އުނގޫފާރުގައި ރައްދު ދެއްވަމުން ރައީސުލްޖުމްހޫރިއްޔާ ވިދާޅުވީ އެދެކަންތައް އެކުގައި މަނާކުރުމަކީ ކުރެވޭނެ ކަމެއް ކަމަށް ވިސްނިވަޑައި ނުގަންނަވާ ކަމަށެވެ.
ރައީސް ވިދާޅުވީ ވޭޕް މަނާކުރީ ހެޔޮ ނިޔަތުގައި ޖީލެއްގެ މުސްތަޤްބަލް ސަލާމަތް ކުރުމަށް ކަމަށެވެ. އެއީ ބަލިޖެހުމުގެ ކުރިން ބަލިން ރައްކާތެރި ކުރުމަށް އެޅުއްވި ފިޔަވަޅެއް ކަމަށް ވިދާޅުވިއެވެ. ރައީސް ވިދާޅުވީ ވޭޕަށް ޓެކްސް އިތުރުކޮށް ދައުލަތަށް އާމްދަނީ ލިބޭނެ ގޮތް ހެދުމަކީ ބަލައިގަނެވޭ ކަމެއް ނޫން ކަމަށެވެ.
" އަޅުގަނޑު ބޭނުމެއް ނޫން އެ ދާއިރާ އިން ޓެކްސް ބޮޑުކޮށްގެން އާމްދަނީ އިތުރު ކުރަން، ދުންފަތުގެ ބާވަތްތައް ގަނެގެން އެ އިތުރުވާ ޓެކްސް އެ އަށް ބަރޯސާ ވެގެން ދައުލަތުގެ އާމްދަނީ ކަލްކިއުލޭޓްކުރަން" ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ސަރުކާރުގެ ވިސްނުން ހުރީ ބޭސްފަރުވާގެ ޚިދުމަތް ފޯރުކޮށްދިނުމުގެ އިތުރުން، ބަލި ޖެހުމުގެ ކުރިން އެ ބަލިތަކުން ދިފާޢުވުން ނުވަތަ ޕްރިވެންޓިވް ހެލްތު ކެއަރގެ ރާސްތާއިން ކުރިއަށް ދިއުން ކަމަށެވެ. ރައީސުލްޖުމްހޫރިއްޔާ ވަނީ ރަށު ރޫޙުގައި ރައްޔިތުން ތެދުވެ، އެ ރަށަކީ ދުންފަތުގެ ވަބާއިން ސަލާމަތްވެފައިވާ ރަށަކަށް ހެދުމަށް މަސައްކަތް ކުރުމަށްވެސް ހިތްވަރުދެއްވާފައެވެ.
ވޭޕް މަނާކޮށް ދުންފަތުގެ ޓެކްސް ބޮޑުކުރުމާއެކު ސަރުކާރުން ވަނީ ދުންފަތާ ދުރުވާން ބޭނުންވާ ފަރާތްތަކަށް ޕްރޮގްރާމްތައް ފަށާފައެވެ.
ރިއެކްޝަންސް
