ރަސްގެތީމް ބަނދަރު މިއަހަރު ފަށާ ލިސްޓަށް, ސްކޫލް ކްލާސްރޫމާއި ހޯލް މިއަހަރު ނިންމާ ލިސްޓަށް!
ރ.ރަސްގެތީމް ބަނދަރުގެ މަސައްކަތް މިއަހަރު ފަށްޓަވާނެ ކަމުގެ ޔަގީން ކަމާއި, ސްކޫލް ކްލާސްރޫމާއި ހޯލް މިއަހަރު ނިންމައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ދެއްވައިފި އެވެ.
ރ.އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރަސްގެތީމަށް ވަޑައިގެން އެރަށުގެ ކައުންސިލާ ބައްދަލުކުރައްވާ ރައީސް މުއިއްޒު ވިދާޅުވީ މި ސަރުކާރުގެ އަމާޒަކީވެސް، އަދި ޕްލޭނަކީވެސް، ރިޔާސީ ކެމްޕެއިންގެ ތެރޭގައި އެރަކަށް ކޮށްދެއްވާނޭކަމަށް ވަޢުދުވެވަޑައިގެންފައިވާ ހުރިހާ ކަމެއްވެސް މި އަހަރުގެ ތެރޭގައި ފަށައި، ބައެއް ކަންކަން މި އަހަރުގެ ތެރޭގައި ނިންމެވުން ކަމަށެވެ.
ރަސްގެތީމްގައި މިއަހަރު އިތުރު އެހެން ކަންކަންވެސް ފައްޓަވާނެ ކަމުގެ ޔަގީންކަން ރައީސް ދެއްވިއެވެ. އެގޮތުން ކުޅިވަރުގެ ބިނާރާއި ވަޞީލަތްތަކާ ގުޅުންހުރި މަސައްކަތްތަކާއި، ކުނި ނައްތާލުމުގެ މަސައްކަތްތަކާއި، ސިއްޙީ ދާއިރާގައި ހުރި މައްސަލަތައް ޙައްލުކޮށްދެއްވުމުގެ މަސައްކަތް ކުރިއަށްއޮތް މަސްތަކުގެ ތެރޭގައި ފައްޓަވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ.
މިއަހަރު ނިމޭއިރު، މައްސަލަތަކަށް ޙައްލު ލިބި އެކަމުގެ އުފާފާޅުކުރާ ދަނޑިވަޅުގައި، ރައްޔިތުން އެދިވަޑައިގަންނަވާނަމަ، މަސައްކަތްތަކުގެ ނިމުން ފާހަގަކުރުމަށް އެމަނިކުފާނު ރަސްގެތީމަށް އެނބުރި ވަޑައިގަންނަވާނޭކަމަށްވެސް ރައީސް ވިދާޅުވިއެވެ.
ރިއެކްޝަންސް
