25,483 ބިދޭސީންގެ ބައޮމެޓްރިކް ޑާޓާ ނަގައިފި, އިއްޔެ އެކަނި 1455 މީހުންގެ ޑާޓާ ނެގި
ބިދޭސީންގެ މައްސަލަ ހައްލުކުރެވޭނީ 2027 ވަނަ އަހަރުގެ އޭޕްރީލްގަ
ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތުގެ ދަށުން އިއްޔެގެ ނިޔަލަށް 25,483 ބިދޭސީންގެ ބައޮމެޓްރިކް ޑާޓާ ނަގައިފި އެވެ. ހޯމް މިނިސްޓަރ އަލީ އިހުސާން ވިދާޅުވީ އިއްޔެ ކުރިއަށްގެންދިޔަ ޚާއްޞަ އޮޕަރޭޝަންގެ ދަށުން އެކަނިވެސް 1455 ބިދޭސީއެއްގެ ޑާޓާ ނަގާފައިވާ ކަމަށެވެ.
އޮޕަރޭޝަން ކުރަނގި މާލެ ސަރަހައްދުގެ ޕްރައިވެޓް ސެކްޓަރ އަދި ޢާއްމު ތަންތަނަށް ފުޅާކޮށް އިއްޔެ ވަނީ ފަށާފައެވެ. އިއްޔެގެ އޮޕަރޭޝަންގައި 1455 ބިދޭސީ މަސައްކަތްތެރީންގެ 10 އިނގިލީގެ ނިޝާން އަދި ފޭސިއަލް ރިކޮގްނިޝަން އަށް ބޭނުންވާ ފޮޓޯ ނެގި ޑާޓާބޭސް އަޕްޑޭޓް ކުރެވިފައިވާ ކަމަށް ވަޒީރު އިހުސާން ވިދާޅުވިއެވެ. މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހު ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ގައުމާ މުޚާތަބުކުރައްވާ ދެއްކެވި ވާހަކަފުޅުގައި ވިދާޅުވީ އެތާރީޚުގެ ނިޔަލަށް 10,000 ބިދޭސީންގެ ބައޯމެޓްރިކް ޑާޓާ ނެގިފައިވާ ކަމަށެވެ. އެކަން ފާހަގަކުރައްވާ ވަޒީރު އިހުސާން ވިދާޅުވީ އެފަހުން މިދިޔަ ދެމަސްތެރޭ ވަނީ އިތުރު 15000 އަށްވުރެ ގިނަ ބިދޭސީންގެ މައުލޫމާތު ނެގިފައިވާ ކަމަށެވެ.
" ރައީސް ޑރ.މުއިއްޒުގެ ވައުދުފުޅާ އެއްގޮތަށް ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ހޯދުމަށް 3 އަހަރުގެ ޕްލޭނެއްގެ ދަށުން ކުރެވެމުންދާ މިމަސައްކަތް الله ގެ އިރާދަފުޅާއެކު ކާމިޔާބުކަމާއެކު ނިންމާލެވޭނީ 2027 ވަނަ އަހަރުގެ އޭޕްރީލް މަހުގަ." ވަޒީރު ވިދާޅުވިއެވެ.
މިމަސައްކަތުގައި މިނިސްޓްރީގެ ފޮރިންގ ލޭބަރ ޑިޕާރޓްމަންޓް, މޯލްޑިވްސް އިމިގްރޭޝަން އާއި, ދިވެހި ފުލުހުންގެ ޚިދުމަތް އަދި މުޅި ހޯމް ސެކްޓަރގެ މުވައްޒަފުންނާއި ކައުންސިލްތަކުން ކުރައްވާ ބުރަ މަސައްކަތް މިނިސްޓަރ ވަނީ ފާހަގަކުރައްވާފައެވެ.
ބިދޭސީންގެ ބައޮމެޓްރިކް ޑާޓާ ނެގުމުގެ އިތުރުން ގަވާއިދާ ހިލާފަށް އުޅޭ ބިދޭސީން ހޯދާ އެމީހުން އަނބުރާ ފޮނުވާލުމުގެ ފުޅާ އޮޕަރޭޝަނެއް އިމިގްރޭޝަން އިސްވެ އޮވެ, ފުލުހުންނާ ގުޅިގެން ކުރިއަށް ގެންދެއެވެ.
ރިއެކްޝަންސް
