ބާސެލޯނާ އާއި އެތްލެޓިކޯ އަށްވެސް މޮޅުނުވެވި, ރެއާލް އަށް ފުރުޞަތު
ސްޕެނިޝް ލަލީގާގައި ބާސެލޯނާ އާއި އެތްލެޓިކޯ އަށްވެސް މޮޅުނުވެވި, ރެއާލް މެޑްރިޑް އަށް ފުރުޞަތު ތަނަވަސްވެއްޖެ އެވެ.
ބާސެލޯނާ އަށް ކުރެވުނު ވަރަކީ ގެޓާފޭ އަތުން ޕޮއިންޓެއް ހޯދުމެވެ. ރަށުން ބޭރުގައި ކުޅުނު މެޗު ނިމުނީ 1-1 ން އެއްވަރު ވެގެންނެވެ. މެޗު ފަށައިގެން 9 ވަނަ މިނިޓްގައި ކޫންޑޭ ލަނޑު ޖަހާ ބާސެލޯނާ އަށް ލީޑް ހޯދައިދިން ނަމަވެސް ހާފް ނިމެންދެންވެސް ލީޑްގައި ނޯވެވުނެވެ. ގެޓާފޭ އިން ނަތީޖާ ހަމަހަމަ ކުރީ 34 ވަނަ މިނިޓްގައި އަރަމްބާރީ ޖެހި ލަނޑުންނެވެ.
މިއީ ލަލީގާގައި ބާސެލޯނާއިން ޕޮއިންޓް ގެއްލުވާލި ވިދިވިދިގެން ހަތަރު ވަނަ މެޗެވެ. އެކަމަކު ކޮޕަ ޑެލްރޭ އާއި ސްޕެނިޝް ސުޕަރ ކަޕް ހިމެނޭ ގޮތަށް ވިދިވިދިގެން ހަތަރު މެޗުން ބާސެލޯނާ މޮޅުވެފައެވެ.
ގެޓާފޭ ސަޕޯޓަރުންގެ ފަރާތުން ބާލްޑޭ އަށް ނަސްލީ ގޮތުން ދިމާކުރި މައްސަލަ އޭނާ އާއި ކޯޗު ހަންސީ ފްލިކް ވަނީ މެޗަށްފަހު ވަރަށްބޮޑަށް ފާހަގަކޮށްފައެވެ. ބާލްޑޭ ބުނީ މެޗުގެ ތެރެއިންވެސް އޭނާ އެކަން ރެފްރީގެ ސަމާލުކަމަށް ގެނައި ކަމަށެވެ. ކޯޗު ހަންސީ ފްލިކް ބުނީ ނަސްލީ ދިމާކުރުމުގެ މައްސަލައަކީ ވަރަށްބޮޑު މައްސަލައެއް ކަމަށާއި, އެފަދަ މީހުން ސްޓޭޑިއަމްއަށް ނުގޮސް ތިބެން ޖެހޭނީ ގޭގައި ކަމަށެވެ.
ބާސެލޯނާގެ އިތުރުން އެއްވަނައިގައި އޮތް އެތްލެޓިކޯ މެޑްރިޑަށްވެސް މޮޅެއް ނުވެވުނެވެ. 1-0 ން ލެގަނޭސް އަތުން ބަލިވި މެޗުގައި ގްރިޒްމަން އަތުން ޕެނަލްޓީއެއް ވެސް ނާކާމިޔާބުވިއެވެ.
ޕޮއިންޓް ތާވަލް އޮތް ގޮތުން އެތްލެޓިކޯ މެޑްރިޑް އެއްވަނައިގައި އޮތީ 20 މެޗުން 44 ޕޮއިންޓާ އެކުއެވެ. ބާސެލޯނާ އޮތީ 20 މެޗުން 39 ޕޮއިންޓާއެކު ތިން ވަނައިގައެވެ. ރެއާލް 19 މެޗުން 43 ޕޮއިންޓާއެކު ދެވަނައިގައި އޮތުމުން މެޗުގެ އަދަދު ހަމަކޮށް, އެއްވަނައަށް ޖެހިލުމުގެ ފުރުޞަތު އެބައޮތެވެ.
ރިއެކްޝަންސް
