ހަމަލާތައް ހުއްޓާލުމަށް އެއްބަސްވުމާއެކު އެތައްހާސް ބަޔަކު ޣައްޒާގެ މަގުތަކަށް ނިކުމެ އުފާފާޅުކުރަނީ, އިޒްރާއިލްގެ ހަމަލާތައް ކުރިއަށް
ހަމަލާތައް ހުއްޓާލުމަށް ވީ އެއްބަސްވުން އިޢުލާން ކުރިފަހުންވެސް ޣައްޒާގައި 30 މީހަކު ޝަހީދުކޮށްލައިފި
އިޒްރާއިލްއިން ޣައްޒާގައި ހިންގަމުންދާ ޤަތުލް އާންމަށް 467 ދުވަސް ވީފަހުން ހަމަލާތައް ވަގުތީގޮތުން ހުއްޓާލުމާބޭހޭ އެއްބަސްވުމަކަށް މިވަނީ އާދެވިފައެވެ. އެއްބަސްވުމުގެ މެދުވެރިއެއްގެ ދައުރު އަދާކުރި ޤަތަރުން ބުދަ ދުވަހު މިވަނީ އެކަން މުޅި ދުނިޔެއަށް އިއުލާނުވެސް ކޮށްފައެވެ.
މި ޙަބަރާއެކު ޣައްޒާގެ މަގުތަކަށް އެތައްހާސް ރައްޔިތުން ނިކުމެ ދަނީ އުފާފާޅުކުރަމުންނެވެ. އެކަކު އަނެކަމުގައި ގައިގައި އޮޅުލާ, އުފާވެރިކަމުގެ ގޮވެލިތަކުން ޣައްޒާގެ ޖައްވުގައި އުފާވެރިކަމުގެ ރާގެއް ކުޅެވެމުންދާ ކަމުގެ އިޙްސާސް ވީޑިއޯތައް ބަލާލުމުން ކުރެވެއެވެ.
ހަމަލާތައް ހުއްޓާލުމަށް އެއްބަސްވެވިފައިވާކަން ޤަތަރުން ދުނިޔެއަށް އިޢުލާން ކުރިނަމަވެސް އިޒްރާއިލްއިން ބުނެފައި ވަނީ އެއްބަސްވުމުގައި މުޅިން އެއްބަސްނުވެވޭ ކަންކަން އެބަހުރި ކަމުގައެވެ. ނަމަވެސް އެކަންކަމަށް ވަރަށް އަވަހަށް ޙައްލު ލިބިގެން ދާނެކަމަށް އުއްމީދުކުރާ ކަމަށްވެސް ބުނެފައި ވެއެވެ.
"އަހަންނަށް ޤަބޫލެއްވެސް ނުކުރެވޭ ބިރުވެރި ހުވަފެނެއްފަދަ އަހަރަކަށްވުރެ ގިނަދުވަސް ވީ އެދުވަސްތަކަށް އެންމެ ފަހުން ނިމުން އަންނަނީ ކަމެއް. އަހަރެމެންގެ ތެރެއިން އެތައް ބަޔަކު އަހަރެމެންނާ ވަދާއު ކިޔައިފި. އަހަރެމެންގެ ހުރިހާއެއްޗެއްހެން ގެއްލިއްޖެ" ޣައްޒާ ސިޓީގެ ނުސައިރަތު ރެފިއުޖީ ކޭޕްމް ކައިރީގައި ހުރެ އަލްޖަޒީރާ އާ ވާހަކަ ދައްކަމުން 45 އަހަރުގެ ރަންދާ ސަމީހް ބުނެފައި ވެއެވެ.
ރަންދާ އިތުރަށް ބުނީ އެމީހުންގެ ނަފްސުތަކަށް އިންތިހާ ހަމަޖެހުމާއި އަރާމު ބޭނުންވާކަމަށެވެ. އަދި ހަމަލާތައް ހުއްޓާލުމުން އޭނާ އެންމެ ފުރަތަމަ ދާނީ ހަނގުރާމައިގައި ދުނިޔެ ދޫކުރި އޭނާގެ ބޭބެ އާއި އާއިލާއަށް ޒިޔާރަތް ކުރުމަށް ސަހަރާއަށް ކަމުގައެވެ. "އަހަރެމެން އެމީހުން ވަޅުލީ ދިއެރް-އެލް ބަލަޙްގެ ގަބުރުސްތާނެއްގަ. އެމީހުންގެ މަހާނަތައް ހުންނަންވާ ގޮތަކަށް ނޫން އޭރު ބެހެއްޓީ. އަހަރެން ބޭނުން އެމީހުންގެ މަހާނަ ގައުތަކުގައި ނަން ލިޔެ ރީތިކޮށް ބަހައްޓަން" ރަންދާ ބުންޏެވެ.
ހަމަލާތަކުގައި ޒަޙަމްވެފައިވާ މީހުންތައް ތޮތްޖެހިފައި އޮތް ދިއެރް އެލް-ބަލަޙްގެ އަލް-އަޤްޞާ މާޓައިރްސް ހޮސްޕިޓަލްގެ ކައިރިއަށްވެސް އެތައްސަތޭކަ ބަޔަކު އެއްވެ އުފާ ފާޅުކުރަނީއެވެ. ފަލަޞްޠީނުގެ ދިދަތައް ހޫރުވާ, އުފާވެރިކަމާއެކު ލަވަކިޔާ ޝުއޫރުރައް ފާޅުކުރަނީއެވެ. އެހެން ނުވާންވީ ސަބަބެއް ނެތެވެ. 15 މަސްދުވަހު އެތައް ވޭނުގައި އެތައްބަޔަކު އެމިހުން ދޫކޮށް ގޮސް 42 ދުވަހަށް ނަމަވެސް ހަމަނޭވާއެއް ލާނެ ފުރުޞަތު އެންމެ ފަހުން ލިބުނީއެވެ.
އެއްވެފައިވާ މީހުންތަކުތެ ތެރޭގައި ވާނުވާއެއްނޭނގި ބައެއް ކުޑަކުދިންތައްވެސް ތިއްބެވެ. ހަނގުރާމާއިގެ ހާލަތުގައި ބޮޑެތި މީހުން އެހާ އުފާފާޅުކުރާ ސަބަބު އަދި އެކުދިންނަށް ފަހުމް ނުވަނީ ކަންނޭނގެއެވެ. ބައެއް ކުދިން މީހުންތަކުގެ ތެރޭގައި މަޝްހޫރޫ ފަލަޞްޱީނުގެ މިނިވަންކަމާގުޅޭ ހަރަކާތްތައް ދައްކާ އެތަން ވީޑިއޯ ކުރަން ފުރުޞަތު ދީގެންވެސް އުފާވެރިކަމާއެކު ތިއްބެވެ.
"އަހަރެމެންގެ ހުރިހާ އެއްޗެއް ގެއްލިފައިވީނަމަވެސް މިވަގުތު އަހަރެން މިހުރީ ވަރަށް އުފާވެފަ. އަހަރެން އުފާވިޔަދީ" ޣައްޒާ ސިޓީއަށް ނިސްބަތްވާ 27 އަހަރުގެ އަބްދުލް ކަރީމް އަލްޖަޒީރާ އަށް ބުނެފައި ވެއެވެ. އެނާ ބުނީ އޭނާގެ އަންހެނުންނާއި ކުދިންނާ އެތައް ދުވަހަކަށް-ފަހު ބައްދަލުވެވޭނެތީ އޭނާ ހުރީ ވަރަށް އުފަލުން ކަމުގައެވެ. ހަނގުރާމަ ފެށުމާއި އެކު އެމީހުންވަނީ ޣައްޒާގެ ދެކުނަށް ބަދަލުވެފައި ކަމުގައި ކަރީމް ބުންޏެވެ. "އަހަރެން އުއްމީދުކުރަން އެމީހުން އެނބުރި އައުމަށް ވީހާވެސް އަވަހަށް ފުރުޞަތު ލިބޭނެކަމަށް".
ދެކުނު ޣައްޒާގެ ޙާންޔޫނުސްގެ އެކި ހިސާބުތަކުގައިވެސް ބޮޑެތި ޖަމާއަތްތަކަށް މީހުން އެއްވެ ދަނީ އުފާ ފާޅުކުރަމުންނެވެ. ބައެއް މީހުން ބޮޑެތި ބެރުތައް ހިފައިގެން ބެރުޖަހަމުން އުފާފާޅުކުރަމުންދިޔަތަންވެސް ފެނުނެވެ.
ރިއެކްޝަންސް
