އިޒްރާއިލް-ހަމާސް ހަމަލާތައް ހުއްޓާލުމާގުޅޭ އެއްބަސްވުމުގައި އޮތީ ކީކޭ! ހަނގުރާމަ ނިމެނީތަ!
ކައިރޯ (އޭޕީ) - ޤަތަރުގައި ކުރިއަށްދާ އިޒްރާއިލް-ހަމާސްގެ ހަނގުރާމަ ހުއްޓާލުމާބެހޭ މަޝްވަރާތައް ގާތްގަނޑަކަށް ނިމިފައިވާ ކަމަށް ރިޕޯޓްތައް ބުނެފިއެވެ. ހަމަލާތައް ހުއްޓާލުމާގުޅޭ ގޮތުން އެއްބަސްވެވިފައިވާ ދެލިކޮޕީ އާ އެއްގޮތަށް ނިމިއްޖެ ނަމަ ޣައްޒާގައި އިޒްރާއިލްއިން ހިންގަމުންދާ އުދުވާނު 42 ދުވަހަށް ހުއްޓާލާނެއެވެ.
މީގެ އިތުރުން ހަމާސްގެ އަތްދަށުގައި ތިބި އިޒްރާއިލްގެ އަސީރުންގެ ތެރެއިން ބަޔަކު މިނިވަން ކުރުމަށް ވަނީ ހަމަޖެހިފައެވެ. ބަދަލުގައި އިޒްރާއިލްގެ ޖަލުތަކުގައި ތިބި ފަލަޞްޠީނުގެ އެތައް ސަތޭކަ ބަޔަކު މިނިވަން ކުރާނެއެވެ. އަދި އޭގެ ބަދަލުގައި ހަމާސްއިން 33 ރަހީނުން މިނިވަން ކުރާނެއެވެ. އޭގެތެރެއިން ފުރަތަމަ މިނިވަންކުރުމަށް ހަމަޖެހިފައިވަނީ އަންހެނުނާއި, ކުޑަކުދިން, އަދި އުމުރުން ދުވަސްވީ މީހުންނާއި ބަލިމީހުންނެވެ.
ހަމަލާތައް ހުއްޓާލުމާބެހޭ އެއްބަސްވުމުގެ ފުރަތަމަ ފިޔަވައްސެއްގެ ގޮތުން ޣައްޒާގައި ތިބި އިޒްރާއިލްގެ ސިފައިން ޣައްޒާގެ ބިން ދޫކޮށް އިޒްރާއިލްގެ ބޯޑަރާ ހިސާބަށް ފަހަތަށް ޖެހޭނެއެވެ. އަދި ފަލަޞްޠީނުގެ ރައްޔިތުން އެމީހުންގެ ސުންނާފަތިވެފައިވާ ގެތަކަށް އަނބުރާ ދިއުމުގެ ހުއްދަވެސް ލިބޭނެއެވެ. މީގެ އިތުރުން ޣައްޒާއަށް އެހީގެ ތަކެތި ފޯރުކޮށްދިނުމުގެ މަގުތައް ހުޅުވާލެވިގެން ދާނެއެވެ.
އެއްބަސްވުމުގެ ފުރަތަމަ ދުވަހު ހަމާސްއިން އެމީހުންގެ އަތްށުގައި ތިބި މީހުންގެ ތެރެއިން ތިން އަސީރުން މިނިވަން ކުރަންޖެހޭނެއެވެ. އަދި ހަތްވަނަ ދުވަހު އިތުރު ހަތަރު މީހަކު މިނިވަން ކުރަންޖެހޭނެއެވެ. އޭގެ ފަހުން ކޮންމެ ހަފުތާއަކުވެސް އަސީރުން މިނިވަން ކުރާނެއެވެ.
ސުވާލަކީ ހަމާލާތައް ހުއްޓާލުމާގުޅޭ އެއްބަސްވުމުގެ ފުރަތަމަ މަރުޙަލަހާ ކަޑައްތުކުރެވިދާނެ ބާއެވެ!
އެކަން ބިނާވެގެންދާނީ ކުރިއަށްއޮތް ހަފުތާތަކުގެ ތެރޭގައި މަޝްވަރާކުރެވި އެއްބަސްވާ އެއްބަސްވުންތަކެއްގެ މައްޗަށެވެ. އެ މަޝްވަރާތަކުގައި އިޒްރާއިލް އާއި ހަމާސް އަދި ޤަތަރާއި މިޞްރުގެ މެދުވެރިން ޣައްޒާ އިދާރީގޮތުން ހިންގުމާބެހޭ އުނދަގޫ މައްސަލަ އަށް ޙައްލެއް ހޯދުމަށް މަސައްކަތް ކުރާނެއެވެ. އެކަމަކީ ވުމަށް ވުރެ ނުވުން ގާތްކަމެއް ކަމަށް ތަޖުރިބާކާރުން ބުނަމުންދާއިރު އިޒްރާއިލްއިން ބޭނުންވަނީ ހަމާސް ނެތިކޮށްލާށެވެ.
42 ދުވަހުގެ ފަހުން އެއްބަސްވުމުގެ ދެވަނަ މަރުހަލާއަށް ދަތުރުކުރުމުގެ ކުރިން އިޒްރާއިލްއިން ހަމާސް ނެތިކޮށްލުމަށް ކުރިއަށްގެންދާ ކެމްޕެއިން އަލުން ފެށުން އެކަށީގެންވެއެވެ. ނަމަވެސް އޭރުންވެސް ހަމާސްގެ އަތްދަށުގައި ރަހީނުންގެ ބަޔަކު ބާކީ ތިބޭނެއެވެ.
މިހާރު އޮތް ދެލިކޮޕީއާއެކު ހަމަލާތައް ހުއްޓާލުމުގެ ޑީލަށް ހަމާސްއިން އެއްބަސްވެފައިވާ ކަމުގައި އޮފިޝަލުންނާ ހަވާލާދި އެސޯސިއޭޓް ޕްރެސްގައި ބުނެފައި ވެއެވެ. ނަމަވެސް އެއްބަސްވުމުގެ ތަފްޞީލްތަކާއެކު އިޒްރާއިލްއިން އަދިވެސް މަޝްވަރާކުރަން ބޭނުންވާކަމުގައިވެސް އެނޫހުގައި ބުނެފައި ވެއެވެ. މާނައަކީ އެއްބަސްވުމަކަށް އާދެވޭއިރު އޭގެން ބައެއް ޝަރުރުތަކަށް ބަދަލުއައުން އެކަށީގެން ވުމެވެ. ނޫނީ މުޅި ޑީލް އެއްކޮށް ގެއްލުމަކީވެސް ވެދާނެ ގޮތެކެވެ.
ހަމަލާތައް ހުއްޓާލުމާގުޅޭ ދެލިކޮޕީގެ 42 ދުވަސްވެސް ވަނީ ތިން ފިޔަވައްސަކަށް ބަހާލާފައެވެ. އެގޮތުން:
ފިޔަވަހި-1:
· ހަމާސްގެ 33 އަސީރުން މިނިވަން ކުރުން, އޭގެތެރޭގައި ހިމެނޭ އަންހެނުން (އާންމުން އަދި ސިފައިން), ކުޑަކުދިން އަދި 50 އަހަރުން މަތީގެ މީހުން
· އިޒްރާއިލްގެ ޖަލުތަކުގައި ޤައިދީންގެ ތެރެއިން ހަމާސްއިން މިނިވަން ކުރާ އާންމުންގެ ކޮންމެ މީހަކަށް 30 ޤައިދީން އަދި އަންހެން ސިފައިންގެ މީހަކަށް 50 ޤައިދީން
· ހަމަލާތައް ހުއްޓާލުން, އަދި ޣައްޒާގެ ވަޒަންވެރިން ދިރިއުޅޭ ސަރަޙައްދުތަކުން އިޒްރާއިލްގެ ސިފައިން ފެއަށްޖެހި ޣައްޒާ ސްޓްރިޕް ނިމޭހިސާބަށް ފަހަތަށް ޖެހުން
· ވިއްސި ވިހާލިވެފައިވާ ފަލަޞްޠީނުގެ ރައްޔިތުންނަށް އެމީހުންގެ ގެތަކަށް އަނބުރާ ދިއުން އަދި ޣައްޒާއަށް އެހީގެ ތަކެތި ވަންނަށް ހުޅުވާލުން
ފިޔަވަހި-2:
· "ހަމަޖެހުން ދެމިގެންދިއުން" އިއުލާންކުރުން
· ހަމާސްގެ އަތްދަށުގައި ތިބި ފިރިހެން އަސީރުން މިނިވަންކުރުން (އާންމުން އަދި ސިފައިން ހިމެނޭހެން). ފިރިހެނުންގެ ބަދަލުގައި ފަލަޞްޠީނުގެ ޤައިދީންގެ ތެރެއިން މިނިވަންކުރާނީ ކިހާވަރެއްކަމެއް އަދި ވަނީ މަޝްވަރާ ކުރުމުގެ މަރުޙަލާގައި
· ޣައްޒާގެ ބިން ހިމެނޭ ސަރަޙައްދުން އިޒްރާއިލްގެ އެންމެހާ ސިފައިން ފޭބުން
ފިޔަވަހި-3:
· ހަމާސްގެ އަތްދަށުގައި ތިބެ މަރުވި އިޒްރާއިލްގެ އަސީރުން ގެ ހަށިގަނޑު, އިޒްރާއިލްގެ ޖަލުތަކުގައި މަރާލި ނުވަތަ މަރުވެ ފަލަޞްޠީނުގެ ޤައިދީންގެ ހަށިތަކާ ބަދަލުކުރުން
· ޣައްޒާ އަލުން އާބާދުކުރުމުގެ ޕްލޭނަށް އަމަލުކުރަން ފެއްޓުން
· ބޯޑަރު ހުރަސްކޮށް ޣައްޒާގެ ރައްޔިތުން އިޒްރާއިލް އައިސް ގޮސްވުމުގެ ހަރަކާތް ހުޅުވާލުން
މިހާރު ހުށަހަޅާފައި ދެލިކޮޕީގައި ވާގޮތުން އިޒްރާއިލްގެ ސިފައިން ޣައްޒާގެ ބިމުން ފައިބާއިރު އިޒްރާއިލް-ޣައްޒާގެ ބޯޑަރުގެ ބަފަރ ޒޯނުން ކިލޯމީޓަރެއް (0.6 މޭލު) ހާ ތަން ފަހަތަށް ޖެހެންޖެހޭނެއެވެ. އެސޯސިއޭޓް ޕްރެސްއަށް ލިބިފައިވާ އެއްބަސްވުމުގެ ކޮޕީގައި ވާގޮތުން އެއްބަސްވުމުގެ ފުރަތަމަ ހަފުތާގައި ނެޓްޒަރިމް ކޮރިޑޯ (އުތުރު އަދި ދެކުނު ކޯސްޓަލް ރޯޑުން ރަޝީދު ސްޓްރީޓް އާ ހަމައަށް) ދޫކޮށްދާންޖެހޭނެއެވެ. ނެޓްޒަރިމް ކޮރިޑޮއަކީ ހަނގުރާމަ ފެށިފަހުން އުތުރު ޣައްޒާ އާއި ޣައްޒާގެ އެހެނިގެން ސަރަޙައްދުތައް ވަކިކޮށް އިޒްރާއިލްއިން ކޮންމެ ވަގުތެއްގައި އެސަރަޙައްދުގެ ހަރަކާތް އިޒްރާއިލްގެ ފުރިހަމަ ކޮންޓްރޯލްގެ ދަށަށް ގެނައުމަށް ޤާއިމްކުރި ބެލްޓް-ކްރޮސްއެކެވެ.
އިޒްރާއިލް ސިފައިން ނެޓްޒަރިމް ކޮރިޑޯ ދޫކޮށް ދިއުމާއެކު ޣައްޒާގެ އެކި ސަރަޙައްދުތަކުގައި ވިއްސި ވިހާލިވެފައިވާ އުތުރު ޣައްޒާގެ ރައްޔިތުންނަށް އެނބުރި އެމީހުންގެ ގެތަކަށް ދިއުމަށް މަގުފަހިވާނެއެވެ. އެއްބަސްވުމުގެ 22 ވަނަ ދުވަހު އިޒްރާއިލް ސިފައިން ނެޓްޒަރިމް ކޮރިޑޯ ސަރަހައްދު އެއްކޮށް ދޫކޮށް ދާންޖެހޭނެއެވެ.
ދެލިކޮޕީއާ އެއްގޮތަށް ޑީލް އަދިވެސް ފައިނަލް ނުވެގެން އުޅެނީ ނެޓްޒަރިމް ކޮރިޑޯ ދޫކޮށްލަން އިޒްރާއިލްއިން މުޅިން އެއްބަސްވުމަކަށް އައިސްފައި ނުވާތީ ކަމުގައި އޮފިޝަލުންނާ ޙަވާލާދީ އެސޯސިއޭޓް ޕްރެސްގައި ބުނެފައި ވެއެވެ.
ރިއެކްޝަންސް
