ހަނގުރާމަވެރިން ދިމިޝްޤު ހިފުމާއިއެކު ބައިގަރުނުވީ އަސަދުގެ އާއިލީ ވެރިކަން ނިމި ބައްޝާރުލް އަސަދު ޤައުމުދޫކޮށް ފިލައިފި
ސީރިއާގައި 24 އަހަރު ވަންދެން ވެރިކަން ކުރަމުންދިޔަ ބައްޝާރުލް އަސަދުއާ ދެކޮޅަށް ހަނގުރާމެރި ޖަމާޢަތް ތަކުން ކާމިޔާބު ހޯދާ ވެރިރަށް ދިމިޝްޤް އެމީހުންގެ ބާރުގެ ދަށަށް ގެނެސްފިއެވެ. މިއާއެކު ރައީސް ބައްޝާރުލް އަސަދު ފިލައިގެން ޤައުމުދޫކޮށް ގޮސްފައިވާކަމަށް ރޮއިޓާސްއިން ރިޕޯޓްކޮށްފައި ވެއެވެ. ނަމަވެސް ބައްޝާރު ފިލައިގެން ދިޔައީ ކޮންތަނަކަށް ކަމެއް ނޭނގޭކަމަށް އެ ނޫހުން ބުނެފައިވެއެވެ.
ހަނގުރާމަވެރިން ވަނީ ސީރިއާގެ ޕަބްލިކް ރޭޑިއޯ އާއި ޓީވީގެ އިތުރުން އެޤައުމުގެ މައި އެއަރޕޯޓްވެސް އެމީހުންގެ ބާރުގެ ދަށަށް ގެނެސްފައެވެ. "އަސަދު ގައުމު ދޫކޮށް ފިލައިފި. އަސަދުގެ ކިބައިން ސީރިއާ މިނިވަންވެއްޖެކަން އަހަރެމެން އިއުލާންކުރަން" އިދިކޮޅު ހަނގުރާމަވެރިންގެ މެސެޖްގައި ބުނެފައި ވެއެވެ.
ރޮއިޓާރސް އިން ރިޕޯޓްކޮށްފައިވާ ގޮތުގައި ހަނގުރާމަވެރިން އަސަދުގެ މައްޗަށް ހޯދި ކާމިޔާބީ އާއެކު ސީރިއާގެ އެތައް ރައްޔިތުންނެއް ދަނީ މަގުތައް މައްޗަށް ނިކުމެ އުފާ ފާޅުކުރަމުންނެވެ. ހަނރާމަވެރިން މިހާރު ވަނީ ދިމިޝްގުގެ އިތުރުން ސީރިއާގެ މުޙިއްމު އެހެން ސިޓީއެއް ކަމަށްވާ ހިމްސްވެސް އެމީހުންގެ ބާރުގެ ދަށަށް ގެނެސްފައިވާކަމަށް އިޢުލާންކޮށްފައެވެ.
ހަނގުރާމަވެރި ޖަމާއަތް, ޙަޔާތު ތަޙްރީރް އަލް-ޝާމްގެ ކޮމާންޑަރު އަބޫ މުޙައްމަދު އަލް-ޖުލާނީއާ ހާވާލާދީ އަލް ޖަޒީރާގައި ރިޕޯޓް ކޮށްފައިވާގޮތުން ބާރުތައް ރަސްމީކޮށް ހަވާލުކުރަންދެން ސީރިއާގެ ދައުލަތުގެ ހުރިހާ މުއައްސަސާއެއް ވަގުތީގޮތުން ބަލަހައްޓަވަމުން ގެންދާނީ އަސަދު ސަރުކާރުގެ ބޮޑުވަޒީރު މުޙައްމަދު އަލް ޖަލާލީ ކަމުގައި ވަނީ އިއުލާންކޮށްފައެވެ.
ބޮޑުވަޒީރު އަބޫ މުޙައްމަދު ޤާޒީ އަލް-ޖިލާލީ މިވަގުތު ހުންނެވީ އޭނާގެ ގޭގައި ކަމަށާއި, އިދިކޮޅާއެކު މަސައްކަތްކުރުމަށް އޭނާ ތައްޔާރަށް ހުންނެވިކަމަށް އަލްޖަޒީރާއިން ރިޕޯޓް ކޮށްފައިވެއެވެ. ހަނގުރާމަވެރިންގެ ކޮމާންޑަރު އަލް-ޖުލާނީ ވަނީ ބޮޑު ވަޒީރަށާއި ސަރުކާރުގެ މުއައްސަސާތަކަށް އެއްވެސް ހަމަލާއެއް ދީގެން ނުވާނެކަމަށް ހަނގުރާމެރިންނަށް އަމުރުކޮށްފައެވެ. އަސަދުގެ ސަރުކާރުގެ ސިފައިން ވަނީ ހަތިޔާރު ބަހައްޓާ, ހަނގުރާމަވެރިންނަށް އަމާންދީފައިކަމަށް ރޮއިޓާސްއިން ރިޕޯޓްކޮށްފައިވެއެވެ.
ހަނގުރާމަވެރިން އަސަދުގެ މައްޗަށް ކުރި ހޯދީ އަސަދުގެ ސަރުކާރުގެ އަނިޔާވެރިކަމާ ދެކޮޅަށް އެމީހުން ހަނގުރާމަ ކުރާތާ 13 އަހަރު ފަހުންނެވެ. ވެރިކަމުގައި ބައްޝާރު 24 އަހަރު ހުރި އިރު އޭނާ ސީރިއާގެ ރައީސްކަމަށް އިސްވީ 2000 ވަނަ އަހަރު އެވެ. އެއީ 1971, މާރިޗު 14 ގައި އޭރު ވެރިކަމުގައި ހުންނެވި އަސަދުގެ ބައްޕާފުޅު ހާފިޒް އަލް އަސަދު އަވަހާރަވުމާ ގުޅިގެންނެވެ. ހަނގުރާމްވެރިންގެ ކާމިޔާބީ އާއެކު ބައްޝާރުގެ ވެރިކަމުގެ އިތުރުން އަސަދުގެ އާއިލީ ވެރިކަމުގެ ސިއްކަވެސް މިހާރުވަނީ ޖެހިފައެވެ. އަސަދުގެ އާއިލާއިން ސީރިއާގައި ވެރިކަން ކުރަމުންދާތާ ބައިގަރުނަށްވުރެ ގިނަދުވަސް ވަނީ ވެފައެވެ.
ބައްޝާރުލް އަސަދުގެ ސަރުކާރުގެ ހިމާޔަތަށް ދިމިޝްޤުގެ ބޭރުގައި ހަރަކާތްތެރިވަމުންދިޔަ ހިޒްބުاللهގެ ހަނގުރާމަވެރިންވެސް އެސަރަޙައްދު ދޫކޮށް ގޮސްފައިވާކަމަށް އެސަރަހައްދުގެ ހަނގުރާމައިގެ ހާލަތު މޮނިޓަރ ކުރާ ސީރިއަން އޮބްޒަވޭޓަރީ ފޮރ ހިއުމަން ރައިޓްސްއިން ވަނީ ބުނެފައެވެ. އެ ޖަމްޢިއްޔާއިން އިތުރަށް ބުނެފައިވާ ގޮތުގައި އުތުރު ދިމިޝްގުގައި ހުންނަ އަނިޔާވެރިކަމަށް މަޝްހޫރު 'ސެދްނާޔާ' ޖަލުގެ ދޮރުތައްވެސް މިހާރު ހުރީ ހުޅުވާލާފައެވެ.
ސީރިއާ ސަރުކާރާ ދެކޮޅަށް ހަނގުރާމަ ކުރާ ފަރާތްތަކާ ދެކޮޅަށް އަސަދުގެ ސަރުކާރުން 2011 ވަނަ އަހަރުން ފެށިގެން ކުރިއަށް ގެންދަމުންދާ އަހުލީ ހަނގުރާމައިގައި މިހާތަނަށް ބައިމިލިއަނަށް ވުރެގިނަ ސީރިއާގެ ރައްޔިތުން މަރުވެފައިވާއިރު, އެތައްހާސް ބަޔަކު ވަނީ އަސަދުގެ އަނިޔާވެރިކަމުން ސަލާމަތްވުމަށް އަވައްޓެރި ލުބުނާން އާއި އެހެން ސަރަޙައްދު ތަކަށް ހިޖުރަކޮށްފައެވެ.
ސީރިއާގެ ހާލަތު ފާއިތުވެ ދެތިންދުވަހު ގޯސްވުމާއި ގުޅިގެން ޤަތަރު, ސައުދީ އެރޭބިއާ, ޢުރުދުން, މިޞްރު, އިރާޤް, އީރާން, ތުރުކިޔޭ އަދި ރަޝިއާ ގުޅިގެން ރޭ ވަނީ ބަޔާނެއް ނެރެފައެވެ. މިބަޔާނުގައި ސީރިއާގެ މިހާރުގެ ހާލަތާއެކު މަޞްރަހް ގޯސްވިޔަ ނުދިނުމަށް ސިޔާސީ ޙައްލެއް ބޭނުންވާކަމަށް ގޮވާލާފައިވެއެވެ.
ރިއެކްޝަންސް
