އިޤްތިޞާދު ރަނގަޅުކުރުމަށް ފައިނޭންސް ލިބޭނެ އިތުރު އިންތިޒާމުތައް ހަމަޖައްސަވައިދެއްވުމަށް ރައީސުލްޖުމްހޫރިއްޔާގެ އަރިހުގައި, ތޮއްޑޫ ކައުންސިލުން އެދިއްޖެ
ވައުދުވެވަޑައިގެންނެވި ކަންކަން ބަޖެޓްގައި ހިމަނުއްވައިގެން ކުރިއަށް ގެންދަވާނެ ކަމުގެ ޔަގީންކަން ރައީސް ދެއްވި
އިޤްތިޞާދު ރަނގަޅުކުރުމަށް ފައިނޭންސް ލިބޭނެ އިތުރު އިންތިޒާމުތައް ހަމަޖައްސަވައިދެއްވުމަށް ރައީސުލްޖުމްހޫރިއްޔާގެ އަރިހުގައި, ތޮއްޑޫ ކައުންސިލުން އެދިއްޖެއެވެ. ތޮއްޑޫ ކައުންސިލުން ރައީސުލްޖުމްހޫރިއްޔާގެ އަރިހުން މިކަމަށް އެދިވަޑައިގަތީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަރިއަތޮޅު އުތުރުބުރި ތޮއްޑޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއެކު މިއަދު އެކައުންސިލްގައި ބޭއްވެވި ބައްދަލުކުރެއްވުމުގައެވެ.
ތޮއްޑޫ އަކީ މިހާރުވެސް އިގްތިޞާދީ ގޮތުން އެންމެ ފުދުންތެރި އެއް ރަށެވެ. މީގެއިތުރުން ތޮއްޑޫ ކައުންސިލުން ވަނީ އެރަށުގެ ޞިއްޙީ ޚިދުމަތް ދިނުމުގައި ހުރި ގޮންޖެހުންތައް ފާހަގަކުރައްވައި، މިހާރަށްވުރެ ފެންވަރު ރަނގަޅު ޞިއްޙީ މަރުކަޒެއް ޤާއިމުކޮށްދެއްވުމަށްވެސް އެދިވަޑައިގެންފައެވެ. އަދި ތޮއްޑޫގެ ސްކޫލުގެ ޖާގައިގެ ދަތިކަމަށް ހައްލެއް ހޯއްދަވައިދެއްވުމަށްވެސް އެދިވަޑައިގެންނެވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ އެމަނިކުފާނު ވަޢުދުވެވަޑައިގެންފައިވާ ކަންކަން ބަޖެޓުގައި ހިމަނުއްވައިގެން ކުރިއަށްގެންދަވާނެ ކަމަށެވެ. އަދި ރަށުގެ މަގު ހެދުމުގެ މަޝްރޫޢުވެސް ކުރިއަށް ގެންދަވާނެކަމުގައި އެމަނިކުފާނު ވިދާޅުވިއެވެ. ރަށުގެ ތަރައްޤީއަށްޓަކައި ވަޢުދުވެވަޑައިގެންފައިވާ ގޮތަށް އަންނަ އަހަރުގެ ބަޖެޓުގައި ހިމެނިގެން ސިއްޙީ މަރުކަޒު ފުޅާކުރެވި، ޚިދުމަތްތައް އިތުރުކޮށްދެވޭނެ ކަމަށް ރައީސް ވިދާޅުވިއެވެ. އަދި ރަށު ސްކޫލް، އެއް ދަންފަޅިއަށް ބަދަލުކޮށް، އޭލެވެލްއަށް ޖާގަ ހެދުމަށް ބޭނުންވާ ކްލާސްރޫމްތަކާއި ވަޞީލަތްތައް ގާއިމުކުރުމުގެ މަސައްކަތްވެސް އަންނަ އަހަރު ކުރިއަށްގެންދަވާނެކަމަށް ވިދާޅުވިއެވެ. މީގެއިތުރުން ތޮއްޑޫގައި ޑޮލަރު އޭޓީއެމް އެއް ގާއިމުކޮށްދެއްވާނެ ކަމަށާއި، ބޭންކިންގ ޚިދުމަތްތައް ރައްޔިތުންނަށް ރަށުގައި ތިބެގެން ލިބޭނެ މަގުފަހިކޮށްދެއްވާނެ ކަމުގެ ޔަގީންކަން ދެއްވިއެވެ.
ރައީސަކު އެރަށަކަށް ވަޑައިގެން އެ ރަށެއްގެ ރައްޔިތުންނާ މަޝްވަރާކުރައްވައިގެން އެ ރަށެއްގެ ތަރައްޤީގެ ކަންކަން ބައްޓަން ކުރެއްވުމަކީ އެރަށަކަށް އެންމެ ރަނގަޅު ގޮތްކަން ތޮއްޑޫ ކައުންސިލުން ބައްދަލުވުމުގައި ފާހަގަކުރެއްވިއެވެ.
ތޮއްޑޫ ކައުންސިލާއެކު ބެއްވި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ތޮއްޑޫގެ ތަރައްޤީއަށް ކުރިއަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ.
މި ބައްދަލުކުރެއްވުމަށްފަހު ރައީސުލްޖުމްހޫރިއްޔާ ވަނީ ތޮއްޑޫ ކައުންސިލްގެ މެހެމާނުން ސޮއިކުރައްވާ ފޮތުގައި ސޮއިކުރައްވާފައެވެ.
ރިއެކްޝަންސް
