ޣައްޒާ ހައިހޫނުކަމުގައި, ހަނގުރާމައިގެތެރޭގައި އާއިލާތަކުގެ ބަނޑުފުރާނަ މުއްތިކުރިމަށް މަސްވެރިންނަށް އެތައް ތަކުލީފެއް!
ޚާން ޔޫނުސް, ޣައްޒާ – (ރޮއިޓާސް) އިޒްރާއިލްގެ އަސްކަރިއްޔާއިން ޣައްޒާގައި ހިންގަމުން ގެންދާ ޢުދުވާނަށް އަހަރަކަށްވުރެ ގިނަ ދުވަސްވަނީ ވެފައެވެ. މެދުތެރޭ ޣައްޒާގައި ހަމަލާތައް ކުޑަކޮށް މަދުވެފައިވާއިރު އާއިލާތަކުގެ ބަނޑުފުރާނަ މުއްތިކުރުމަށް މަސްވެރިން މަދުމަދުން އައްސޭރިފަށަށް ޖަމާވާން ފަށައިފިއެވެ. އެމީހުން ގެންގުޅޭ މަސްހިފާ ދާތައް ހިފައިގެން ގޮތްހުސްވެފައިވާ ހާލު މޫދު ކައިރީގައި މަހެއް ހިފޭތޯ މަސައްކަތް ކުރާއިރު މުޅި ޣައްޒާ ވަނީ ބަނޑުހައިހޫނު ކަމުގައެވެ.
ހަނގުރާމަ ފެށުނީއްސުރެ ފުރައިގެން ކާނާ ހޯދަން ކަނޑަށް ފުރައިގެން ދިއުން ވަނީ ދިރިހުރުމަށްވުރެ ބިރުވެރިކަމަށް ވެފައެވެ. އެހެންކަމުން މިހާރުވެސް ޣައްޒާގެ މަސްވެރިން މަސްލިބޭތޯ މަސައްކަތް ކުރަނީ ގޮނޑުދޮށަށް ދާ އެއްލައިގެންނެވެ. ނުވަތަ ދޮށި ބޭނުންކޮށްގެންނެވެ.
ޙާން ޔޫނުސްގައި ދިރިއުޅޭ 71 އަހަރުގެ އިބްރާހިމް ގުރާބް އާއި 24 އަހަރުގެ ވަސީމް އަލް މަސްރީ އައްސޭރި ފަށުގައި ހުރި އެމީހުންގެ ޓެންޓްތަކުގައި ކުދިކުދި ކޮރަކަލި ނުވަތަ މުށިމަސް ފާޑުގެ މަސްހިފުމުގައި މަޝްޢޫލުވެގެން ތިއްބެވެ. "ދިރިއުޅުން ވަރަށް ދަތި. ބައެއް މިހުން ކާނާއެއް ލިބޭތޯ އުޅުނަސް މިތަނަށް އެހީގެ އެއްވެސް މިންވަރެއް މިހާރަކު ނުލިބޭ. ހަނގުރާމަ ފެށުނުތާ ކައިރީ ކޮންމެވެސް ވަރަކަށް އެހީގެ ސާމާނު ލިބުން. އެކަމަކު މިހާރު އެއްގޮތަކަށްވެސް ނުލިބޭ" ގުރާބް ރޮއިޓާސްއަށް ބުންޏެވެ. ގުރާބް އާއި މަސްރީ ފަދަ އެތައް މަސްވެރިންނެއް ކޮންމެ ދުވަހަކު އެތައް ދަމެއްވަންދެން މަހެއް ލިބޭތޯ ގޮނޑުދޮށުގައި ހަރަކާތްތެރިވެއެވެ. ނަމަވެސް ގިނަ ދުވަސް ދުވަހު ކިރިޔާ އާއިލާއަށް ކާލާ ވަރުވެ ފައިސާއެއް ހޯދަން ވިއްކާލާނެ މަހެއް ނުލިބޭ ކަމުގައި އެމީހުން ބުނެއެވެ.
މަސްވެރިކަމަކީ ހަނގުރާމައިގެ ކުރީގައި ޣައްޒާގެ އަހުލުވެރިންގެ ދިރިއުޅުމުގެ މުޙިއްމު ބައެކެވެ. މަސްވެރިން ބަނާ މަސް މާރުކޭޓުތަކުގައި ވިއްކައިގެން ރަނގަޅު އާމްދަނީ އެއް ހޯދައެވެ. މުޅި ޣައްޒާގެ އާބާދީއަށް ފުދޭވަރަށް އެމީހުން މަސްބާނައެވެ. އޭރު މަސްވެރިކަމަށް އާންމުކޮށް ނިކުންނަނީ ކުދި ދޯނި ފަހަރުގައި ނިކުމެވެން ހުއްދަ އޮންނަ ސަރަޙައްދަށެވެ. އަދި މާރުކޭޓުތަކުގައި ތާޒާކަމާއެކު އެކިބާވަތުގެ މަސްލިބެން އަބަދުވެސް ހުރެއެވެ.
އޭގެ ބަދަލުގައި މިހާރު އާއިލާގެ ހައިހޫނުކަށް ފިލާވަރުވެސް ގިނަފަހަރު ވަނީ ކިރިޔާއެވެ. އިޒްރާއިލްއިން އަޅާފައި އޮންނަ ފިޔަވަޅުތަކާއި, ކުއްލި ކުއްލިއަށް ދޭ ހަމަލާތަކާއެކު އާމްދަނީ ހޯދޭނެ ދޮރުތައް ވަނީ ބަންދުވެފައެވެ. ލިބެން ހުރި މަދު ތަކެތީގެ އަގު ވަނީ އިންތިހާއަށް މައްޗަށް ޖެހިފައެވެ. ހަމަ އެއާއެކު މަސްވެރިކަމުގައި އައްސޭރި ފަށުގައި ޙަރަކާތްތެރިވާ މަސްވެރިންނަށްވެސް އިޒްރާއިލްގެ ސިފައިންގެ ހަމަލާތަކާ ކުރިމަތިލާން ޖެހެއެވެ.
"ފުރާނަ އަތްމައްޗަށް ލައިގެންވިއަސް އަހަރެމެންނަށް މިތަނަށް އައުންނޫން ގޮތެއްނެތް." ކަނޑުގެ މަގުންވެސް އިޒްރާއިލްގެ ސިފައިން އެއްގަމުގައި ތިބޭ މަސްވެރިންނަށް ހަމަލާ ދެމުންދާކަމަށް އަލް މަސްރީ ރޮއިޓާސްއަށް ބުންޏެވެ. އޭނާގެ ކައިރީގައި ހުރި ގުރާބު ވެސް ބުނީ ހާން ޔޫނުސްގެ ގޮނޑުދޮށުގައި މަސްހިފަން އުޅޭ މީހުންނަށް އެތައް ފަހަރެއްގެ މަތިން އިޒްރާއިލްގެ ސިފައިން ހަމަލާދިން ކަމަށެވެ.
އިޒްރާއިލްގެ ސިފައިން ޣައްޒާގެ ގޮނޑުދޮށްތަކުގައި ތިބޭ މަސްވެރިންނަށް ދޭ ހަމަލާތަކާ ގުޅިގެން އެއްޗެއް ވިދާޅުވުމަށް ނޫހުގެ ފަރާތުން އިޒްރާއިލްގެ އަސްކަރިއްޔާގައި އެދުނު އެދުމަށް އަސްކަރިއްޔާއިން މިހާތަނަށް ޖަވާބު ދީފައިނުވާކަމަށް ރޮއިޓާސްއިން ބުނެފައި ވެއެވެ.
ރިއެކްޝަންސް
