ޕާކިސްތާނުގެ ރޭލް ސްޓޭޝަނެއްގައި ދިން ވަރުގަދަ ޖާނުންފިދާވުމުގެ ހަމަލާއެއްގައި 24 މަރު!
ފާކިސްތާނުގެ އިރުދެކުނު ސަރަޙަދެއްގެ ރޭލްވޭ ސްޓޭޝަނެއްގައި ދިން ޖާނުންފިދާވުމުގެ ހަމަލާއެއްގައި މަދުވެގެން 24 މީހުން މަރުވެފައިވާ ކަމަށް އޮފިޝަލުން ބުނެފިއެވެ. ހޮނިހިރު ދުވަހު ދިން މިހަމަލާގައި މަރުވި މީހުންގެ ތެރޭގައި ރޭލްވޭގެ މުވައްޒަފުންނާއި ސިފައިންގެ މީހުންވެސް ހިމެނޭކަމަށް އޮފިޝަލުންނާ ހަވާލާދީ އެސޯސިއޭޓް ޕްރެސްގައި ރިޕޯޓްކޮށްފައި ވެއެވެ. މި ހާދިސާގައި 50 ށް ވުރެ ގިނަ މިހުން ޒަޙަމް ވެފައިވާއިރު, ޒަޚަމްވި ބައެއް މީހުންގެ ހާލު ވަރަށް ނާޒުކު ކަމަށްވެސް ރިޕޯޓްކޮށްފައި ވެއެވެ.
ހަމަލާދިން ސަރަޙައްދުގައި 100 އެއްހާ ފަސިންޖަރުން މަޑުކޮށްގެން ތިބި ކަމަށާއި, އެއީ ގެރިސަން ސިޓީން ރާވަލް ޕިންޑީ އަދި ބަލޯޗިސްތާނުގެ ވެރިކަންކުރާ ސިޓީ, ގެޓާއަށް ދަތުކުރުކުމަށް ހަމަޖެހިފާ ބަސް ދަތުރުކުރާ ސްޓޭޝަން ކަމަށް ސަރުކާރުގެ ފަރާތުން ވާހަކަދެއްކި އޮފިޝަލް ހަމްޒާ ސަފްގާތް ވިދާޅުވެފައިވެއެވެ.
ޓީވީ ވީޑިއޯ ފުޓޭޖުން ފެންނަ ގޮތުގައި ރޭލްވޭ ސްޓޭޝަންގެ ސްޓީލް ސްޓްރަކްޗަރ އާއި ފުރާޅު ވަކިވެ, ވިއްސައިގޮސްފައިވާ މަންޒަރު ފެނެއެވެ. އެތާނގައި ހުރި ސައި ވިއްކާ ސްޓޯލްއެއްވެސް ވަނީ ހަލާކުވެފައެވެ. އަދި ފޮށިތަކާއި އަތްދަބަސްތައް އަދި ފަސިންޖަރުންގެ ސާމާނުތައް އެތައް މިތަނަށް ވިއްސައިގެންގޮސްފައިވާ މަންޒަރުވެސް ފެނެއެވެ.
ޕާކިސްތާނުގެ ފުލުހުންވެސް ވަނީ މި ހަމަލާގައި މަރުވި މީހުންގެ ދެބައިކުޅަ އެއްބަޔަކީ ސިފައިންނާއި ސްޓޭޝަންގެ މުވައްޒަފުން ކަން ކަށަވަރުކޮށްދީފައެވެ. ހިނގާފައި ސްޓޭޝަނަށް ވަންނަ ހުރިހާ ގޭޓޭއްގައިވެސް ގޮވާތަކެތި ދެނެގަނެވޭނެ ނިޒާމް ހަރުކޮށްފައި ހުރި ނަމަވެސް އެފަދަ ނިޒާމްތައް ނެތި ހުރި އެހެން ގޭޓްތައް ސްޓޭޝަންގައި ހުރިކަމަށް ފުލުހުން ވަނީ ބުނެފައެވެ. އަދި ޖާނުންފިދާވުމުގެ ހަމަލާ ދިން މީހާ ހުރީ އާންމު ހެދުމުގައި ފަސިންޖަރުންގެ ތެރޭގައި ކަމަށްވެސް ފުލުހުން ބުނެފައި ވެއެވެ.
ރިއެކްޝަންސް
