އާބަން ސަރަހައްދުތައް ތަރައްޤީ ކުރާނީ ރައްޔިތުންގެ މަޝްވަރާއާއެކު މާސްޓަރ ޕްލޭނުގައި ހިމަނައިގެން- ރައީސް
އާބަން ސަރަހައްދުތައް ތަރައްޤީ ކުރާނީ ރައްޔިތުންގެ މަޝްވަރާއާއެކު ކުރިއަށް އޮތް 20 އަހަރަށް އެކުލަވާލާ މާސްޓަރ ޕްލޭނުގައިވެސް ހިމަނައިގެން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވެ ޕޯސްޓެއް ކުރައްވާފައި މިވަނީ އާބަން ސަރަހައްދުތަކުގެ ގޮތުގައި ތަރައްޤީކުރާ 7 ރަށެއް ކަނޑައަޅާ އިއުލާނުކުރުމާއެކު އިދިކޮޅު ފަރާތްތަކުގެ ފާޑުކިއުން އަމާޒުވަމުން ދަނިކޮށެވެ. ބެލެވޭ ގޮތުގައި ރައީސްގެ ޕޯސްޓަކީ އިދިކޮޅު ފަރާތްތަކަށް ދެއްވި ރައްދެކެވެ. ރައީސުލްޖުމްހޫރިއްޔާ ވިދާޅުވީ އާބަން ސަރަހައްދުތައް ކަނޑައަޅާ ތަރައްޤީ ކުރުމަކީ އެމަނިކުފާނުގެ މެނިފެސްޓޯގައިވެސް ހިމަނުއްވާ, އަދި އެތައް ޖަލްސާއެއްގައި އެވާހަކަ ތަކުރާރުކުރައްވަމުން ގެންދަވާ ކަމެއް ކަމަށެވެ. މެނިފެސްޓޯގައި އެބައި ހިމަނުއްވާފައިވާ މާއްދާތައް ވެސް ރައީސް ވަނީ ފާހަގަކުރައްވާފައެވެ.
ރައީސުލްޖުމްހޫރިއްޔާ ވިދާޅުވީ ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަންގެ އިތުރުން އެންމެ މަތީ ފަންތީގެ ޚިދުމަތްތައް ހިމެނޭހެން، އެންމެ އުތުރުގެ 3 އަތޮޅު ހިމެނޭހެން ނޮރދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ 4 އަތޮޅު ހިމެނޭހެން ސަރދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުމަކީ މެނިފެސްޓޯގައި ހިމެނޭ އެމަނިކުފާނުފެ ވައުދެއް ކަމަށެވެ. އަދި 7 އަރބަން ސެންޓަރު (މާލެއިން އުތުރުން 3، މާލެއިން ދެކުނުން 4) ތަރައްޤީ ކުރުން އެއީ ސަރުކާރުގެ ސިޔާސަތު ކަމަށް ވިދާޅުވިއެވެ.
" މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްޤީގެ މާސްޓަރޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ޤަސްދުކުރާ ކަންކަން." ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ކަންކަމުގެ ހަގީގަތް ނުބައްލަވާ، ނުވަތަ ޙަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން ކަމަށެވެ. ރައީސް މިފަދައިން ވިދާޅުވެފައި މިވަނީ އަރބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެފައި ވަނިކޮށެވެ. އަދި މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައި ދެކެވަޑައިގަންނަވާ ކަމަށްވެސް ވިދާޅުވެފައި ވަނިކޮށެވެ.
ރިއެކްޝަންސް
