މުދަލު ޒަކާތުގެ ގޮތުގައި މިދިޔަ އަހަރު 100 މިލިއަނަށްވުރެ ގިނަ ރުފިޔާ ލިބިއްޖެ
މިއީ އަހަރެއްގެ ތެރޭގައި މުދަލު ޒަކާތުގެ ގޮތުގައި ލިބުނު އެންމެ މަތީ އަދަދު
މުދަލު ޒަކާތުގެ ގޮތުގައި މިދިޔަ އަހަރު 100 މިލިއަނަށްވުރެ ގިނަ ރުފިޔާ ލިބިއްޖެއެވެ. އެކަން ފާހަގަކޮށް އިސްލާމިކް މިނިސްޓްރީން މިއަދު ނެރުނު ބަޔާނެއްގައި ބުނީ މިއީ ތާރީޚުގައިވެސް އެއް އަހަރެއްގެ ތެރޭގައި މުދަލު ޒަކާތުގެ ގޮތުގައި ލިބުނު އެންމެ މަތީ އަދަދު ކަމަށެވެ.
މީރާގެ ހިސާބުތަކުން ދައްކާގޮތުން މިދިޔަ އަހަރު މުދަލު ޒަކާތުގެ ގޮތުގައި 101,939,070.15 ރުފިޔާ (ސަތޭކަ އެއް މިލިއަން ނުވަލައްކަ ތިރީސް ނުވަހާސް ހަތްދިހަ ރުފިޔާ ފަނަރަ ލާރި) ލިބިފައި ވެއެވެ. އިސްލާމިކް މިނިސްޓްރީން ބުނީ މިއީ ޒަކާތަށް މީހުން އަހުލުވެރިކުރުވުމުގެ ނަތީޖާ ކަމަށެވެ. ޒަކާތާ ގުޅުންހުރި ކަންކަމަށް މިދިޔަ އަހަރުގެ ތެރޭގައި މީހުން އަހުލުވެރިކޮށް, ހޭލުންތެރިކުރުމަށް ގިނަ ހަރަކާތްތަކެއް ހިންގުނުކަން މިނިސްޓްރީން ފާހަގަކުރެވިއެވެ.
މިދިޔަ އަހަރުގެ ޖެނުއަރީ މަހު ދިވެހިރާއްޖޭގެ ޒަކާތު ހައުސް ވަނީ އިފްތިތާހުކޮށްފައެވެ. ހޭލުންތެރިކުރުވުމުގެ ޕްރޮގްރާމްތައް ކުރިއަށް ގެންދިޔައީ ޒަކާތު ހައުސްއިން ނެވެ.
މިނިސްޓްރީން ވަނީ ރާއްޖޭގައި ތިބި ތަނަވަސް ފަރާތްތަކުން ޒަކާތަށް ދެއްވި އަހައްމިޔަތު ފާހަގަކޮށް ޝުކުރު އަދާކޮށްފައެވެ. ޒަކާތުގެ ގޮތުގައި ލިބޭ ފައިސާ އަބަދުވެސް ޚަރަދުކުރަނީ ޝަރުއީ އުޞޫލުތަކާއި މިންގަނޑު ތަކުގައި ކަނޑައަޅާފައިވާ ގޮތުގެ މަތީން އޭގެ ހައްގުވެރިންގެ މައްޗަށްކަމުގެ ޔަގީންކަން މިނިސްޓްރީން ވަނީ ދީފައެވެ.
ރިއެކްޝަންސް
