ކައިލް ވޯކަރ ބޭނުންވަނީ ސިޓީ ދޫކޮށްލަން: ގާޑިއޯލާ
މެންޗެސްޓަރ ސިޓީގެ އިނގިރޭސި ޑިފެންޑަރ އެ ކްލަބް ދޫކޮށްލަން ބޭނުންވާކަން ހާމަކޮށްފައިވާކަމަށް ކޯޗު ޕެޕް ގާޑިއޯލާ ބުނެފިއެވެ.
އެފް އޭ ކަޕްގައި ހޮނިހިރު ދުވަހު 8-0 ން މެންޗެސްޓަރ ސިޓީން ސަލްފޯޑް ސިޓީގެ މައްޗަށް ކުރިހޯދި މެޗުގައި ސިޓީގެ ސްކޮޑުން ކެޕްޓަން ވޯކަރ ފެނިފައެއް ނުވެއެވެ. އެކަމާ ގުޅޭގޮތުން ނޫސްވެރިން ކުރި ސުވާލަކަށް ޖަވާބުދެމުން ކޯޗު, ގާޑިއޯލާ ވަނީ އެކަން ހިނގައި ދިޔަގޮތް ސާފުކޮށްދީފައެވެ. ގާޑިއޯލާ ބުނީ ޖެނުއަރީ ޓްރާންސްފަރ ވިންޑޯގައި 'އެހެން ޤައުމަކަށް' ބަދަލުވާން ބޭނުންވާކަމަށް ކްލަބްގެ ފުޓްބޯޅަ ޑިރެކްޓަރަށް ވޯކަރ އަންގާފައިވާ ކަމުގައެވެ.
"އަހަންނަށް ފަސޭހައެއް ނޫން ބުނާކަށް. އެކަމަކު އަހަރެން ބުނަންޖެހޭ. އޭނާ މިތާކު ނެތް. އެކަމަކު މީގެ ދެދުވަސްކުރިން އޭނާ ބުނެފައިވަނީ އޭނާގެ ފުޓްބޯޅާ ކެރިއަރު ފަހުކޮޅު ހޭދަކުރަން ބޭނުންވަނީ ޤައުމުން ބޭރުގައޭ. އޮޕްޝަންތައް އެކްސްޕްލޯރ ކޮށްދިނުމަށް އޭނާ ވަނީ ފުޓްބޯޅަ ޑިރެކްޓަރު ކައިރިން އެދިފައި" ނޫސްވެރިންގެ ބައްދަލުވުމުގައި ގާޑިއޯލާ ބުންޏެވެ.
ގާޑިއޯލާ އިތުރަށް ބުނީ ވޯކަރ އަކީ އެމީހުންގެ ރައިޓް ބެކް ކަމަށާއި އެމަޤާމަށް ކުޅޭ އެހެން ކުޅުންތެރިއަކު ކްލަބްގައި ނެތްކަމަށެވެ. ނަމަވެސް ވަރަށްގިނަ ސަބަބުތަކާހުރެ ކެރިއަރުގެ ފަހު ދުވަސްތައް ޤައުމުން ބޭރުގައި ކުޅުމަށް އޭނާދަނީ ބަލަމުން ކަމުގައެވެ. "އެހެންވެ, ކުޅުންތެރިންގެ ސިކުނޑި މިތާގައި (ސިޓީއާއެކު) ތިބި މީހުންނާއެކު ކުޅެވޭތޯ މިބަލަނީ" ރޭގެ މެޗުން ވޯކަރ ނުފެނުނު ސަބަބު ސާފުކޮށްދެމުން ގާޑިއޯލާ ބުނެފައި ވެއެވެ.
2023 ވަނަ އަހަރުވެސް ވޯކަރ އަށް ބަޔާން މިއުނިކުން ދެއަހަރުގެ އެއްބަސްވުމެއް ހުށަހެޅުމާއިއެކު ގާތްގަނޑަކަށް ސިޓީ ދޫކޮށްލުމާ ގާތަށް ދިޔައެވެ. ނަމަވެސް ވޯކަރ ގެ ނިންމުން ބަދަލުކުރުމުގައި އެފަހަރު ގާޑިއޯލާ ވަނީ އިސް ދައުރެއް އަދާކޮށްފައެވެ. ގާޑިއޯލާ އާ އެކު ބޭއްވި ޕްރައިވެޓް ޑިނަރ އަކަށް ފަހު ވޯކަރ ވަނީ އިތުރު ތިން އަހަރު ސިޓީގައި މަޑުކުރުމަށް ނިންމާފައެވެ. ކްލަބުން ފަހުން ވަނީ އޭނާއަށް ސިޓީގެ ކެޕްޓަންކަލން ވެސް ދީފައެވެ.
ރިއެކްޝަންސް
