ބޮޑުހިލަ ބަލްކުކޮށް ގެންނަން ނިންމައިފިން- ރައީސް މުއިއްޒު
ހުއްޓިފައިހުރި ބިނާރުގެ މަސައްކަތްތައް އަލުން ފެށުމަށް ބޭނުންވާ ބޮޑުހިލަ ބަލްކުކޮށް ގެންނަން ނިންމައިވާފައިވާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރަށްރަށުގެ ބައެއް މަޝްރޫއުތައް ހުއްޓިފައިވާ ސަބަބެއްގެ ގޮތުގައި ބޮޑު ހިލަ ނެތުން ފާހަގަކުރައްވައެވެ.
ގދ.ރަތަފަންދޫގައި ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ މެޓީރިއަލް އަދި ފައިސާގެ ތާށިކަމާހެދި މަޑުޖެހިފައިހުރި މަޝްރޫޢުތައް އަލުން ފެށްޓެވުމުގެ މަސައްކަތް ކުރައްވަމުންގެންދަވާ ކަމަށެވެ. އެގޮތުން ދިވެހިރާއްޖޭގެ އެކިއެކި ރަށްތަކުގައި މިގޮތަށް ހުއްޓިފައިހުރި މަޝްރޫޢުތަކަށް ބޭނުންވާ ތަކެތި ހޯއްދެވުމަށް، މިފަދަ މަޝްރޫޢުތަކަށް އެންމެ ބޮޑަށް ބޭނުންވާ ބޮޑުހިލަ ހޯދުމަށްޓަކައި، މިދިޔަ ހަފުތާ ތެރޭގައި މިކަމާ ގުޅިގެން ކުންފުނިތަކުގެ ވެރިންނާއި ފިނޭންސް މިނިސްޓަރާއި ކޮންސްޓްރަކްޝަން މިނިސްޓަރާއި ބައްދަލުކުރައްވައި، މިކަން ހަމަޖެއްސުމަށް ގޮތްތަކެއް ރޭވިފައިވާ ކަމަށް ވިދާޅުވިއެވެ. އެގޮތުން ބޮޑުހިލަ ބަލްކުކޮށް ގެނައުމަށް ނިންމާފައިވާ ކަމަށް ވިދާޅުވިއެވެ. އެކަމަށް ބޭނުންވާ ފައިސާ ވެސް މިދިޔަ ހަފުތާގެ ތެރޭގައި ހަމަޖައްސައިދީފައިވާކަމަށް ރައީސް ވިދާޅުވިއެވެ.
ރަށްރަށުގެ ރައްޔިތުންނާއި ކައުންސިލްތަކުގެ އެންމެބޮޑު ކަންބޮޑުވުމަކީ އެރަށްރަށުގައި ފަށާފައި އެކިމަރުހަލާގައި ހުރި މަޝްރޫއުތަކާއި, ސޮއިކޮށްފައިވާ މަޝްރޫއުތައް ނުފެށި ނުވަތަ ހުއްޓިފައި ހުރުމެވެ. ރައީސުލްޖުމްހޫރިއްޔާ ވިދާޅުވެފައިވަނީ މިއަހަރަކީ މިއީ ތަރައްޤީގެ އަހަރު ކަމަށާއި, ވައުދާ އެއްގޮތަށް ކަންކަން ފުރިހަމަ ކޮށްދެއްވާނެ ކަމަށެވެ.
ރިއެކްޝަންސް
