ޣައްޒާއަށް އެހީގެތަކެތި ފޯރުކޮށްދިނުމުގެ މަސައްކަތް އޮތީ ކޮންމެ ވަގުތެއްގައިވެސް ހުއްޓިދާނެފަދަ ހާލަތެއްގައި : އދ
އިޒްރާއިލް ސިފައިން އަދި ފަލަޞްޠީނުގެ ގްރޫލްތަކުންވެސް ދަނީ އިންސާނީ އެހީ ފޯރުކޮށްދިނުމަށް ހުރަސްއަޅަމުން: އޯސީއެޗްއޭ
ފަލަޞްޘިނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުން އޮތީ ކުރިއަށް ނުގެންދެވޭ ފަދަ ހާލަތެއްގައި ކަމަށް ޔުނައިޓަޑް ނޭޝަންސް ހިއުމެނިޓޭރިއަން އެޖެންސީ (އޯސީއެޗްއޭ) އިން ހޯމަ ދުވަހު ނެރުނު ބަޔާނެއްގައި އެޖަމާއަތުން ބުނެފައި ވެއެވެ.
"އެހީ ފޯރުކޮށްދިނުމަށް ކުރަމުންދާ މަސައްކަތްތަކަށް ބޮޑެތި ހުރަސްތައް އިޒްރާއިލްގެ އަސްކަރިއްޔާގެ ފައުޖުތަކުން އެބަ ކުރިމަތި ކުރުވާ. އެހީ ދިނުމުގައި ހަރަކާތްތެރިވާ ފަރާތްތަކަށާއި, އުޅަނދުތަކަށް އަމާޒުކޮށް ހަމަލާތައް ދަނީ އިތުރުވަމުން. އަދި މީގެ އިތުރުން ހަނގުރާމައިގެ ސަބަބުން ޤާނޫނާއި ގަވާއިދުތައް ނެތިގޮސްފައިވާ ޣައްޒާގެ ގޭންގްތަކުންނާއި ހަތިޔާރުއެޅި ގްރޫޕްތަކުންވެސް ނުރައްކާތައް ދަނީ ކުރިމަތިވަމުން" އޯސީއެޗްއޭގެ ބަޔާނުގައި ބުނެފައި ވެއެވެ.
އދ ގެ ހިއުމެނިޓޭރިއަން އެފެއަރޒް ގެ އަންޑަރ ސެކެޓްރީ, ޓޮމް ފްލެޗަރ ވިދާޅުވިގޮތުގައި ހަޤީގަތަކީ އދ ން ކާނާއާއި, ބޯފެން އަދި ބޭހާއި ސިއްހީ އެހީތެރިކަން ފޯރުކޮށްދިނުމަށް ކެނޑިނޭޅި މަސައްކަތް ކުރަމުންދާ ކަމެވެ. ނަމަވެސް ފުރާނަ ސަލާމަތްކުރުމަށް ކުރަމުންދާ މަސައްކަތް މިވަނީ ހުއްޓާލަންޖެހިދާނެ ކަމުގެ ބިރު ހީވެފައެވެ.
އޮފިޝަލާ ހަވާލާދީ އަލް ޖަޒީރާގައި ވާގޮތުން އިއްޔެ އެކަނިވެސް އިޒްރާއިލްގެ ސިފައިން ވަނީ ޣައްޒާގެ ދެކުނުން އުތުރަށް ދަތުރުކުރި އދ ގެ ކާނާގެ ގާފިލާތަކަށް އަމާޒުކޮށް 16 ފަހަރު ހަމަލާ ދީފައެވެ. ހަމަލާތަކުގައި ވަރލްޑް ފުޑް ޕްރޮގްރާމް (ޑަބްލިއުއެފްޕީ) ގެ ތިން މުވައްޒަފަކު ވަރަށް ބޮޑަށް ޒަޚަމެވެފައިވާކަމަށްވެސް އޮފިސަރު ބުނެފައި ވެއެވެ.
"އެހީ ފޯރުކޮށްދިނުމަށް ކުރަމުންދާ މަސައްކަތަށް ޣައްޒާގައި ހަރަކާތްތެރިވާ ގޭންގް ތަކުގެ ނުރައްކާވެސް އެބައޮތް. މީގެ ދެދުވަސްކުރިން ކަރެމް އަބޫ ސަލެމް ކޮރޮސިންގް އިން އަހަރެމެންގެ ހަ ތެޔޮ ޓޭންކަރު އެމީހުން ވަނީ ހައިޖެކްކޮށްފަ. އެހިސާބުގަ ތެޔޮ ނެތި އަހަރެމެންގެ އޮޕަރޭޝަންތައް އެތައް ގަޑިއިރަކަށް ހުއްޓުނު. އެންމެ ސިކުންތަކީވެސް އިންސާނީ އެހީތެރިކަމުގައި ނާޒުކު ސިކުންތެއް" ފްލެޗަރ ބުނެފައި ވެއެވެ.
އޭނާ އިތުރަށް ބުނެފައި ވަނީ ޣައްޒާގައި މަދަނީ އުސޫތައް ނުހިނގާއިރު އިޒްރާއިލްއިންވެސް އދ ގެ އެހީގެ ގާފިލާތަކަށް ރައްކާތެރިކަން ދިނުމުގެ ބަދަލުގައި ވެފައިވަނީ ނުރައްކަލަކަށް ކަމަށެވެ. އުޅަނދުތަކުގައި ބޮޑުކޮށް 'UN' ޖަހާފައި އޮތްނަމަވެސް އިޒްރާއިލްގެ ހަމަލާތައް އެއްވެސް ބެލުމެއްނެތި ދަނީ އަމާޒުވަމުން ކަމުގައެވެ.
އދ ގެ އެޖެންސީތަކުން އަންދާޒާ ކުރާގޮތުގައި ޣައްޒާގައި 1.6 މިލިއަން މީހުން މިވަގުތު ދިރިއުޅެމުންދަނީ ފޭލިގެތަކުގައެވެ. ނަމަވެސް އެ ފޭލިގެ ތަކަކީ ގަދަ ވަޔާއި ފިނިން ރައްކާތެރިކަށް ލިބޭގޮތަށް ހުރި ތަންތަން ނޫންކަމުގައި ވެސް އެފަރާތުން ވަނީ ފާހަގަކޮށްފައެވެ. މެޑިޓެރޭނިއަން ކަނޑުގެ އައްސޭރީގައި އެކަނިވެސް 135,000 ފޭލިގެ ޖަހާފައި ހުރިއިރު އޭގޭތެރެއިން 110,000 ޓެންޓު ވަނީ ވީދި, މޫސުމީ ރައްކާތެރިކަން ލިބޭ ހާލަތަށްވުރެ ދަށުގައެވެ.
ރިއެކްޝަންސް
