ހަމަލާތައް ހުއްޓާލަން އެއްބަސްވީފަހުން އިޒްރާއިލްއިން ޣައްޒާގައި 116 މީހުން ޝަހިދުކޮށްލައިފި
އިޒްރާއިލްގެ ކެބިނެޓުންވަނީ އެއްބަސްވުމަށް ރުހުންދީފައި
ހަމަލާތައް ހުއްޓާލުމަށް އެއްބަސްވީފަހުން އެންމެ މަދުވެގެން 116 މީހަކު ޣައްޒާގައި ޝަހީދުކޮށްލައިފިއެވެ. ޣައްޒާގެ މަދަނީ ދިފާއުން ބުނިގޮތުގައި އެއްބަސްވުން އިއުލާން ކުރުމުގެ ފަހުން އިޒްރާއިލްއިން ޣައްޒާގައި ދިން ހަމަލާތަކުގައި އިތުރު 264 މީހަކު ވަނީ ޒަޙަމްވެފައެވެ.
މަދަނީ ދިފާއުގެ ތަރުޖަމާނު މަޙްމޫދު ބަސަލް ބުނި ގޮތުގައި ޝަހީދުވި މީހުންގެ ތެރޭގައި 32 އަންހެނުންނާއި 30 ކުޑަކުއްޖަކުވެސް ހިމެނެއެވެ.
ހަމަލާތައް ހުއްޓާލުމާބެހޭ އެއްބަސްވުމަށް އަމަލުކުރަން ހަމަޖެހިފައިވަނީ އާދިއްތަ ދުވަހުއެވެ. އިޒްރާއިލްގެ އިޒްރާއިލްގެ ކެބިނެޓުން މިހާރުވަނީ އެއްބަސްވުމަށް ރުހުންދީފައިކަމުގައި އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫ ވަނީ އިއުލާންކޮށްފައެވެ.
އެއްބަސްވުމުގެ އަނެއް ޙަސްމު, ހަމާސްއިންވެސް މީގެ ކުރިން ވަނީ ބުދަ ދުވަހު އިއުލާން ކުރި އެއްބަސްވުމަށް އެ ޖަމާއަތުން ފުރިހަމައަށް ބޯލަނބާނެ ކަމަށް ބުނެފައެވެ.
ޣައްޒާގެ މަދަނީ ދިފާއުން ބުނި ގޮތުގައި ޝަހިދުވި މީހުންގެ ތެރެއިން 92 މީހުންނަކީ އުތުރުގެ ސަރަޙައްދުތަކުން ޝަހީދުކޮށްލާފައިވާ މީހުން ކަމުގައެވެ. އަދި ދެކުނުގެ ރަފަޙް އަދި ޚާން ޔޫނުސްއިން ވަނީ 19 މީހަކު ޝަހީދުކޮށްލާފައެވެ. ބާކީ ފަސް މީހުން ޝަހީދުކޮށްލާފައިވަނީ މެދުތެރޭ ޣައްޒާގެ ސަރަޙައްދު ތަކުގައެވެ.
އިޒްރާއިލްގެ ހަމަލާތައް ހުއްޓުމެއްނެތި ދެމުންދާތާ 469 ދުވަސް ވެފައިވާއިރު ހަމަލާތަކުގައި މިހާތަނަށް 46,788 މީހަކު ޝަހީދުވެފައިވާކަމަށް ރަސްމީ އަދަދުތައް ބުނެއެވެ. ޒަޙަމްވީ މީހުންގެ އަދަދު ވަނީ އެއްލައްކަށް ވުރެ މަތިވެފައެވެ.
ރިއެކްޝަންސް
