ހަމަލާތައް ހުއްޓާލުމާބެހޭ ޑީލް, ހަމާސްއިން 34 އަސީރުން މިނިވަން ކުރަން ތައްޔާރު: ރިޕޯޓް
ޤަތަރުގައި މިހާރު ކުރިއަށްދާ ހަމަލާތައް ހުއްޓާލުމާބެހޭ މަޝްވަރާތަކުގައި 34 އަސީރުން މިނިވަންކުރުމަށް ހަމާސްއިން އެއްބަސްވެފައިވާކަމަށް ރިޕޯޓްތައް ބުނެފިއެވެ. އިޒްރާއިލްއާ ހަމާސްގެ މެދުގައި ކުރިއަށްދާ މަޝްވަރާތަކުގެ ތެރެއިން, ހަމާސްގެ މެމްބަރަކާ ހަވާލާދީ ރޮއިޓާސް އަދި އޭއެފްޕީ ނިއުސް އެޖެންސީން މިކަން ވަނީ ކަށަވަރުކޮށްދީފައެވެ.
ފަލަޞްޠީނުގެ ޣައްޒާގެ ކަންކަން ބަލަހައްޓާ (ހަމާސް) ގްރޫޕް އިން އަސީރުން މިނިވަން ކުރަން އެއްބަސްވެފައިވާ ކަމަށާއި މި ޑީލް ދަށުން ދެފާރާތުންވެސް އަސީރުން ބަދަލުކުރާނެ ކަމުގައި ހަމާސް އާ ޙަވާލާދީ އޭއެފްޕީން ރިޕޯޓްކޮށްފައި ވެއެވެ.
"ހަމާސްއިން 34 އަސީރުން މިނިވަން ކުރުމަށް ވަނީ އެއްބަސްވެފަ. ދިރިހުއްޓާ ނުވަތަ ނޫން ކަމަށްވިއަސް. އެކަމަކު ހަމާސްގެ ބެލުމުގެ ދަށުގައި ތިބި މީހުންނާ މުއާސަލާތު ކުރަން ހަފުތާއެއްހާ ދުވަސް ބޭނުންވާނެ. އެއީ ދިރިތިބީ ނުވަތަ މަރުވީ ކޮންބައެއްކަން ދެނެގަތުމަށް" އޮފިޝަލާ ވަހާލާދީ އޭއެފްޕީގައި ރިޕޯޓްކޮށްފައި ވެއެވެ.
ނަން ހާމަކުރަން ބޭނުންނުވާ އޮފިޝަލަކާ ހަވާލާދީ ރޮއިޓާސްއިން ބުނެފައިވާ ގޮތުގައި މި ޑީލްގެ ފުރަތަމަ ފިޔަވަހީގެ ދަށުން ފުރަތަމަ ބަދަލުކުރާނީ ޣައްޒާގައި ތިބި އަންހެނުންނާއި ކުޑަކުދިން އަދި އަދި އުމުރުންދުވަސްވީ މީހުންނާއި ބަލިމީހުންނެވެ.
ނަމަވެސް މި ޑީލް ދެމިއޮންނާނީ އިޒްރާއިލްއިން ހަމަލާތައް އެއްކޮށް ހުއްޓާލުމަށް އެއްބަސްވެ, ޣައްޒާއިން އިޒްރާއިލްގެ އަސްކަރިއްޔާގެ ސިފައިން ފޭބުމާބެހޭގޮތުން އިޒްރާއިލްއިން އެއްބަސްވާ ގޮތެއްގެ މައްޗައް ކަމަށްވެސް ނަންހާމަކުރަން ބޭނުންނުވާ އޮފިޝަލްއާ ޙަވާލާދީ ރޮއިޓާސްގައި ބުނެފައި ވެއެވެ.
އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ހޯމަ ދުވަހު މަޢުލޫމާތު ދީފައިވާ ގޮތުގައި ހަމާސްއިން މިނިވަންކުރަން އެއްބަސްވި އަސީރުންގެ ލިސްޓް އެ އޮފީހަށް އަދި ލިބިފައެއްނުވެއެވެ.
ރިއެކްޝަންސް
