ކަސްޓަމްސް މުވައްޒަފުންތަކަކަށް ތުހުމަތުކުރެވޭ މަނީލޯންޑަރިންގ އާއި ހިޔާނާތުގެ މައްސަލައެއް ބަލަމުންދާތާ 5 މަސް!
ކަސްޓަމްސް މުވައްޒަފުންތަކަކަށް ތުހުމަތުކުރެވޭ މަނީލޯންޑަރިންގ އާއި ހިޔާނާތުގެ މައްސަލައެއް ބަލަމުންދާތާ 5 މަސް ވެއްޖެކަމަށް ފުލުހުން ބުނެފިއެވެ.
މިއަދު އެމައްސަލަ މީޑިޔާތަކުގެ ސަމާލުކަމަށް އައިސް ބައެއް ނޫސްވެރިން ސުވާލުކުރުމުން ފުލުހުން ބުނީ މޯލްޑިވްސް ކަސްޓަމްސް ސަރވިސްގެ މުވައްޒަފުންތަކަށް ތުހުމަތު ކުރެވޭ މަނީ ލޯންޑަރިންގ، ހިޔާނާތް އަދި ރިޝްވަތުގެ މައްސަލައެއްގެ ތަހުގީގު މިދިޔަ އަހަރުގެ އޮގަސްޓް މަހުގެ 19 ވަނަ ދުވަހު ފަށާފައިވާ ކަމަށެވެ. ފުލުހުން ބުނީ މައްސަލަ ތަހުގީގުކުރަން ފެށީ ފުލުހުންގެ ސަމާލުކަމަށް އެމައްސަލަ އައުމާ ގުޅިގެން ކަމަށެވެ.
މައްސަލައާ ގުޅޭ އިތުރު އެއްވެސް ތަފްސީލެއް ފުލުހުން ނުދެއެވެ. އަދި މިދިޔަ ފަސް މަސް ދުވަހުވެސް އެފަދަ މައްސަލައެއް ބަލަމުންދާކަމަށް ފުލުހުން ނުބުނެއެވެ. ނަމަވެސް ބައެއް މައްސަލަތައް ފުލުހުން އިސްވެ ވަރަށް އަވަހަށް މައުލޫމާތު ހިއްސާކުރެއެވެ. އަދި ނޫސްވެރިންގެ ބައްދަލުވުން ބާއްވާ ތަހުގީގުގެ މައުލޫމާތު ހިއްސާކުރެއެވެ.
ކަސްޓަމްސްއާ ގުޅޭ މަނީލޯންޑަރިންގ އާއި ހިޔާނާތުގެ މައްސަލަ ބަލަމުންދާތާ ފަސްމަސް ދުވަސްވީއިރު އެމުއްދަތުގެ ތެރޭގައި އެތުހުމަތުކުރެވޭ ބައެއް ކަސްޓަމްސް އޮފިސަރުން ޚިދުމަތުން ރިޓަޔަރ ވެފައިވާ ކަމަށް ބައެއް ނޫސްތަކުން ވަނީ ރިޕޯރޓްކޮށްފައެވެ.
ރިއެކްޝަންސް
