މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓް ގެނެސްފި, ދެވަނަ ބޯޓް އޮކްޓޯބަރުގައި
މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓް ގެނެސް, ދެވަނަ ބޯޓް އޮކްޓޯބަރު ގެންނާނެކަން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު އިއުލާނުކުރައްވައިފި އެވެ.
މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓް ގެނައުމަށް ވެލާނާ އިންޓަރނޭޝަނަލް އެއަޕޯރޓްގައި ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ މިއީ މޯލްޑިވިއަންގެ ޚިދުމަތުގެ ފެށުމެއް ކަމަށެވެ. ގުޅުންހުރި އިދާރާތަކުން މިހާރު ކުރައްވަމުން ގެންދަވާ މަސައްކަތްތައް ނިމި ދެވަނަ ބޯޓްގެ އުދުހުންތައް އޮކްޓޯބަރު މަހު ފެށޭވަރު ވާނެ ކަމަށް ރައީސް ވިދާޅުވިއެވެ.
މިއަދު ގެނައި އެއާބަސް އޭ300 ގެ ބޯޓުން ޗައިނާގެ އިން މަންޒިލަކަށް މިމަހު ދަތުރުތައް ފަށާނެއެވެ. އޭގެއިތުރުން އެހެން ގައުމުތަކަށްވެސް ދަތުރުކުތައް ކުރާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. ޗައިނާއިން ދަތުރުކުރާ މަންޒިލްތަކަކީ ބެއިޖިންގ, ޝެންހާއީ އަދި ޗެންގްޑޫ އެވެ. ރައީސް ވިދާޅުވީ މޯލްޑިވިއަންގެ ޚިދުމަތްތައް ފުޅާކުރުމާއެކު ފަތުރުވެރިންނަށް ފަސޭހައިން ރާއްޖެ އައުމުގެ މަގު ހުޅުވިގެންދާނެ ކަމަށެވެ.
ރައީސުލްޖުމްހޫރިއްޔާ ވިދާޅުވީ އަޅުގަނޑުމެންގެ ދިވެހިން އަތްމަތީގައި އަޅުގަނޑުމެންގެ އުދުހުންތައް އޮތުމަކީ މި ޤައުމަށް ފަތުރުވެރިން ގެނައުމަށް ލިބޭ ވަރަށް ބޮޑު ކުރިއެރުމެއްކަމަށެވެ. އަދި މިއީ އަޅުގަނޑުމެންގެ އިޤްތިޞާދު ފުޅާކުރުމަށް ލިބޭ އެހީއެއްކަމަށް އެމަނިކުފާނު ވިދާޅުވިއެވެ.
‘’ކުރިއަށް މިއޮތީ، ފެށިގެން މިދިޔަ 2025 އަހަރަކީ ތަރައްޤީގެ އަހަރު. އިޤްތިޞާދީ، އުމްރާނީ، އިޖްތިމާއީގޮތުންވެސް ދިވެހި ލޮބުވެތި ރައްޔިތުންނަށް ތަރައްޤީ ފެނިގެންދާނެ އަހަރެއް.” ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސުލްޖުމްހޫރިއްޔާ ވަނީ ކުރިއަށް އޮތް ދުވަސްތަކުގައި އައިލެންޑް އޭވިއޭޝަނާއި, ވެލާނާ އިންޓަރނޭޝަނަލް އެއަޕޯރޓަށްވެސް ކުރިއެރުންތައް ގެންނަވާނެ ކަމަށް ވިދާޅުވެފައެވެ. އަދި މިއީ ތަރައްޤީގެ އަހަރު ކަމަށް ވިދާޅުވިއެވެ.
ރަސްމިއްޔާތުގައި ވާހަކަ ދައްކަވަމުން ޓްރާންސްޕޯރޓް މިނިސްޓަރ މުޙައްމަދު އަމީން ވިދާޅުވީ 2018 ވަނަ އަހަރު ނިމުނުއިރު މޯލްޑިވިއަން އޮތީ ރަނގަޅު ހާލަތެއްގައި ކަމަށެވެ. އަދި ދަތުރުކުރަމުން ދިޔައީ ރަނގަޅު މިސްރާބަކަށް ކަމަށާއި, ނަމަވެސް މިދިޔަ ފަސް އަހަރު ނިމުނު އިރު ކުންފުނީގެ ހާލަތު ގޯހުން ގޯހަށް ގޮސްފައިވާ ކަމަށް ވިދާޅުވިއެވެ. ކުންފުނީގެ ދަރަނި ބޮޑުވެ މިސްރާބު ގޯސްވީ ހިންގަން ނޭންގޭ ބައެއްގެ އަތްމައްޗަށް ދިއުމުން ކަމަށް ވިދާޅުވިއެވެ. ނަމަވެސް މިހާރު އަލުން މޯލްޑިވިއަންގެ މިސްރާބު ރަނގަޅު ކުރުމުގެ މަސައްކަތް ކުރަމުންދަނީ އައިލެންޑް އޭވިއޭޝަންގެ ހިންގުމަށްވެސް ގެންނަ ބަދަލުތަކާއެކު ކަމަށް ވިދާޅުވިއެވެ.
https://x.com/presidencymv/status/1876222278721233024
ވައިޑް ބޮޑީ އެއާކްރާފްޓް ބޯޓްގެ ދަތުރުތައް މޯލްޑިވިއަންއިން ފެށުމަކީ އޭވިއޭޝަންގެ ދާއިރާގައި މަސައްކަތް ކުރަމުން އައި އެންމެންގެވެސް ވަރަށް ބޮޑު އުއްމީދެއް ކަމަށް މިނިސްޓަރ އަމީން ވިދާޅުވިއެވެ.
ރިއެކްޝަންސް
