ޤައުމީ އެއާލައިންގެ ފުރަތަމަ ބޮޑު ބޯޓް
މިއީ 260 މީހުންގެ ޖާގައިގެ ބޯޓެއް
ޤައުމީ އެއާލައިންގެ ފުރަތަމަ ބޮޑު ބޯޓް މިއަދު މާލެ ގެނެސް މިމަހު ދަތުރުތައް ފަށަން ތައްޔާރުވެއްޖެ އެވެ.
ޤައުމީ އެއާލައިން 'މޯލްޑިވިއަން" ގެ ފުރަތަމަ ބޮޑު ބޯޓް އެއާބަސް އޭ 330 ބޯޓަކީ 260 މީހުންގެ ޖާގައިގެ ބޯޓެކެވެ. މިބޯޓުން 10 ޓަނުގެ ކާގޯ އުފުލެއެވެ. ބޯޓް ފުރަތަމަ ދަތުރުކުރަނީ ޗައިނާގެ ތިން މަންޒިލަކަށެވެ. އެއީ ބެއިޖިންގ, ޝެންހާއީ އަދި ޗެންގްޑޫ އެވެ.
އޭވިއޭޝަން ދާއިރާގެ ތާރީޚީ ދުވަހު ގައުމީ އެއާލައިންގެ ބޯޓް ސިންގަޕޫރުން މާލެ ގެނައީ ސީދާ ދިވެހި ޕައިލެޓުންނެވެ. ގައުމީ އެއާލައިން އިން ވައިޑް ބޮޑީ އެއާކްރާފްޓްގެ ދަތުރުތައް ފެށުމުން ރާއްޖެ އަންނަ ފަތުރުވެރިންގެ އަދަދުވެސް އިތުރުވެގެންދާނެ ކަމަށް ސަރުކާރުން ދެކެއެވެ. އެގޮތުން އެއަދަދު އަހަރަކު 65,000 އިތުރުވާނެ ކަމަށް އަންދާޒާ ކުރެއެވެ.
ފުރަތަމަ ދަތުރުތައް ޗައިނާއަށް ފެށިނަމަވެސް ކައިރި މުސްތަގުބަލެއްގައި އެހެން ގައުމުތަކަށް ދަތުރުތައް ފެށުމަކީ އަމާޒެވެ. އެގޮތުން ވައިޑް ބޮޑީ އެއާކްރާފްޓްގެ ދެވަނަ ބޯޓް އޮކްޓޯބަރުގައި މާލެ ގެނެސް ދަތުރުތައް ފެށޭނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ވަނީ ދެއްވާފައެވެ.
ވައިޑް ބޮޑީ އެއާކްރާފްޓް ބޯޓްތައް ގެނެސް މޯލްޑިވިއަންގެ ދަތުރުތައް ފުޅާކުރުމަކީ ރައީސް މުއިއްޒުގެ ވައުދެކެވެ.
އޭވިއޭޝަން ދާއިރާގެ ތާރީޚީ ކާމިޔާބީ ފާހަގަކުރަން ވެލާނާ އިންޓަރނޭޝަނަލް އެއަޕޯރޓްގައި ވަނީ ކުލަގަދަ ރަސްމިއްޔާތެއް ބާއްވާފައެވެ. އެގޮތުން ބޯޓް ޖެއްސުމުގެ ކުރިން އެއާ ޝޯވއެއް ކުރިއަށް ގެންދިޔައެވެ.
ރިއެކްޝަންސް
