އިޒްރާއިލް-ޣައްޒާ ހަނގުރާމައަށް 15 މަސް: 800 އަށް ވުރެ ގިނަ މިސްކިތް ބިމާ ހަމަކޮށްލައިފި

2023, އޮކްޓޯބަރ 7 ގެ ފަހުން މިއަދާ ހަމައަށް ފަލަޞްޠީނުގެ 800 އަށްވުރެ ގިނަ މިސްކިތް އިޒްރާއިލްގެ ހަމަލާތަކުގައި ބިމާ ހަމަކޮށްލައިފިއެވެ. ފަލަޞްޠީނުގެ މިނިސްޓްރީ އޮފް އަވްޤަފް އެންޑް ރިލިޖަސް އެފައަރޒް އިން އާދިއްތަ ދުވަހު ނެރުނު ރިޕޯޓެއްގައި ވާގޮތުން އިތުރު 151 މިސްކިތެއްވެސް ވަނީ ވަރަށް ބޮޑަށް ހަލާކުވެފައެވެ.

"815 މިސްކިތް އެއްކޮށް ބިމާހަމަވެފަ ވަނީ. އިތުރު 151 މިސްކިތް ބޮޑު މަރާމަތާކާއެކު ބޭނުންކުރެވިދާނެ ކަމަށް ފެނޭ. 19 ޤަބުރުސްތާނު ވެސް އެއްކޮށް ކޮނެ, ޤަބުރުތައް ނަގާ ވަރަށް އިނާނެތިކޮށް އަމަލުކޮށްފައިވަނީ. އިޒްރާއިލްއިން ކުރިއަށް ގެންދާ ހަމަލާތަކުގައި ޣައްޒާ ސިޓީގެ ތިން ޗާޗަކަށް އަމާޒުކޮށްވެސް ހަމަލާތައް ދީފައިވޭ" މިނިސްޓްރީގެ ރިޕޯޓުގައި ވެއެވެ.

Advertisement

މިނިސްޓްރީގެ ރިޕޯޓްގައި މިސްކިތްތަކަށް އަމާޒުކޮށް އިޒްރާއިލްއިން ދީފައިވާ ހަމަލާތަކުގެ ތަފްޞީލް ގެނެސްދީފައި ވެއެވެ. އޭގެ ތެރެއިން ގިނަ ހަމަލާތައް އަމާޒުކޮށްފައިވަނީ ޣައްޒާގެ މިސްކިތްތަކަށެވެ. މީގެ އިތުރުން އިޒްރާއިލްއިން ޙިޞާރުކޮށްފައިވާ ހުޅަނގު އައްސޭރީގެ ގިނަ މިސްކިތްތަކެއްވެސް ވެސް އިޒްރާއިލް އިން ވަނީ ނެތިކޮށްލާފައެވެ.

މުސްލިމުންގެ ތިންވަނަ ހަރަމްފުޅު, މަސްޖިދް އަލް-އަޤްޞާ އަށް އިޒްރާއިލްގެ ހައްދުފަހަނަ އެޅި އިސްތުއުމާރީ ވަޒަންވެރިން އެތައް ފަހަރެއްގެ މަތިން އަލް-އަޤްޞާގެ ހަރަމްފުޅު ތެރެއަށް ވަދެ ހިންގާފައިވާ މުޑުދާރު އަމަލުތައްވެސް ރިޕޯޓްގައި ކުށްވެރިކޮށްފައި ވެއެވެ.

"ފާއިތުވި އަހަރެއްހާ ދުވަހުގެ ތެރޭގައި އިޒްރާއިލްގެ ހައްދުފަހަނައެޅި އިސްތިއުމާރީ ވަޒަންވެރިން ވަނީ 256 ފަހަރެއްގެ މަތިން އަލް-އަޤްޞާ މިސްކިތުގެ ތެރެއަށް ވަދެގަނެފަ. މިސްކިތުގައި އަޅުކަން ކުރަން ތިއްބާވެސް އެތައް ފަހަރަކު މި އަމަލު ހިންގި. އޭގެ ތެރޭގައި އިޒްރާއިލްގެ ހައްދުފަހަނައެޅި މިނިސްޓަރު އިތާމަރް ބެން-ގވިރް އިސްވެ ހަނުއްކާ ފާހަގަކުރަން ޔަހޫދީންގެ ބައިގަނޑަކާއެކު އަލް-އަޤްޞާގެ ހަރިންމަ ތެރެއަށް ވައިން ވަނުންވެސް ހިމެނޭ. މިއީ އެއްވެސް ހާލެއްގައި ޤަބޫލު ކުރެވޭނެ ކަންކަމެއް ނޫން" ރިޕޯޓް ގައި ވެއެވެ.

ހޯމަ ދުވަހު އިޒްރާއިލްގެ ނެޝަނަލް ސެކިއުރިޓީ މިނިސްޓަރު ބެން-ގވިރް ވަނީ އަލް-އަޤްޞާ މިސްކިތުގެ ގޯތި ތެރޭގައި ޔަހޫދީންގެ އަޅުކަންތަކަށް އެއްވުމަށް ޙާއްސަ ތަނެއް ބިނާކުރާނެ ކަމަށް ބުނެފައެވެ.

ޔަހޫދީންގެ އީދެއްކަމަށްވާ ހަނުއްކާ ގައި ޑިސެމްބަރު 25 ވަނަ ދުވަހު އިޒްރާއިލްގެ 2,567 މީހުން އަލް-އަޤްޞާގެ ތެރެއަށް ވަދެގަނެ, މިސްކިތުގެ ތެރޭގައި ނޭއްގާނީ އަމަލުތައް ހިންގާފައި ވެއެވެ. އޭގެތެރޭގައި މިސްކިތުގެ ގޯތި ތެރޭގައި ލަވަކިޔާ ނަށާ މިސްކިތުގެ ހުރުމަތް ކެނޑުމުގެ މުޑުދާރު އަމަލުތައް ހިންގާފައި ވެއެވެ. މިކަން ހިންގާފައިވަނީ އަލް-އަޤްޞާގެ ގޯތިތެރޭގެ ހުޅަނގުގައި އޮންނަ ބާބް އަލް-ރަޙްމާން އޭ ކިޔާ ނަމާދުކުރާ ސަރަޙައްދުގައެވެ.

އަދި ހަނުއްކާ ނިންމުގެ ގޮތުން ޖެނުއަރީ 2 ވީ ބުރާސްފަތި ދުވަހުވެސް އެމީހުން ވަނީ މިސްކިތްތެރޭގައި ޔަހޫދީންގެ އަޅުކަން 'ތަލްމޫދް' ވެސް ފުރިހަމަ ކޮށްފައެވެ. އެއި ޔަހޫދީންގެ ދީނުގެ ގަދީމީ އަޅުކަމެކެވެ. މި ދެ ފަހަރުވެސް އިސްތިއުލާރީ ވަޒަންވެރިންނަށް އިޒްރާއިލްގެ ފުލުހުންނާއި ސަލާމަތީ ބާރުތަކުން ވަނީ ފުރިހަމަ ރައްކާތެރިކަންދީ މިސްކިތުގެ ގޯތިތެރެއަށް ވަނުމަށް މަގުފަހިކޮށްދީފައެވެ.

އަލް-އަޤްޞާގެ މުޤްރާބީ ގޭޓުން މިސްކިތުގެ ތެރެއަށް ވަދެގަނެ މިސްކިތުގެ ހަރިންމަ ތެރޭގައި އެމީހުންވަނީ 'ތަލްމިއުދިކް' އަޅުކަން ކޮށްފައެވެ. އަދި މިސްކިތުގެ ތެރެއަށް ތައުރާތުގެ އާޔަތްތައް ލިޔެފައިވާ ޓެފިލިން ފޮށި (ޔަހޫދީންގެ އަޅުކަމުގައި ބޭނުންކުރާ ލެދަރ އިން ހަދާފައިވާ ފޮއްޓެއް) އަޅައިގެން އެމީހުންވަނީ އަޅުކަން ފުރިހަމަކޮށްފައެވެ.