ސައުދި އެރޭބިއާގައި ރޮނާލްޑޯ 2 އަހަރު: އަހަރެން މިހުރީ އުފަލުން, އެކަމަކު އިތުރުކާމިޔާބީތައް ހާސިލްކުރަން ބޭނުން
ސައުދީ ޕްރޯ ލީގުގެ އަލް ނަޞްރަށް ކުޅޭ ކްރިސްޓިއާނޯ ރޮނާލްޑޯ, ކްލަބާއެކު އިތުރު ކާމިޔާބީތައް ހޯދުމަށް ކެތްމަދުވެފައި ހުރިކަމަށް ބުނެފިއެވެ. ރޮނާލްޑޯ މިހެންބުނީ ކްލަބާއެކު ދެ އަހަރު ހޭދަކުރުން ފާހަގަކުރި މުނާސަބަތާ ދިމާކޮށެވެ.
ފާއިތުވި ގްލޯބް ސޮކަރ އެވޯޑްސްގައި ޕޯޗުގަލްގެ ކެޕްޓަން ރޮނާލްޑޯ ވަނީ 2024 ގެ މެދުއިރުމަތީގެ އެންމެ މޮޅު ކުޅުންތެރިޔާގެ އެވޯޑް ހާސިލްކޮށްފައެވެ. ހިލޭ ޓްރާންސްފަރ އެއްގައި 2023 ވަނަ އަހަރު މެންޗެސްޓަރ ޔުނައިޓަޑް ދޫކޮށް އަލް ނަޞްރަށް ބަދަލުވި ފަހުން ރޮނާލްޑޯ ވަނީ އެޓީމަށް 83 މެޗުން 74 ގޯލް ކާމިޔާބުކޮށްދީފައެވެ.
ވެރިރަށް ރިޔާޒްގެ ދިރިއުޅުމާ ގުޅޭގޮތުން ފެބުރުވަރީ 5 ވަނަ ދުވަހު 40 އަހަރު ފުރޭ ރޮނާލްޑޯ ބުނީ އޭނާ އާއި އޭނާގެ އާއިލާވެސް ސައުދި އެރޭބިއާގައި ތިބީ އުފަލުން ކަމުގައެވެ.
"އަހަރެމެން މި ރީތި ޤައުމުގައި އާ ދިރިއުޅުމެއް ފަށައިފިން. ދިރިއުޅުންވެސް, ފުޓްބޯޅަވެސް ރަނގަޅު. އަމިއްލަ އަދި ޓީމެއްގެ ގޮތުގައިވެސް މިތިބީ އަދިވެސް މިތާ. މަޑުމަޑުން ކުރިއަރަމުން މިދަނީ" ލީގުގެ މީޑިއާ ޗެނަލަށް ދިން އިންޓަވިއުއެއްގައި ރޮނާލްޑޯ ބުނެފައި ވެއެވެ.
ފާއިތުވި އަހަރު ކެރިއަރުގައި 900 ވަނަ ގޯލް ކާމިޔާބުކުރި ރޮނާލްޑޯ އަކީ އެންމެ ގިނަ ބައިނަލްއަޤުވާމީ ގޯލް ޖެހި ފިރިހެން ކުޅުންތެރިޔާގެ ރެކޯޑް އޮތް ކުޅުންތެރިޔާއެވެ. ރޮނާލްޑޯ ގަބޫލު ކުރާ ގޮތުގައި އޭނާ ސައުދީ ލީގަށް ބަދަލުވުމާއެކު ލީގުގެ މިސްރާބު ވަނީ ރަނގަޅުވާން ފަށާފައެވެ.
"އަހަންނަށް މިއީ ވަރަށް ބޮޑު ފަހުރެއް. އަހަރެން އައުމާއެކު ލީގު ފުޅާވާން ފަށައިފި. އެކި ހިސާބުތަކުން ރަނގަޅު ކުޅުންތެރިން ލީގާ ގުޅި, ލީގު ވަރަށް ފޯރިގަދަވެ ވާދަވެރިކަން ބޮޑުވެއްޖެ. ކުރިއަށް އޮތް 5 ނޫނީ 10 އަހަރު ލީގު މިއަށްވުރެ ބޮޑަށް ފުޅާވުން އަހަރެންގެ އުއްމީދަކީ. ކްލަބްތައް އެކަންޏެއް ނޫން އެކަޑެމީތައް ވެސް" ރޮނާލްޑޯ ބުންޏެވެ.
އޭނާ އިތުރަށް ބުނީ ސައުދީގެ ކްލަބުތައް އެހެން ލީގުތަކުގައި ވާދަކުރާތަން ދެކުމަކީވެސް އޭނާގެ ހުވަފެނެއް ކަމަށެވެ. އަދި ސައުދި އެރޭބިއާ އަދި ލީގު އެ ލެވެލްއަށް ގެންދިއުމަށް އޭނާ އެހީތެރިވާނެކަމުގައިވެސް ރޮނާލްޑޯ ވަނީ ބުނެފައެވެ. ރޮނާލްޑޯ ބުނީ އޭނާއަކީ ހަމައެކަނި ދަނޑުގައި ނަމޫނާއަކަށް ބަލާނެ ފަރާތެއް ނޫން ކަމަށާއި ދަނޑުން ބޭރުގައިވެސް އެހެންމީހުންނަށް އޭނާ ވާނީ ނަމޫނާ އަކަށް ކަމަށެވެ.
ސައުދީ ލީގާ ގުޅުނުފަހުން ރޮނާލްޑޯއާއކު އަލް ނަޞްރަށް މިހާތަނަށް ކާމިޔާބު ކުރެވުނީ 2023 ވަނަ އަހަރުގެ އެރެބް ކްލަބް ޗެމްޕިއަންސް ކަޕް އެކަންޏެވެ. ނަމަވެސް ފުރަތަމަ ސީޒަންގައި ވެސް ރޮނާލްޑޯ އޭނާގެ ކްލަބަށް 35 ގޯލް ކާމިޔާބުކޮށްދީފައި ވެއެވެ.
ރިއެކްޝަންސް
