ޗެމްޕިއަންސް ލީގު:ވިނީގެ ހެޓްރިކާއެކު ފަހަތުން އަރާ ރެއާލްއަށް ބޮޑު މޮޅެއް, އާސެނަލް ސަލާމަތްވީ ކިރިޔާ
ދެވަނަ ހާފުގައި ވިނީޝިއުސް ޖޭއާރު ހެދި ހެޓްރިކާއެކު ރިއަލް މެޑްރިޑް އިން ބޮރޫޝިއާ ޑޯޓްމަންޑުގެ މައްޗަށް ބޮޑު މޮޅެއް ހޯދައިފިއެވެ. ޗެމްޕިއަންސް ލީގުގައި އަންގާރަ ދުވަހު ރެއާލްގެ ދަނޑުގައި ކުޅުނު މެޗުން ރެއާލް މޮޅުވީ 5-2 ން ނެވެ. ރެއާލްގެ 5 ގޯލްވެސް ޖަހާފައިވަނީ ފަހު ފާހުގައެވެ. ނަމަވެސް ފުރަތަމަ ހާފު ނިމުންއިރުވެސް ޑޯޓްމަންޑް އޮތީ ދެ ގޯލްގެ ލީޑެއްގައެވެ.
މެޗުގައި ވިނީޝިއުސްގެ ފަރާތުން ފެނުނު އާދަޔާހިލާފް ކެރެކްޓާއާއި ހަކަތައަށް ކޯޗް ކާލޯ އަންޗޮލޮޓީ ވަނީ ވަރަށް ބޮޑަށް ތައުރީފްކޮށް ވާހަކަ ދައްކާފައެވެ. ވިނީޝިއުސްގެ ފުރަތަމަ ދެ ގޯލް ކާމިޔާބުކުރީ 62 އަދި 86 ވަނަ މިނިޓްގައެވެ. ތިންވަނަ ގޯލް ކާމިޔާބުކޮށްފައިވަނި މެޗުގެ އިތުރު ވަގުތުގެ ތިންވަނަ މިނިޓްގައެވެ. "އޭނާ (ވިނީޝިއުސް) އެ ކުޅުނުގޮތަށް ކުޅުންތެރިއަކު ދެވަނަ ހާފުގައި ކުޅުމަކީ އާދައިގެ ކަމެއްނޫން" މެޗަށްފަހު ބޭއްވި ނިއުސް ކޮންފަރެންސްގައި އަންޗޮލޮޓީ ބުނެފައި ވެއެވެ. 2024ގެ ބެލެންޑޯ ހޯދާނެ ކަމަށް އެންމެ ބޮޑަށް ބެލެވޭ ކުޅުންތެރިއަކީވެސް ވިނީޝިއުސް ޖޭއާރުއެވެ. ބެލެންޑޯ ދޭ ހަފްލާ ފްރާންސް ގެ ވެރިރަށް ޕެރިހުގައި މީގެ ހަފުތާއެއް ފަހުން ބާއްވާނެއެވެ. އަންޗޮލިޓީވެސް ބުނެފައިވަނީ ބެލެންޑޯ ކާމިޔާބުކުރާނެކަމަށް ބެލެވެނީ ވިނީ ކަމުގައެވެ.
ޑޯޓްމަންޑްގެ ގޯލްތައް ކާމިޔާބުކޮށްދިނީ 30 ވަނަ މިނިޓްގައި ޑޮންޔެލް މަލެން އަދި 34 ވަނަ މިނިޓްގައި ޖެމިން ގިޓެންސްއެވެ. ރެއާލްގެ ފުރަތަމަ ގޯލް 60 ވަނަ މިނިޓްގައި ކާމިޔާބުކޮށްދިނީ ޑިފެންޑަރު އެންޓޯނިއޯ ރުޑީގާއެވެ. އަދި ތިންވަނަ ގޯލް 83 ވަނަ މިނިޓްގައި ކާމިޔާބުކޮށްދިނީ ލޫކަސް ވަޒްކޭޒް އެވެ.
މި މޮޅާއެކު ހޮނިހިރު ދުވަހު ލަލީގާގެ ބޮޑު މެޗު, ސީޒަންގެ ފުރަތަމަ އެލްކްލެސީކޯ ގައި ރިއާލް މެޑްރިޑާއި ބާސެލޯނާ ވާދަކުރާއިރު މި ދެޓީމްވެސް އެންމެ ފަހުން ކުޅުނު ދެ މެޗުންވެސް މޮޅުވެފައިވަނީ 5 ގޯލް ކާމިޔާބުކޮށްގެންނެވެ.
ޗެމްލިއަންސް ލީގުގައި އަންގާރަ ދުވަހު ގިނަ މެޗުތަކެއް ކުޅެފައި ވެއެވެ. އާސެނަލްއަށް އަށް ޝަޚްތަރް ޑޮނެސްކް ކައިރން މޮޅުވެވިފައި ވަނީ އެޓީމުން 29 މިނިޓްގައި ބައިކޮޅަށް ވައިން ގޯލާއެކު 1-0 ން ނެވެ. އާސެނަލްގެ ދަނޑުގައި ކުޅުނު މިމެޗުގައި ނަތީޖާ ބަދަލުކޮށްލަން 77 ވަނަ މިނިޓްގައި ލިބުން ޕެނަލްޓީވެސް ލިއޮނާޑޯ ޓްރޮސާޑް އަތުން ވަނީ ނާކާމިޔާބު ބެފައެވެ. އިތުރު ގޯލްތައް ކާމިޔާބު ކުރާނެ ރަނގަޅު ދެތިން ފުރުޞަތެއް ލިބުން ނަމަވެސް އާސެނަލް އަށް ޔޫކްރެއިންގެ ޑޮނެސްކް ކައިރީގައި މާ އެދެވޭ ކުޅުމެއް ނުދެއްކެއެވެ. ޙާއްސަކޮށް ފަހު ފާހުގައި ޑޮނެސްކުންވަނީ އާސެނަލްއަށް ވަރަށް ބޮޑަށް ޕްރެޝަރ ކޮށްފައެވެ.
ޗެމްޕިއަންސް ލީގުގައި އަންގާރަ ދުވަހު އާސެނަލް އަށް އުނދަގޫ މޮޅެއް ލިބިފައިވާއިރު ޕްރިމިއަރ ލީގުގައި މީގެ ދެ ދުވަސްކުރިން އާސެނަލް ވަނީ ބާންމައުތު އަތުން 2-0 ބަލިވެފައެވެ.
ލީގުގައި އަންގާރަ ދުވަހު ކުޅުނު އިތުރު މެޗުތަކަށް ބަލާއިރު 2-0 ން އެސްޓަންވިލާ ވަނީ ބޮލޯނާގެ މައްޗަށް ކުރިހޯދާފައެވެ. ޖިރޮނާއިން ސްލޮވަން ބްރަޓިސްލަވާ ބަލިކޮށްފައި ވަނީވެސް 2-0 ގެ ނަތީޖާ އަކުންނެވެ. ސްޓްޓްގާޓް އިން 1-0 ން ޔުވެންޓަސް ބަލިކުރިއިރު ޕީއެސްޖީ އާއި ޕީއެސްވީ އެއިންދޮވެން ވަނީ 1-1 ން އެއްވަރުވެފައެވެ. އަދި ސްޕޯޓިން ލިސްބަން ސްޓަމް ގްރަޒް ގެ މައްޗަށް ކުރި ހޯދާފައިވަނީ 2-0 ންނެވެ.
ރިއެކްޝަންސް
