ދަރަނި އަދާކުރުމާ ގުޅޭގޮތުން ލަފާ ހޯދަން ހެދި އެއްބަސްވުން އުވާލުމަކީ ބުއްދިވެރި ނިންމުމެއް- ނަޝީދު
ދަރަނި އަދާކުރުމާ ގުޅޭގޮތުން ލަފާ ހޯދަން ހެދި އެއްބަސްވުން އުވާލުމަކީ ބުއްދިވެރި ނިންމުމެއް ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ކުރީގެ ރައީސް އަދި ރައްޔިތުންގެ މަޖިލިހުގެ ކުރީގެ ރައީސް މުޙައްމަދު ނަޝީދު މިފަދައިން ވިދާޅުވީ ފޭސްބުކްގައި ކުރެއްވި ޕޯސްޓެއްގައެވެ. ރައީސް ނަޝީދު މިފަދައިން ވިދާޅުވެފައި މިވަނީ ދަރަންޏާ ގުޅޭ ލަފާ ހޯދަން އެމެރިކާގެ ކުންފުންޏަކާއެކު ސަރުކާރުން ހަދާފައި އޮތް އެއްބަސްވުމެއް ސަރުކާރުން ބާތިލް ކުރުމުންނެވެ. އެފަދަ އެއްބަސްވުމެއް ސަރުކާރުން ހަދާފައިވަނީ އެމެރިކާގެ އިންޑިޕެންޑެންޓް އިންވެސްޓްމަންޓް ބޭންކިންގ ފާމަކާއެކުއެވެ.
އެނިންމެވުމަށް ތައުރީފް ކުރައްވާ ކުރީގެ ރައީސް ނަޝީދު ވިދާޅުވީ ރާއްޖޭގެ ދަރަންޏާ ގުޅޭގޮތުން ލަފާ ދިނުމަށް ބޮޑު ޚަރަދުގައި ކަނޑައެޅި ޑެބްޓް އެޑްވައިޒަރގެ އެގްރީމަންޓް ޓާމިނޭޓް (ބާތިލް) ކުރެއްވި ކަމީ ރައީސް ޑރ.މުއިއްޒު އެޅުއްވި ބުއްދިވެރި ފިޔަވަޅެއް ކަމަށެވެ.
" މިފަދަ އެޑްވައިޒަރުން އަޅުގަނޑުމެންގެ ގައުމުތަކުން ނަގަމުންދަނީ އިންތިހާ ނާޖާއިޒް ފައިދާ" ނަޝީދު ވިދާޅުވިއެވެ.
ސަރުކާރަށް އޮތް އެންމެ ބޮޑު ބުރައަކީ އަދި ކަންބޮޑުވުމަކީވެސް ދަރަންޏެވެ. މިސަރުކާރު ވެރިކަމާ ހަވާލުވިއިރު 120 ބިލިއަން ރުފިޔާގެ ދަރަނި އޮތް ކަމަށް ސަރުކާރުން ވަނީ ބުނެފައެވެ. ސަރުކާރުން ގެންދަވަނީ ދަރަނި ދައްކަވަމުންނެވެ. ނަމަވެސް މިފަހުން ވަނީ ދަރަނި ދައްކަންވެސް ދަރަނި ނަގަން ޖެހިފައެވެ.
ސަރުކާރުން ތަކުރާރުކޮށް ބުނަމުން އަންނަނީ ދަރަނި ދައްކާ މަޝްރޫއުތައް ހިންގަމުން ދަނީ ފައިސާ ޗާޕްނުކޮށް ލިބޭ އާމްދަނީން ކަމަށެވެ. ދަރަނި މެނޭޖްކޮށް ދެއްކުމުގެ ކަންކަން ސަރުކާރުން މިހާރު ކުރަމުން ދަނީ ފިނޭންސް މިނިސްޓްރީއާއި, އެމްއެމްއޭއާއި, ފޮރިންގ މިނިސްޓްރީ ގުޅިގެންނެވެ.
ރިއެކްޝަންސް
